Read tiv Marku 14 Bible Online

Marku 14 - tiv bible

Marku 14

¹Tsô ka shin ayange ahar a iniongo i Paseka kua i bredi u i we kwa sha mi ga la, ia kuma yô, upristi mba tamen man mbangeren gba keren ian i vea kôr Un sha atseregh, vea wua Un.

²Gadia ve kaa er: I̱ de lu sha shighe u iniongo ga, sha er ikpelaior i̱ de moughon ayôôso ga yô.

³Zum u A lu ken Betani ken ya u Shimon, orimande, tem ngur yan kwagh yô, kwase ugen va a tumugh ku alabasetu u mkurem ma nardu jim, ma sha inyaregh kpishi, a hembe tumugh kura a haa Un mkurem mara sha ityou.

⁴Kpa mbagenev asema vihi ve, ve kaa er: Inja na nan man i vihi mkurem man nahana?

⁵Gadia mkurem man kuma u ma i tee ma, ma i yam inyaregh ma i hembe sule deri utar je, ma i ne mbaatsanev; ishima vihi ve a na kpishi.

⁶Kpa Yesu kaa er: De nen un; ka nyi ne ze un iyolo? A erem kwagh u dedoo.

⁷Gadia ne mba a mbaatsanev a ven imôngo gbem, hanma shighe u i sar ne cii kpaa ne fatyô u eren a ve dedoo; kpa Mo yô, né lu a Mo gbem ga.

⁸A er kwagh u a fetyô yô; a hira shighe iyol Yam sha ci u m-ii Wam.

⁹Mimi je M kaan ne ne, hanma ijiir i á ôr Loho u Dedoo ne sha won cii yô, kwagh u a er ne kpaa, á ter sha ci umbur un.

¹⁰Tsô Yuda Isekarioti, u a lu u môm ken mba pue kar uhar la, za hen upristi mba tamen sha u una za na Un sha ikev ve yô.

¹¹Ve kpaa, mba ongo nahan yô, doo ve, man ve tôndo zwa a na er vea na un inyaregh. Wen kpaa, a ker ian i dedoo i una na Un sha ikev ve yô.

¹²Sha iyange i hiihii i ayange a bredi u i we kwa sha mi ga la, shighe u ka i sôngo Paseka nahan, mbahenen Nav pine Un er: Ka hanma ijiir i sar U pe se̱ za, se̱ za sôr, Ú za ya Paseka here?

¹³Tsô A tindi uhar ken mbahenen Nav, A kaa a ve er: Za nen ken gar, tsô or nana va kohol ne, nan tôô ityegh ki mngeregh, yô, dondon nen sha a nan.

¹⁴Ape nana za nyôr la yô, kaa nen a orya la ner: Ortesen kaa er: Iyou i Me ya Paseka a mbahenen Av yô, ngi hana?

¹⁵Tsô una tese ne kpoyou u vesen u sha, a ikav kimi cii; yô, maa sôr nen sha ci wase heregh.

¹⁶Mbahenen mbala za za nyôr ken gar la, za kohol er A kaa ve nahan, tsô ve sôr Paseka.

¹⁷Iyange i been yô, A va a mba pue kar uhar mbala.

¹⁸Tsô mba tem, mba ngur yan kwagh yô, Yesu kaa er: Mimi je, M kaan ne ne, u môm ken ven una nenge mker sha a Mo, ka u nan lu yan kwagh a Mo je.

¹⁹Asema gba vihin ve, ve gba pinen Un môm môm er: Ka mo shinii?

²⁰A kaa a ve er: Ka u môm ken mba pue kar uhar mban je, u a lu zan uwegh a Mo shin gbande imôngo ne.

²¹Gadia Wan u or ngu zan er i nger sha a Na yô; kpa kwagh á tser or u nan nengen mker sha Wan u or la, ka u ma i mar nan ga la ma i lu nan guda ye.

²²Tsô mba ngur yan yô, a tôô bredi, A sôn iveren i dedoo sha mi A coon, A na ve, A kaa er: Ngohol nen, ngun ka iyol Yam je ne.

