Read tiv Marku 6 Bible Online

Marku 6 - tiv bible

Marku 6

¹A mough keela, A kar A va ken gar na; mbahenen Nav kpaa cir Un ijime.

²Iyange i memen kom yô. A gba tesen ken shinagoge; ior kpishi mba ve lu ungwan Un yô, kpiligh ve iyol, ve kaa er: Ka han je Or ne A zough a akaa ne; man shi ka nyi mfe i ne Or ne, er ambaaeren a ageegh ne a dugh sha ikev Na nahana?

³Ngun kera ka orgbanakaa, Wan u Maria ne gaa, ka anngô u Yakobu man Yose man Yuda man Shimon kpaa gaa, anngôôv Nav mba kasev kpaa mba a vese imôngo gaa? Nahan anzughul lu ve ken ishima sha kwagh Na.

⁴Tsô Yesu kaa a ve er: Profeti de lun a icivir ga, saa ken gar u nan man hen ityô i nan man hen ya u nan tsô.

⁵Nahan A kera soo u eren ma kwagh u ageegh keregh ga, saa di u pendan ave sha mbauangev kpeghee, waren ve la, tsô.

⁶Kpiligh Un iyol a mban u jighjigh ve u nan.

⁷Tsô A yila mba pue kar uhar, A gba tindin ve uhar uhar, A na ve tahav sha ujijingi mba hôngorouv.

⁸A ta ve icin er ve̱ de tee ma kwagh sha ci u gbenda ga, saa gbough tseegh tsô; kwaghyan ga, ikpa kpaa ga, man inyaregh ken ikpa kpaa ga,

⁹kpa ve̱ lu a akôv shin angahar, ve̱ de hee uriga uhar ga.

¹⁰Man A kaa a ve er: Hanma ijiir i nea za nyôr yô, iyou i ne nyer la, lu nen her zan zan nea kar moughon hen ijiir la kera.

¹¹Hanma ijiir i i rumun ne her ga, shin i ver ato sha kwagh wen kpaa ga yô, mough nen heregh kera, kure nen ihundu i shin angahar a en, i̱ hingir ve mpase.

¹²Tsô ve due, ve ôr ior kwaghaôndo er, ve̱ gema ishima;

¹³ve dugh ujijingi mba bov kpishi, man mbalun dedoo ga kpaa, ve shighe ve mkurem ve war ve kpishi.

¹⁴Tsô tor Herode ungwa gwa Na, gadia iti Na due ken igbar, nahan a kaa er: Ka Yohane u eren batisema a nder shin mbakpenev ye, ka nahan man akaa a ageegh ne a eren ken a na ye.

¹⁵Mbagenev yô, ve kaa er, ka Eliya; man mbagenev yô, er ka profeti di er uprofeti mbagenev nahan.

¹⁶Kpa er Herode ungwa nahan yô, a kaa er: Ka Yohane u iyange m gber un ityough la, ka un je a nder shin ku ye.

¹⁷Gadia lu Herode iyol na je tindi, i kôr Yohane, i kange, i kende un ken gaadi ye, sha ci u kwagh u Herodia kwase u anngô na Filibu la, gadia a ngohol un;

¹⁸kpa Yohane kaa a Herode er: U ngohol anngôu kwase u ngu a mi, nahan ka sha mi ga.

¹⁹Herodia iyol na kpaa hingir iyongo a na, lu un ka wuan un, kpa a fatyô ga,

²⁰gadia Herode lu cian Yohane sha ci u a fa er a lu or u jighjigh man shi icighanor kpaa yô; a kura un doo doo, a ungwa kwaghôron na acin imôngo je, kondo un iyol; nahan kpaa doo un u ungwan un.

²¹Kpa iyange igen ian due, gema lu sha iyange i umbur mmar u Herode la; a er iniongo sha ci u ashagba a na man utormbautyav mba tamen nav man akpamaior a Galilia kpaa.

