Read tiv Mateu 28 Bible Online

Mateu 28 - tiv bible

Mateu 28

¹Tsô iyange i memen i been kera man sev mbu sôôn u aven sha iyange i Lahadi ken lahadi ngula yô, Maria Magedalena man Maria ugen la ve va sha u va nengen uwar.

²Yô, zegemtenger u tar tenger; gadia ortyom u Ter sen Sha, va va menger iwen la kera, tema sha mi.

³Mluashe na lu er ka inyiar nahan, akondo a na kpaa kungu segh segh er awombo nahan.

⁴Er mbakuran mbala cia un kpishi yô, akarkase gbidye ve iyol, ve hingir er mbakpenev nahan.

⁵Kpa ortyom u Sha la gema kaa a kasev mbala er: De cie nen ga, gadia m fa ka Yesu u i mande Un sha terankon la ne keren ye.

⁶Ngu heen ga, A nder er lu kaa nahan; va, va nenge nen ijiir her ape A yav yô.

⁷Za nen fefa je, za kaa nen mbahenen Nav ner, A nder shin mbakpenev, nenge ngu hemen a ven u zan sha Galilia; ka keela né za nenge a Na ye. M kaan ne je ne.

⁸Tsô ve mough hen uwar la fefa a mciem man iember kpishi kpaa, ve za ayem sha u vea za ôr mbahenen Nav kwagh la.

⁹Tsô Yesu va kohol ve, kaa er: M sugh ne! Ve va gba Un ave angahar, ve civir Un.

¹⁰Tsô Yesu kaa a ve er: De cie nen ga, za za kaa nen anmgbianev Av, ve̱ za Galilia, ka keela ve a za nenge a Mo ye.

¹¹Mba ngur yemen yô, mbagenev mba ken mbakuran mbala nyôr ken gar, za ôr upristi mba tamen akaa a a er la cii.

¹²Man er ve kohol imôngo a mbatamen, ve hen kwagh yô, ve na mbautyav mbala inyaregh kpishi,

¹³ve kaa er: Kaan nen ner: Mbahenen Nav va tugh va ii Un shighe u se lu yaven yô.

¹⁴Man aluer kwagh ne una gba gomna ken ato yô, se se ôr, tsô á kuma un, kwagh á kera er ne ga.

¹⁵Tsô ve ngohol inyaregh kila, ve er kwagh u i tam i we ve yô. Mkaanem man samber hen Mbayuda zan zan ar hen iyange ne.

¹⁶Tsô mbahenen mba pue kar môm mbala yem sha Galilia hen uwo u Yesu kaa ve la.

¹⁷Mba nengen a Na yô, ve gure ve civir Un, kpa mbagenev ta akperan.

¹⁸Tsô Yesu va va ôr kwagh a ve, kaa er: Tahav mbu Sha man mbu sha won cii i wam sha ikev.

¹⁹Nahan yô, za nen, za gema nen akuraior cii a̱ hingir mbahenen, eren nen ve batisema ken iti i Ter man Wan man Icighan Jijingi.

²⁰Tesen nen ve u kuran akaa a M we ne kwagh sha mi cii; nenge, Me luun a ven ayange ayange zan zan mkurtar je.