Read tiv Mateu 24 Bible Online

Mateu 24 - tiv bible

Mateu 24

¹Yesu due ken tempel, gba yemen. Tsô mbahenen Nav va her a Na sha u va tesen Un ayou a tempel la.

²Kpa Yesu kaa a ve er: Ne nenge akaa ne cii kpa? Mimi je M kaan ne ne, iwen i môm tsô kpaa i á de i i̱ lu sha igen ngi ga, á yôhôl a ca ca.

³Tsô za tem sha uwo u Olev yô, mbahenen va her a Na, ve tseegh, ve kaa er: Kera kaa ase se yôô, ka hanma shighe man akaa ne aa ere? Man ka nyi ia lu ikav i sha mve Wou la man i mkurtara?

⁴Yesu gema kaa a ve er: Ver nen ishima, ma or nana̱ de tsughun ne ga.

⁵Gadia ior kpishi vea va ken iti Yam, vea kaan er: Ka mo Kristu je ne; vea tsugh ior kpishi.

⁶Man shi né ungwa kwagh u utya man igwa i utya kpaa; yô, ver nen ishima, ishima i̱ de nyian ne ga; gadia akaa ne yô, aa er keng, kpa mkur una lu a kuma ga.

⁷Gadia ikurior igen; ia mough ityav a ikurior i gen; tartor ugen kpaa ua mough ityav a tartor ugen; ijen ia gba man ityartenger ia lu sha ajiir kposo kposo.

⁸Kpa akaa ne cii yô, ka a ka mhii u ican tsô.

⁹Hen zum la vea na ne ken ican, vea wua ne kpaa; akuraior cii aa kôr ne ihom sha ci u iti Yam.

¹⁰Hen shighe la ior kpishi vea nôngo gbev vea hingir mbanengen ayol a ve mker, vea kôr ayol a ve ihom kpaa.

¹¹Man shi uprofeti mba aiev kpishi vea za va, vea tsume a ior kpishi.

¹²Man sha ci u mvende u vendan atindi una seer a seer nahan dooshima u mbagenev kpishi una ndôhôr.

¹³Kpa or u nana taver ishima zan zan mkur yô, ka nan á yima nan ye.

¹⁴Man Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.

¹⁵Zum u nea nenge kwaghndôhôrshima u nan mtim u profeti Daniel ôr kwagh na la, er lu tilen ken icighanjiir yô, (or u ôron kwaghngeren ne nana̱ ver ikav)

¹⁶zum la, mba ve lu ken Yudia, ve̱ yevese ve̱ yem sha iwo.

¹⁷U nan lu sha tor kpaa, nana̱ de hongo sha u tôôn ikav mbi ken iyou i nan ga;

¹⁸man shi u nan lu ken ityev kpaa, nana̱ de hidi sha u za tôôn riga u nan ga.

¹⁹Kasev mba lun iyav man mbalun a ônov ikum hen ayange la yô, kwagh á tser ve.

²⁰Yô, er nen msen, ayem a en a̱ de lu sha shighe u fam ga, sha iyange i memen kpaa ga.

²¹Gadia zum la zegecan una er, imbacan i hii er i gba tar la je zan zan ainge ne i lu a er mayange ga yô, man mayange kpaa ia kera shi er nahan kpaa ga.

²²Man ka er i pande ayange la kera yô, gayô, ma i yom ma or ga; kpa sha ci u uicuwanmbaiorov yô, á pande ayange la kera.

²³Hen shighe la yô, aluer ma or nana kaa a ven er: Nenge, Kristu ngun; shin, ngula keela yô, de ne nen jighjigh ga.

²⁴Gadia ukristu mba aiev man uprofeti mba aiev kpaa vea mough vea er uivande mba vesen man akaa a kpilighyol kpaa, sha u vea tsugh uicuwanmbaiorov aluer vea fatyô yô.

²⁵Nenge, M tsengaôron ne akaa ne cii er shighe u a a lu a kuma ga je yô.

