Read tiv Mateu 18 Bible Online

Mateu 18 - tiv bible

Mateu 18

¹Tsô hen shighe la mbahenen va hen Yesu, ve kaa er: Ka an je nan hembe sha tartor u Sha?

²Tsô A yila wanye A va ver un her atô ve,

³A kaa er: Ka mimi je, M kaan ne ne, saa né gema né hingir er mbayev mba kiriki nahan, gayô, mayange né nyôr tartor u Sha ga.

⁴Hanmô u nana hide a iyol i nan ijime er wanye ne nahan yô, ka nan je nan hembe sha tartor u Sha ye.

⁵Man hanmô u nana rumun u môm ken imba i mbayev mba kiriki mban ken iti Yam yô, ka Mo je nan rumun ye.

⁶Kpa hanmô u nana na u môm ken mbakiriki mban mba ve nem jighjigh ne, gbev mbu nôngon yô, kwagh u a lu nan guda yô, ka u ma i zer nan zegenase sha mon, ma i gbihi shin iv i zegemnger.

⁷Kwagh á tser tar sha ci u atôakaa a nan gbev mbu nôngon. Gadia ka u atôakaa a nan gbev mbu nôngon a a va keng, kpa kwagh á tser or u atôakaa a nan gbev mbu nôngon a va sha ikev i nan la.

⁸Man aluer uwegh ough shin nguhar wou vea na u gbev mbu nôngon yô, tôndo ve, ta kera; u ú nyôr ken uma a iwan shin msombo yô, ka u guda a u ma u lu a ave ahar shin angahar ahar, ma i gbihi u ken icôronusu la.

⁹Man aluer ishe you ia na u gbev mbu nôngon yô, dugh i, ta kera, a ú nyôr ken uma a ishe i môm ka u guda a u ma u lu a ashe ahar ma i gbihi u ken usu u gehena la.

¹⁰Ver nen ishima, de lahan nen u môm ken mbakiriki mban ga, gadia M ngu kaan ne Mer, mbatyomov vev mba Shaav mba kenger ishigh ki Terem u A lu sha la gbem.

¹¹[Gadia Wan u or va sha u yiman kwagh u a saa yô].

¹²Ne mba henen nana? Aluer or nana lu a iyôngo akunduataan man u môm ken i ia tsume yô, nana kera undu i akunduanyiingber kar itiankarinyiin la sha iwo, nana yem nana za ker i i tsum la gaa?

¹³Man aluer nana zua a i yô, mimi je M ngu kaan ne, m-ember u nana ember sha i la, una hemba u sha i akunduanyiingber kar itiankarinyiin i i tsum ga la.

¹⁴Kape i lu ishima i Ter wen u A lu Sha la, u mbakiriki mban, mô ve nana saa ga la.

¹⁵Man aluer anmgbian wou una er u kwaghbo yô, za za tese un ibo na, we vea na tseegh; aluer una ungwa u yô, u yima anmgbian wou je ve.

¹⁶Man aluer una ungwa u ga yô, shi kua a or môm shin ior ihiar a we imôngo, sha er hanma kwaghôron una kure sha zwa u mbashiada uhar shin utar yô.

¹⁷Man aluer una ungwa mbala kpaa ga yô, za kaa nongo u Kristu; man shi una ungwa nongo u Kristu kpaa ga yô, a̱ hingir we er ka ortyôtyev man orngoholkpandegh nahan.

¹⁸Mimi je M kaan ne ne, hanma kwagh u ne kange shin tar ne, una lu uikangen Sha kpaa; man shi hanma kwagh u ne sagh shin tar ne yô, á sagh un Sha kpaa.

¹⁹Man shi M ngu kaan ne Mer: Aluer ior ihiar ken a ven man vea zua ishima shin tar sha ma kwagh u vea sôn yô, Terem u A lu Sha kpaa Una er ve un.

²⁰Gadia her ape ior ihiar shin itiar ve kohol ken iti Yam yô, Mo kpaa M ngu ve her atô je.

²¹Tsô Peteru va her a Na, va kaa a Na er: Tere, ka acin a me je man anmgbian wam una eren kwaghbo man me de unu? I̱ lu zan zan kwa taankaruhara?

²²Yesu kaa a na er: M kaa a we Mer, zan zan kwa taankaruhar tsô ga, kpa i̱ lu zan zan akunduatargber kwa taankaruhar.

²³Nahan yô, tartor u Sha ngu vough er tor ugen u i lu un pe kuren kwagh u inyar a mbashiren un tom yô.

²⁴Zum u a hii u eren nahan la, i va un a ugen u a lu un a injô i utalenti dubu pue yô.

²⁵Kpa er ngula lu a kwagh u kimbin ga yô, ter na kaa er, i̱ za tee un a kwase na man ônov nav man akaa a a lu a mi cii kpaa, i̱ kimbi injô.

²⁶Ortom la gure, zamber a na er: Tere, wa ishima a mo, tsô me kimbi u cii.

²⁷Tsô mhôônom kôr ter u ortom la, a pase un a tuhwa, a de un injô na.

²⁸Kpa ortom la dugh yô, a kohol ikar na u ve eren tom imôngo, u a lu un a injô, i sule akunduataan, tsô a kôr un, a ta un ihamber iker, a kaa er: Kimbim injô yam.

²⁹Un ikar na u tomough la gure un inya, zamber a na kaa er: Wa ishima a mo, tsô me kimbi u.

³⁰Kpa a venda, a za, a za wa un ken gaadi je, er saa una vande kimbin injô i lu ya un la ve.

³¹Tsô er mbaerentom a na imôngo nenge kwagh u a er la yô, asema vihi ve kpishi, ve za, ve za pase ter ve akaa a a er la cii.

³²Tsô ter na yila un, kaa a na er: We ortom u ifer ne, anzô ou la cii m de u sha ci u u zamber a mo yô.

³³Nahan we kpaa, ka u ma u zungu ikaru u tom la keng er mo m zungu u mhôônom nahan gaa?

³⁴Nahan ter na la yuwe, a gema a na un sha ikev i mbaeren ior ican la, er saa una kimbi injô i a ye un cii ve.

³⁵Kape Terem u A lu Sha kpaa Una er a ven la, aluer ne kpaa hanmô wen nana de anmgbian u nan akaabo a nan gbar gbar ga yô.