Read tiv Mateu 5 Bible Online

Mateu 5 - tiv bible

Mateu 5

¹Tsô nengen a ikpelaior yô, A unde sha uwo; tem sha her yô, mbahenen Nav va her a Na.

²Tsô A bugh zwa Na, A gba tesen ve, kaan er:

³Saan mba ve lu mbaibanave ken jijingi la iyol, gadia tartor u Sha ka u ve je.

⁴Saan mba ve zungu la iyol, gadia á sur ve asema.

⁵Saan mba ve lu a ishima i legh legh la iyol, gadia tar ua lu dyako ve je.

⁶Saan mba ijen i ker ve, man imura kpaa, sha kwagh u perapera la iyol, gadia vea ide.

⁷Saan mba ve zungu mhôônom la iyol, gadia á zungwe ve mhôônom.

⁸Saan mba ve lu asema wang la iyol, gadia vea nenge a Aôndo.

⁹Saan mba ve ker num la iyol, gadia á yila ve er, ônov mba Aôndo.

¹⁰Saan mba i eren ve ican sha ci u kwagh u perapera la iyol, gadia tartor u Sha ka u ve je.

¹¹Saan ne iyol zum u ka a heen ne, a tôvon ne a ican, man a teren ne sha hanma inja i ifer sha aie, sha ci Wam yô,

¹²ember nen, i̱ saan ne ken ishima tsung, gadia injar yen vese Sha, gadia kape ve tôv uprofeti mba ve vande a ven la a ican je la.

¹³Ne mba bar u tar; kpa aluer bar una kera nyoho ga yô, ka sha nyi je á sôr unu? Una kera lu a inja sha ma kwagh je ga, á gba haan kera tsô, ior á ndyar angahar.

¹⁴Ne mba iwanger i tar. Gar u i maa un sha igungu, lu myer ga.

¹⁵Man mba te imenger mba cirin kapu sha mi ga, kpa ka i ver sha daar u pendan imenger sha mi, nahan i wanger mba ve lu ken iyou la cii je.

¹⁶Kape ne kpaa iwanger yen i̱ wanger sha ishigh ki iorough la, sha u ve̱ nenge aeren a en a dedoo man ve̱ civir Ter wen u A lu Sha yô.

¹⁷De henen nen ner, M va sha u bunden atindiakaa kua uprofeti ga, M va sha u bunden a bunde ga, kpa ka u eren sha mi vough.

¹⁸Gadia mimi je M kaan ne ne, zan zan Sha man tar kpaa vea kar kera je, kpa mayange ishangekwagh môm shin anikav môm tsô kpaa una kough ken atindiakaa kera ga, zan zan akaa cii aa kure sha mi vough.

¹⁹Nahan yô, hanma or u nana sagh u môm ken atindiakaa a hemban ndahar ne man nana gema á tese ior nahan kpaa yô, á yila nan er or u hemban gban ijime cii sha tartor u Sha; kpa hanmô u nana eren sha mi, shi nana tesen nahan kpaa yô, á yila nan er or u vesen sha tartor u Sha.

²⁰Gadia M ngu kaan ne Mer, saa di perapera wen una hemba u mbangeren man Mbafarishi la, gayô, nyôron yen sha tartor u Sha mayange ga.

²¹Ne ungwa i kaa a mbayiase er: De woo or ga, man anti or u nana wua or yô, nana kuma u á ôr nan ijir.

²²Kpa Mo yô, M kaan ne Mer: Hanma or u nana yuwe a anngô u nan yô, nan kuma u á ôr nan ijir ve; man shi hanma or u nana kaa a anngô u nan er, Raka, yô, nan kuma u á ôr nan ijir sha ijirtamen ve; man shi hanma or u nana kaa er, we, ibumeor, yô, nan kuma mtsaha u ken gehena u yeghen usu la ve.

²³Nahan yô, aluer wea va a iwua you u va nan sha atse a nanden nagh sha mi la, man wea umbur her er kwagh a zua anngôu a we yô,

²⁴undu iwua you her hen kpe atseegh la, za vande himen a anngôu la, man ú hide, ú va na iwua you ye.

