Read tiv Marku 10 Bible Online

Marku 10 - tiv bible

Marku 10

¹A mough keela A va ken tar u Yudia man shi yande Yordan; ikpelaior kpishi shi zua her a Na; A shi A gba tesen ve sha ieren Na.

²Mbafarishi kpaa va her a Na, va pine Un er: I rumun er or nana̱ pav a kwase u nana? Ve lu karen Un a kar.

³Kpa a A gema A pine ve er: Mose lu wa ne tindi nana?

⁴Ve kaa er: Mose yô, rumun er i̱ nger takerada u ivaa i paven, paven a nan je.

⁵Kpa Yesu kaa a ve er: Ka sha ci u asema a en a cighir man a nger ne tindi ne nahan ye.

⁶Kpa sha mhii u igbetar je yô, lu nom man kwase A gba ve ye.

⁷Ka sha ci u nahan man nomsoor nana undu ter u nan man ngô u nan, nana var hen kwase u nan;

⁸ve uhar cii vea hingir iyôgh i môm ye; nahan yô, kera mba uhar ga, kpa mba iyôgh i môm je.

⁹Kwagh u Aôndo je zua yô, or a̱ de kera paven un ga.

¹⁰Ken iyou yô, mbahenen shi pine Un sha kwagh shon ne.

¹¹A kaa a ve er: Hanma or u nana pav a kwase u nan, nana gema á er ugen yô, ka idya je nan er a na ye.

¹²Man shi kwase kpaa, aluer nana pav a nom u nan, nana za er ugen yô, ka idya je nan er ye.

¹³Tsô ve va a mbayev mba kiriki her a Na sha u A̱ bende ve ave, kpa mbahenen zôhô a ve.

¹⁴Tsô Yesu nengen nahan yô, ishima vihi Un, A kaa a ve er: De nen mbayev mba kiriki, ve̱ va her a Mo; de kera yangen nen ve ga, gadia ka anza a mban ne je tartor u lu u ve ye.

¹⁵Mimi je, M kaan ne ne, hanma or u nana rumun tartor u Aôndo er wanye u kiriki nahan ga yô, mayange je nana nyôr ker ga.

¹⁶Tsô A kuve ve, shi A penda ve ave sha ityou kpaa, A ver ve doo doo.

¹⁷Dugh ngur yemen sha gbenda yô, orgen va ayem, va gure inya sha ishigh Nagh, pine Un er: Ortesen u dedoo, me er nan man me zua a uma u tsôrono?

¹⁸Yesu kaa a na er: Er nan man u yerem wer Or u dedoo? Or u dedoo ngu ga, saa Aôndo tseegh.

¹⁹U fa atindi kaa er: De woo or ga; de eren idya ga; de iin ga; de we or aie iyol ga; de tsughun or ga; civir teru man ngôu.

²⁰Kpa a gema a kaa a Na er: Ortesen, m kura angan cii er m lu iyev je.

²¹Yesu gem kenger un yô, a doo Un ishima, a kaa a na er: Kwagh shi u môm tsô; za, za tôô akaa a u lu a mi la cii, tee, na mbaatsanev, nahan wea lu a kwagh u injaa Sha; yô, va dondo sha a Mo.

²²Kpa iyol kpe un sha mkaanem mara, a yem a ishima i vihin, gadia lu a inyaregh kpishi.

²³Yesu jingi yô, kaa a mbahenen Nav er: Ka ican tsô, u mba ve lu a inyaregh kpishi vea nyôr sha tartor u Aôndo.

²⁴Cier mbahenen Nav iyol sha kwaghôron Na la. Kpa Yesu shi kimbir kaan a ve er: Mbayev, u nyôron sha tartor u Aôndo ka ican tsô.

²⁵U ornyar a̱ nyôr sha tartor u Aôndo yô, guda u rakumi á kar hen ihura i anura.

²⁶Shi kpiligh ve iyol, je gande u ôron; ve kaa ayol a ve er: Tsô, ka an je man á yima nana?

²⁷Kpa Yesu kenger ve, kaa er: Hen ior yô, kwagh ne a fatyô ga, kpa her Aôndo yô, ka nahan ga; gadia her Aôndo yô, akaa cii á fatyô.

²⁸Tsô Peteru gba kaan a Na er: Yô, nenge, se se undu akaa cii, se dondo U.