²⁶Nahan yô, aluer vea kaa a ven er: Nenge ngun ken ikôngo ne, kpa de dugh, ze nen ga; shin: Ngun, ken iyou i ken iuv ne, kpa de ne nen jighjigh ga.

²⁷Gadia er inyiar ka i nyiar sha ityoughkitaregh man i wanger i mande shin ityôtar nahan kape m-ande u Wan u or kpaa una lu la.

²⁸Henpe gundukwagh a lu yô, ka her mbaapu vea kohol ye.

²⁹Kpa fese je, ken masejime u ican i her ayange la yô, iyange ia wa ime, uwer kpaa ua kera wanger ga; asan aa osough sha kwavaôndo man agee a a lu sha kwavaôndo la aa tenger.

³⁰Tsô zum la ikav i Wan u or ia due sha aôndo. Zum la akuraior a sha won cii aa ta ave sha vanger, man aa nenge a Wan u or Una lu van sha abeen a sha kwavaôndo a agee a vesen kua iengem kpaa.

³¹Man Una tindi mbatyomov Nav a ikpamkor i kaan hweng, vea kohol uicuwanmbaiorov Nav sha avegher anyiin á hii ken ikighir ingila.

³²Hen nen injakwagh ne sha kon u tur. Zum u gbaa na ka una leghem una hôm ika yô, ne fa je ner, wangernyom mgbôghom ve.

³³Kape ne kpaa, shighe u né nenge akaa ne aa eren yô, fa nen ner, a mgbôghom ve, nangem sha hunda je.

³⁴Mimi je M kaan ne ne, kov ne ua lu a kar kera ga saa akaa ne cii aa er ve.

³⁵Sha man tar vea kar kera, kpa akaaôron Am yô, aa kar kera mayange ga.

³⁶Kpa kwagh u iyange la man shighe la yô, ma or fa ga, shin mbatyomov mba Shaav shin Wan kpaa ga, saa Ter tseegh.

³⁷Man er lu sha ayange a Noa nahan, kape mve u Wan u or kpaa una lu la.

³⁸Gadia er sha ayange a mngerem ma deemee lu a va ga la ve lu yan akaa, man akaa, eren kasev, nan kasev ken unoo zan zan ar sha iyange i Noa kar nyôr ken tso la,

³⁹kpa ve fa ga zan zan mngerem ma deemee va, va kuwa a ve cii la yô, kape m-ande u Wan u or kpaa una lu la.

⁴⁰Hen shighe la ior ihiar vea lu ken ityev, á tôô u môm á undu u môm;

⁴¹kasev uhar vea lu wuan uwua sha nase, á tôô u môm á undu u môm.

⁴²Yô, kuran nen, gadia ne fa iyange i Ter wen Una va la ga.

⁴³Kpa fa nen kwagh ne: Aluer orya una fe shighe u ormbaiv a ve yô, ma a kor, ma a kera rumun er i̱ va pev un iyou ga.

⁴⁴Nahan yô, ne kpaa kohol nen iyol gadia ka hen shighe u ne ver ishima ga la je, Wan u or Una va ye.

⁴⁵Yô, ka an nan lu wanakiriki u jighjigh man u fan kwagh u ter u nan una wa nan ya sha ikev sha u nana naan ve kwaghyan sha ashighe ashighe?

⁴⁶Wanakiriki u ter u nan una hide, una va kohol nan eren nahan la yô, á saan nan iyol.

⁴⁷Mimi je M ngu kaan ne, una wa akaa a na cii sha ikev na.

⁴⁸Kpa aluer wanakiriki u bo la nana kaa ken ishima i nan er:

⁴⁹Terem timbir u van yum man nana gba gbidyen akar a na a tom, man nana gba yan akaa, man akaa a mbahundenmsôrom imôngo yô,

⁵⁰ter u wanakiriki la una va sha iyange i wanakiriki la nan ver ishima ga la, hen shighe u nan fe ga la kpaa;

⁵¹una gber nan atôôn atôôn, una na nan kwar a mbaimangerev imôngo; mliam maa lu keregh kua anyi a yan.