Read tiv Marku 13 Bible Online

Marku 13 - tiv bible

Marku 13

¹Tsô ngur duen ken tempel yô, ugen ken mbahenen Nav kaa a Na er: Ortesen, nenge ambaawen ne man shi ambaayou ne!

²Yesu kaa a na er: U nenge uzegembaayoughouv mban kpa? Iwen i môm tsô kpaa i á de i i̱ lu sha igen ngi ga, á yôhôl a ca ca.

³Za tem sha uwo u Olev yô, tempel lu Un sha hemen, tsô Peteru man Yakobu man Yohane man Anderia va pine Un ken myer er:

⁴Kera kaa ase se yôô, ka hanma shighe man akaa ne aa ere? man ka nyi ia lu ikav, zum u á kuma u akaa ne aa ere?

⁵Tsô Yesu gba kaan a ve er: Ver nen ishima, ma or nana̱ de tsughun ne ga.

⁶Gadia ior kpishi vea va ken iti Yam, vea kaan er: Ka mo, Un je ne! Vea tsugh ior kpishi.

⁷Man shi zum u nea ungwa kwagh u utya man igwa i utya kpaa yô, ishima i̱ de nyian ne ga, akaa ne aa er keng, kpa mkur una lu a kuma ga.

⁸Gadia ikurior igen ia mough num a ikurior igen, tartor ugen ua mough num a tartor ugen; ityartenger ia lu sha ajiir kposo kposo, ijen ia gba kpaa, akaa ne ka a ka mhii u ican tsô.

⁹Kpa ne yô, ver nen asema sha ayol a en, gadia vea na ne ken mbamkohol mba mbaajiriv, man ken ushinagoge, á gbidye ne; né tile sha ishigh ki ugomna man utor sha ci Wam, sha u i̱ lu ve shiada yô.

¹⁰Kpa á vande ôron akuraior cii Loho u Dedoo ne keng.

¹¹Kpa zum u vea za a ven sha u ôron ne ijir yô, asema a̱ de vanden nyian ne sha kwagh u né za ôr ga. Kpa kwagh u á na ne hen shighe la yô, ka un je né ôr ye; gadia ka ne né ôr kwagh ga, kpa ka Icighan Jijingi je.

¹²Or nana na anngô u nan ken ku je; ter kpaa una na wan na; ônov kpaa vea mough num a mbamaren vev, vea wua ve.

¹³Ior cii vea kôr ne ihom sha ci u iti Yam. Kpa or u nana taver ishima zan zan mkur yô, ka nan je á yima nan ye.

¹⁴Kpa zum u nea nenge kwaghndôhôrshima u nan mtim la una tile hen ijiir i i doo u ma a til ga yô,—or u ôron kwaghngeren ne nana̱ kav—zum la, mba ve lu ken Yudia, ve̱ nyôngoso ve̱ yem sha iwo.

¹⁵U nan lu sha tor kpaa, nana̱ de hongo nana̱ nyôron ken iyou i nan sha u nana̱ tôô kwagh ga.

¹⁶U nan lu ken ityev kpaa, nana̱ de hidi sha u nana tôô riga u nan ga.

¹⁷Kasev mba lun iyav man shi mbalun a ônov ikum sha ayange la yô, kwagh á tser ve.

¹⁸Er nen msen, kwagh ne a̱ de lu sha shighe u fam ga.

¹⁹Gadia sha ayange la, ican ia lu, imbacan i hii er Aôndo gba tar je zan zan ainge ne i lu a vande eren nahan ga yô, mayange ia kera shi er nahan kpaa ga.

²⁰Ka er Ter A pande ayange la kera, gayô, ma i yom ma or ga; kpa sha ci u uicuwanmbaiorov mba A tsough ve yô, á pande ayange la kera.

²¹Hen shighe la, aluer ma or nana kaa a ven er: Nenge, Kristu ngun, shin ngula keela la, de ne nen jighjigh ga.

²²Gadia Ukristu mba aiev man uprofeti mba aiev kpaa vea mough vea er uivande man akaa a kpilighyol, sha u vea tsugh uicuwanmbaiorov aluer vea fatyô yô.

²³Kpa ne yô, ver nen ishima. Nenge, M tsengaôron ne akaa ne cii, er shighe u a, a lu a kuma ga yô.

²⁴Kpa sha ayange la, ken masejime u ican la, iyange ia wa ime, uwer kpaa ua kera wanger ga.

²⁵Asan aa osough sha kwavaôndo, man agee a a sha kwavaôndo la aa tenger.

²⁶Hen shighe la, á nenge Wan u or Una va sha abeen, a agee a vesen kua iengem.

²⁷Hen shighe la, Una tindi mbatyomov Nav vea kohol uicuwanmbaiorov Nav sha ahumbe a sha avegher anyiin la, hii shin ikighir i tar zan zan á ar sha ikighir i Sha.

²⁸Hen nen injakwagh ne sha kon u tur. Zum u gbaa na ka una leghem una hôm ika yô, ne fa je ner, wangernyom mgbôghom ve.

²⁹Kape ne kpaa, zum u né nenge akaa ne aa eren yô, fa nen ner, a mgbôghom ve, a nangem sha hunda je.

³⁰Mimi je M kaan ne ne, kov ne ua lu a kar kera ga, saa akaa ne cii aa er ve.

³¹Sha man tar vea kar kera, kpa akaaôron a Am yô, aa kar kera ga.

³²Kpa iyange la man ihwa la yô, ma or fa ga, shin mbatyomov mba Shaav shin Wan kpaa ga, saa Ter tseegh.

³³Ver nen ishima, kuran nen, gadia ne fa zum u shighe la una kuma ga.

³⁴Ka er or u nan yem zende, nan undu ya u nan kera, nan na mbatomov mba nan tahav, hanmô sha tom u nan, shi nan wa orhunda kwagh er a̱ kuran.

³⁵Nahan yô, kuran nen, gadia ne fa shighe u Orya Una va ga, shin a lu aikigheou, shin a lu atôghatô u utuou, shin a lu sha ikeghtôngonou, shin a lu pepeou,

³⁶yô, A̱ de kera va bulun ne a bul A̱ kohol ne mnya ga.

³⁷Kwagh u M kaan ne ne, M ngu kaan ior cii Mer: Kuran nen.