²⁹Yesu gema kaa er: Mimi je, M kaan ne ne, or ngu u nana undu ya, shin anmgbianev mba nomso, shin anmgbianev mba kasev, shin ngô, shin ter, shin ônov, shin ishule sha ci Wam man Loho u Dedoo ne,

³⁰man nana de ngohol mtsera kwa akunduataan hegen hen shighe ne ga: uya man anmgbianev mba nomso man anmgbianev mba kasev man ungô man ônov man ishule a mbamtev mba sha atsan kpaa, man ken ayange a ken hemen, nana ngohol uma u tsôron.

³¹Kpa mba ve lu mbahiihii kpishi vea hingir mbamasetyô, mbamasetyô di vea gema á lu mbahiihii.

³²Ve lu sha gbenda u zan sha Yerusalem, yô, Yesu kar lu zan ve sha hemen, lu cier ve iyol; mba ve lu van ken ijime yô, ve lu cian. A shi A kohol ve mba pue kar uhar, A gba ôron ve akaa a á va er Un la.

³³A kaa er: Nenge, se mba kôndon zan sha Yerusalem; á za na Wan u or sha ikev i upristi mba tamen man mbangeren, vea ôr Un ijir i kuugh, vea na Un sha ikev i atôatyev;

³⁴vea naha Un tar, vea gbidye Un akpa, vea haa Un azer iyol, vea wua Un kpaa; sha iyange i sha utar la, Una nder shin ku.

³⁵Tsô Yakobu man Yohane, ônov mba Sebedeu, kporom her a Na, ve gba kaan a Na er: Ortesen, sar se ka ma U er se nyi ityôkwagh i se sôn U yô.

³⁶A pine ve er: Ka nyi i lu ne pe M̱ er ne?

³⁷Ve kaa a Na er: Rumun se, se̱ tema a We, u môm ken uwegh Ough ku yanegh, u môm ken uwegh Ough ku imesegh, sha iengem You.

³⁸Kpa Yesu kaa a ve er: Ne fa kwagh u ne sen ga. Ne fatyô u man iyongo i M me nee? Shin á er ne batisema sha batisema u i eren Mo ne?

³⁹Ve kaa a Na er: Se fatyô. Kpa Yesu kaa a ve er: Iyongo i M me ne, né ma, batisema u i eren Mo ne, ne kpaa á er ne un,

⁴⁰kpa u teman ken uwegh Agh ku yanegh shin ku imesegh yô, ka kwagh Wam er Me na kera ga; kpa ka sha ci u mba i ser ijiir la sha ci ve yô.

⁴¹Er mba pue mbala ungwa nahan, asema gba vihin ve a Yakobu man Yohane.

⁴²Kpa Yesu yila ve her a Na, A kaa a ve er: Ne fa er mba i ver ve sha u ve̱ lu utor sha atôatyev yô, ka ve manger sha a ve, mbatamen vev kpaa ve eren tahav sha a ve yô.

⁴³Kpa her a ven yô, ka nahan ga; kpa hanmô u i sar nan pe lun u vesen ken a ven yô, nana̱ hingir wanakiriki wen.

⁴⁴Man shi hanmô u i sar nan pe lun u hiihii ken a ven yô, nana̱ hingir wanakiriki u mbagenev cii.

⁴⁵Gadia Wan u or kpaa va sha u i̱ er Un tom ga kpa ka sha ci u Una er, man sha u Una na uma Na a̱ hingir ipaan sha ci u ior kpishi.

⁴⁶Tsô ve va ken Yeriko. Ngur duen ken Yeriko, Un kua mbahenen Nav man ikpelaior kpishi yô, orsônonkwagh u a lu orapirashe, iti na er Bartimeu, wan u Timeu, tema hen kpegbenda.

⁴⁷Ongo er i lu Yesu or u Nasareti yô, a gba genger imo kaan er: Yesu, Wan u Davidi, zungwem mhôônom.

⁴⁸Ior kpishi yange un er, a̱ de ayôôso; kpa a seer a seer genger imo taver taver er: We, Wan u Davidi zungwem mhôônom.

⁴⁹Tsô Yesu tile, kaa er: Yila nen un. Ve yila orapirashe la, ve kaa a na er: Taver ishima, mough sha, ngu yilan we.

⁵⁰Un kpaa, te riga na kera yô, a mough fese, a va hen Yesu.

⁵¹Yesu gema kaa a Na er: Ka nyi i̱ sar u, u ma M er uwe? Orapirashe la kaa a Na er: Ortesen, ma m nenge kera.

⁵²Yesu kaa a na er: Yem tsô, jighjigh wou u nan war u ve. Fese nahan a hingir u nengen kera, a dondo sha a Na sha gbenda.