²⁵De num a or u yilan we ijir la fese, zum u wea lu vea na sha gbenda je yô; sha u or u yilan we ijir la a̱ de za naan we sha ikev i orjir man orjir la a̱ geman we a̱ naan sha ikev i dugwer er a̱ gbihi u ken gaadi ga.

²⁶Mimi je M kaan we, mayange ú due ker ga, saa ú kimbi, anini môm tsô kpaa una kera shi ga.

²⁷Ne ungwa er i kaa er: De eren idya ga.

²⁸Kpa Mo yô, M kaan ne ner hanma or u nana kenger kwase sha u nana tôm un yô, nan er idya a na ken ishima je ve.

²⁹Man aluer ishe you i ken iyan ia na u anzughul yô, dugh i, ta kera; gadia á lu u guda u ilyeegh you i môm ki saa a u ma i gbihi iyol you jimin ken gehena la.

³⁰Man shi aluer uwegh ough ku yanegh kua na u anzughul yô, tôndo ku, ta kera, gadia á lu u guda u ilyeegh you i môm ki saa, a u iyol you jimin ma i nyer ken gehena la.

³¹Man shi i kaa kpaa er, hanma or u nana pav a kwase u nan yô, nana̱ na un takerada u mpav.

³²Mo yô, M kaan ne Mer: Hanma or u nana pav a kwase u nan, á lu sha ityôikaa i idya ga yô, nan ngu nan un sha u a̱ hingir idyakwase; man shi hanma or u nana er un u i pav a na la yô, nan kpaa nan er idya je ve.

³³Man shi ne ungwa i kaa a mbayiase er: De bumun sha aie ga, kpa er sha abumun a ou a u bum a Ter la vough.

³⁴Kpa Mo yô, M kaan ne Mer: De bumun nen mayange ga: shin Sha ga, gadia ka ikônough ki Aôndo ki torough je;

³⁵shin tar kpaa ga, gadia ka kwagh Na u pendan angahar sha mi je la; shin Yerusalem kpaa ga, gadia ka gar u Zegetor je;

³⁶man shi de bumun sha ityough you kpaa ga, gadia gwarce môm tsô kpaa u fatyô u geman un hingir u pupuu shin u il ga.

³⁷Kpa kwaghôron wen yô, “Een” wen a̱ lu “een” heregh, man “ei” wen kpaa, a̱ lu “ei” heregh. Kwagh u una seer sha mban yô, ka u a dugh ken ifer je la.

³⁸Ne ungwa i kaa er: Ishe sha ishe, inyigh sha inyi;

³⁹kpa Mo yô, M kaan ne Mer: De hendan nen a or u ifer ga; kpa hanma or u nana ta u sambe sha hengegh ku yanegh yô, gema nan kugenegh kpaa.

⁴⁰Man aluer a lu or ka za yilan we ijir ngohol we riga yô, de nan nana̱ tôô ikondo you i cirin iyol kpaa.

⁴¹Man shi hanma or u nana kighir we er u̱ zende mail môm yô, za a nan zan zan uhar je.

⁴²Or a sôn u kwagh yô, na nan, man a sar or ka pwaren kwagh her a we kpaa, de geman nan ijime ga.

⁴³Ne ungwa i kaa er: Doo a or u nan we ndor a we yô, gema kôr orihom wou ihom.

⁴⁴Kpa Mo yô, M kaan ne Mer: Doo nen a mbaihomov enev, man shi eren nen msen sha ci u mba ve tev ne a ican yô;

⁴⁵sha er né lu ônov mba Ter wen u A lu Sha yô, gadia ka A er iyange Na i̱ due i̱ ta sha mbaaferev kua mbamimi kpaa, man ka A nôô ura sha mbaperapera man mba ve lu mba perapera ga kpaa.

⁴⁶Gadia aluer ka mba ne doo ve ishima la tsô vea doo ne ishima yô, ka nyi injar ne lu a mini? Mbangoholkpandegh kpaa kape ve eren je la gaa?

⁴⁷Man aluer nea sughun anmgbianev enev tseegh yô, ka nyi ne eren i hemban mbagenev a mini? Atôatyev kpaa kape a eren je la gaa?

⁴⁸Nahan yô, lu nen vough er Ter wen u Sha A lu vough nahan.