²³Shi A tôô iyongo, sughun yô, A na ve; ve cii ve ma shimi.

²⁴A kaa a va er: Ka awambe Am a ikuryan i he je ne, a i hee a sha ci u ior kpishi.

²⁵Mimi je M kaan ne ne, mayange me kera ma zar u atam a kon u wain ne ga, zan zan iyange i Me ma u hegh sha tartor u Aôndo.

²⁶Mba we icam kera yô, ve due, ve za sha uwo u Olev.

²⁷Tsô Yesu kaa a ve er: Ne cii, á na ne anzughul sha kwagh Wam; gadia i nger er: Me gbidye orkuranilev, ilev cii mbia sambe.

²⁸Kpa Me nderen shin ku kera yô, Me hemen a ven u zan sha Galilia.

²⁹Kpa Peteru kaa a Na er: Shin á lu ve cii á na ve anzughul kpaa, mo yô, ze.

³⁰Yesu kaa a na er: Mimi je M kaan we ne, nyian hen tugh mbun, er ikegh ia lu a tôngo kwa har ga je tsô, ú nyiman kwa tar wer, u fam ga.

³¹Kpa a shi a seer suwen er: A lu u m̱ kpe a We imôngo keng kpaa, me nyiman We ga. Kape ve cii kpaa ve kaa la.

³²Tsô ve va hen ijiir igen i i yer er Gesemane la; A kaa a mbahenen Nav er: Hira tema nen heen M̱ za er msen.

³³Tsô A mough a Peteru man Yakobu man Yohane, gba cier Un iyol kpishi, lu yan ican ken ishima kpaa.

³⁴Tsô A kaa a ve er: Ishima vihim tsung je ar ken ku; tema nen heen, kura nen.

³⁵Tsô kporom sha hemen kpeghee yô, A gba hen inya, A er msen er, a fetyô yô, shighe la ma a kar Un kera.

³⁶A kaa er: Aba, Tere! Akaa cii U fa a ityô; tôôm iyongo ne kera, nahan kpaa i̱ de eren sha ishima Yam ga, kpa i̱ er sha ishima You.

³⁷Tsô A va, A va kohol ve ve lu yaven; A kaa a Peteru er: Shimon, u ngu yavena? Ihwa i môm tsô kpaa u fatyô u kuran gaa?

³⁸Kuran nen, eren nen msen, sha er né gba ken imeen ga yô; mimi je, jijingi yô, rumun, kpa iyol yô, ngi a agee ga.

³⁹A shi A yem a za er msen, A kimbir mkaanem ma ashen la.

⁴⁰A shi A hide, A va kohol ve, ve lu yaven, gadia ashe yuhwa ve ikôr; ve kera fa kwagh u vea kaa Un ga.

⁴¹A shi A va mve u sha kwa tar la, A kaa a ve er: Gba yaven nen hegen tsô, mem nen. Kuma ve; shighe va ve; nenge, mba nan Wan u or sha ikev i mbaasorabo.

⁴²Mough nen sha, se yem nen. Nenge, u a nengen mker sha a Mo la, mgbôghom.

⁴³Tsô fese je, er lu ôron ave nahan yô, Yuda, u môm ken mba pue kar uhar mbala za va, ikpelaior kpishi lu a na ityô a usanker man agudô, ve due hen upristi mba tamen man mbangeren kua mbatamen.

⁴⁴Un u a lu nengen mker sha a Na la vande tesen ve ikav, kaa er: U me suse Un zwa la yô, ka Un je la, kôr nen Un, yem nen a mi doo doo.

⁴⁵Va ar heregh yô, fese je a va her a Na, a kaa a Na er: Ortesen! Tsô a gba susen Un zwa.

⁴⁶Maa ve shile sha a Na, ve kôr Un.

⁴⁷Tsô u môm ken mba ve tile her la, tsuwa sanker na, gber wanakiriki u zegepristi, bugh un togh.

