Read tiv Mateu 23 Bible Online

Mateu 23 - tiv bible

Mateu 23

¹Tsô Yesu ôr kwagh a ikpelaior kua mbahenen Nav,

²A kaa er: Mbangeren man Mbafarishi mba tem sha ityough ki Mose.

³Nahan akaa a ve kaan ne cii, er nen a, waan nen iko kpaa, kpa de eren nen er ve eren nahan la ga; gadia ka ve kaa a kaa kwagh, kpa ve eren sha mi ga.

⁴Een, ka ve kange ikav mbi yuhwan mbi mbi lu ican u tôôn, ve penda ior sha avande, kpa ve ayol a ve yô, ve soo u benden ihôwe sha mi tsô kpaa ga.

⁵Kpa aeren a ve cii yô, mba eren a sha u ior ve̱ nenge; gadia ka ve kor akpagher a gbangese, man ve eren umka mba uriga vev ve kehe.

⁶Ijiir i teman i injaa i ken uiniongo man mkônom ma injaam ma ken ushinagoge,

⁷man ishughun i sha ityembekasua man u ior ve yilan ve er, rabi kpaa, doo ve cii.

⁸Kpa ne yô, i̱ de yer ne er, rabi, ga, gadia Ortesen wen ngu môm tsô, man ne cii ne mba anmgbianev.

⁹Man shi de yer nen ma or shin tar ne ner ter wen ga, gadia Ter wen ngu môm tsô, ka u A lu Sha la.

¹⁰Man i̱ de yer ne er, mbahemenev, kpaa ga, gadia Orhemen wen ngu môm tsô, ka Kristu.

¹¹Kpa u nan lu u hemban ken a ven yô, nana̱ hingir u eren ne tom.

¹²Man shi hanmô u nan kenden a iyol i nan sha yô, á hire a nan ijime; man hanmô u nan hir a iyol i nan ijime yô, á kende a nan sha.

¹³Kwagh á tser ne, ne mbangeren man Mbafarishi, ne mbaimangerev, gadia ne mba cirin ior tartor u Sha; ne ayol a en ne mba nyôron ga, man shi mba ma ve nyer la kpaa, ne mba rumun ve u nyôron ga.

¹⁴Kwagh á tser ne, ne mbangeren man Mbafarishi, ne mbaimangerev, gadia ne mba ye uya mba kasev mba côgholov, er ne lu eren ugôgômbamsenev sha imanger la je; ka sha ci u nahan je ne hemba zuan a ibo i vesen ye.

¹⁵Kwagh á tser ne, ne mbangeren man Mbafarishi, ne mbaimangerev, gadia ka ne ningir zegemnger man tar sha u keren or môm ner, nana gema nana nyôr nongo wen la; nana hingir nahan yô, ne gema nan, nan hemba lun wan u gehena, a ven kwa har je.

¹⁶Kwagh á tser ne, ne mbahemenev mba pirin ashe, ne mba ne kaan ner: Aluer or nana bum tempel yô, ka kwagh ga; kpa or nana bum sha zenaria u ken tempel yô, mbum la una kôr nan.

¹⁷Ne abumeaior ne, ne mbaapirashe! Ka nyi i hembe lun a inja, ka zenaria shin ka tempel u a wanger zenaria laa?

¹⁸Man shi ner: Aluer or nana bum atse a nanden nagh sha mi yô, ka kwagh ga; kpa or nana bum iwua i sha atse la yô, mbum la una kôr nan.

¹⁹Ne mbaapirashe mban! Ka nyi i hembe lun a inja, ka iwua shin ka atse a a wanger iwua laa?

²⁰Yô, u nan bum atse la, nan ngu bumun a kua akaa a a lu sha mi la cii.

²¹Man shi u nan bum tempel yô, nan ngu bumun un kua u A tem kimi la kpaa.

²²Man shi u nan bum Sha yô, nan ngu bumun ikônough ki torough ki Aôndo kua u A tem sha mi la kpaa.

²³Kwagh á tser ne, ne mbangeren man Mbafarishi, ne mbaimangerev. Gadia ne mba tsough môm-ken-upue u kunguraku man yiye man ayegh, kpa ne kera wa akaa a a hembe lun a inja ken atindi la iko ga, er: ijirôron man mhôônom ma zungwen man jighjigh u nan, er i lu u né eren akaa ngan keng yô, shi ma ne de u eren angara kpaa ga.

²⁴Ne mbahemenev mba pirin ashe, ka ne kese imunan kera, ne gema ne mena rakumi je.

²⁵Kwagh á tser ne, ne mbangeren man Mbafarishi, ne mbaimangerev! Gadia ka ne kile iyongo man gbande ken ijime na, kpa kimi yô, ve iv a mtusu man u kôron iyol tsaha ga la.

²⁶We Orfarishi u pirin ashe, vande kilen iyongo kimi, sha er ken ijime i i kpaa ia hingir wang yô.

²⁷Kwagh á tser ne, ne mbangeren man Mbafarishi! Gadia ne mba vough er iwar i i kungu nahan, i i doo u nengen ken won, kpa kimi yô, i iv a akuhe a mbakpenev man shi hanma kwagh u hôngorough.

²⁸Kape ne kpaa ior ve nengen perapera wen sha ashe la, kpa ken asema a en yô, ne iv a imanger man mvende u vendan atindi.

²⁹Kwagh á tser ne, ne mbangeren man Mbafarishi, ne mbaimangerev! Gadia ne mba maan iwar i uprofeti man ne mba ser iwar i mbaperapera kpaa,

³⁰Ne mba kaan ner: Sea lu sha ayange a uter asev la yô, mayange ma se nyôr nongo a ve sha u haan awambe a uprofeti, la ga.

³¹Kape ne lu eren shiada pasen ayol a en er ne lu ônov mba mbawuan uprofeti je la.

³²Yô, gba ivin nen ikaren i uter enev tsô.

³³Ne iyô, ne ônov mba igbindev! Né er nan man né war ibo i nan i ken gehena la?

³⁴Sha ci u nahan yô, M ngu tindin ne a uprofeti man ior mba fan kwagh man mbangeren; né wua mbagenev, né mande mbagenev sha terankon, shi mbagenev yô, né gbidye ve akpa ken ushinagoge enev, né tôv ve a ican ityô sha agar agar;

³⁵sha u awambe a mbaperapera a i haa a inya shin tar cii a̱ hide sha ityouv yenev yô, hii sha awambe a Abel, or u perapera, zan zan ar sha awambe a Sekaria, wan u Barakia, u ne wua un hen harga u tempel a atse a nanden nagh sha mi la.

³⁶Mimi je M kaan ne ne, akaa ne cii aa er kov ne.

³⁷Yerusalem, Yerusalem, we u u woo uprofeti man u te mba i tindi ve her a we, awen ne; ka acin a me je man i lum pe kohol ônov er ngôikegh ka a kohol ônov nav shin akper a na nahan, kpa ne rumun ga!

³⁸Nenge ase, i undu ya wou, hingir ice.

³⁹Gadia M ngu kaan ne, kera nengen yen a Mo ga zan zan né va kaa ner: I̱ wuese Un u A ve ken iti i Ter la.