⁴⁸Yesu gema kaa a ve er: Ne due a usanker man agudô sha u va kôron Mo, bee er ka or u numun gbenda yôô?

⁴⁹M luun a ven ken tempel ayange ayange, M tesen, kpa ne kôrom ga; kpa ka u icighanruamabera a̱ kure sha mi vough.

⁵⁰Ve cii, ve undu Un ve yevese.

⁵¹Wanyekwaor ugen dondo Un ijime cir ikondo iyol, kpa lu ker idyelegh; tsô ve kôr un,

⁵²kpa a undu ikondo la, a yevese idyelegh.

⁵³Tsô ve za a Yesu hen zegepristi. Mbatesen mba tamen cii man mbatamen kua mbangeren kpaa, ve kohol imôngo.

⁵⁴Kpa Peteru lu dondon Un ken ica zan zan ken atô u tembe u zegepristi la, za tema a udugwer imôngo, gba ôson usu.

⁵⁵Upristi mba tamen man mkohol la cii, gba keren ityôkwagh sha Yesu, sha u vea wua Un yô, kpa ve zua a min ga.

⁵⁶Gadia ior kpishi wa Un aie iyol, kpa ushiada vev mbala ve lu zwa môm ga.

⁵⁷Mbagenev shi mough gba wan Un aie iyol kaan er:

⁵⁸Se ungwa A kaa er: Me hembe tempel u i maa un sha ave ne, ayange atar Me shi Me maa ugen u a lu sha ave ga yô.

⁵⁹Nahan kpaa shiada ve lu zwa môm ga.

⁶⁰Tsô zegepristi mough tile her atô, pine Yesu er: U shi bughun zwa sha kwagh môm je gaa? Ka nyi kwagh man mban ve eren shiada sha a We nahana?

⁶¹Kpa A huan ving, A bugh zwa sha ma kwagh ga. Zegepristi shi pine Un, kaa a Na er: Ka We, U lu Kristu, Wan u Un u i wuese Un la yee?

⁶²Yesu kaa er: Ka Mo Un je ne; man né nenge Wan u or, Una tema ken uwegh ku yanegh ku Ageegh la, Una va a abeen a sha kwavaôndo imôngo.

⁶³Tsô zegepristi ande akondo a na, kaa er: Ka nyi shi i gbe se a mbashiada?

⁶⁴Ne ungwa ityuhwanev mbin ve; yô, ne nenge nana? Ve cii ve na un ibo er, A kuma ku.

⁶⁵Mbagenev hii u tan Un azer, ve yisa Un ishigh, ve ta Un azu, ve kaa a Na er: Tsenga ase ôron! Udugwer kpaa ve ta Un sambe.

⁶⁶Yô, Peteru lu ken won ken tembe; tsô wankwase ugen u ken mba ve eren zegepristi tom la, va.

⁶⁷Nengen er Peteru a tem a lu ôson usu, nahan yô, a kenger un, a kaa er: We kpaa, u lu a Yesu Ornasareti ne imôngo.

⁶⁸Kpa a tuna a kaa er: M fa kwagh u u er ne ga, kaven tsô kpaa m kav ga. Tsô a due sha puadwer.

⁶⁹Wankwase la shi nengen a na yô, a shi a gba kaan a mba ve tile her la er: Ngun kpaa ka u ken ve.

⁷⁰Kpa a shi a tuna. Ka tem dôghôô yô, mba ve tile her la, ve shi ve kaa a Peteru er: Mimi je, we kpaa, u ngu ken ve, gadia u ngu or u Galilia je.

⁷¹Kpa a gba tuhwan, bumun kpaa er: Mayange m fa Or u ne teren Un ne ga.

⁷²Fese nahan ikegh maa tôngo i sha kwa har la; tsô Peteru umbur mkaanem ma Yesu kaa un er: Ikegh ia lu a tôngo kwa har ga, tsô ú nyiman kwa tar je wer, u fam ga. Umbur nahan yô, a gba vaan.