²²Er wan u Herodia u kwase la nyôr gba vinen amar yô, doo Herode kua mba ve tema iniongo a na imôngo la cii, tsô Herode kaa a iniunkwase la er: Nyi ityôkwagh i i sar u kpaa, kaam, me na u i.

²³Shi a bum a na taveraa kpaa er, nyi ityôkwagh i u sônom kpaa, me na u, shin a lu vegher u tartor wam je kpaa.

²⁴Dugh yô, a za kaa ngô na er: M̱ sôn nyi? A kaa un er, i̱ lu ityough ki Yohane u eren batisema.

²⁵Tsô a za nyôr hen tor, a sôn er: Sarem pe ma u nem ityough ki Yohane u eren batisema shin gbande hegen hegen je.

²⁶Tsô ishima vihi tor kpishi; kpa sha ci u mbum na la, man mba ve tema hen kwaghyan la yô, kera doo un u nyumen un ga.

²⁷Tsô tor tindi orutya ugen ken mbautyav mba ve kor tor la, a kaa un er, a̱ za va a ityough nagh; ngula za za gber un ityough ken gaadi,

²⁸va a ityough nagh shin gbande, va na wankwase la; wankwase la za na ngô na.

²⁹Mbahenen nav mba ongo nahan yô, ve va, ve va tôô gundu na, ve za ii.

³⁰Mbaapostoli hide, va kohol hen Yesu, ôr Un akaa a ve er man a ve tese la cii.

³¹Nahan A kaa a ve er: Va nen, ne tseegh, hen ijiir i or lu ga yô, va mem nen kpeghee; gadia ior kpishi lu van shi hiden yemen, ian i vea ya kwagh tsô kpaa lu ga.

³²Tsô ve nyôr ken tso, ve tseegh, ve yem hen ijiir i or lu ga yô.

³³Ior kpishi nenge ve karen, nahan ve kav ve, ve due ken agar cii, ve hembe ayem, ve vande za aren heregh a Na.

³⁴Er Yesu due ken tso yô, A nenge a ikpelaior kpishi, nahan mhôônom kôr Un a ve sha ci u ve lu er iyôngo i i lu a orkuran i ga yô. Tsô a hii u tesen ve akaa kpishi.

³⁵Iyange i gbe mgbôghom u been yô, mbahenen Nav va her a Na, ve kaa er: Or ngu hen ijiir ne ga, man iyange mgbôghom u been;

³⁶na ve gbenda, ve̱ yem ken uya man agar a a kase hen ne, ve̱ za yam kwaghyan, ve̱ ya.

³⁷Kpa A gema A kaa a ve er: Ne, na nen ve kwagh, ve̱ ya. Kpa ve kaa a Na er: Se̱ za yam bredi sha sule deri uhar, se̱ va na ve, ve̱ ya shinii?

³⁸A pine ve er: Ne mba a ikpenbredi i me? Za, za nenge nen. Mba fe yô, ve kaa er. Ngi itian kua ishu ihiar.

³⁹A kaa er, ve cii, ve̱ tema akum akum sha adeghatoho.

⁴⁰Ve tema sha nongo sha nongo, mbagenev lu iniongo akunduataan akunduataan, mbagenev akunduahargber, akunduahargber.

⁴¹Tsô A tôô ubredi utaan, man ishu ihiar la, kenden ashe sha yô, A sugh, A coon, a na mbahenen er ve̱ gema ve̱ na mbala. Ishu ihiar la kpaa, A kar ve i cii.

⁴²Ve cii ve ya, kuma ve.

⁴³Ve kohol avur, iv akese pue kar ahar, kua avur a ishu la kpaa.

⁴⁴Mba ve ya bredi mbala, nomso lu er dubu utaan nahan.

⁴⁵Fese nahan A tolough a mbahenen Nav er, ve̱ nyôr shin tsô, ve̱ hira hemen, ve̱ per yande u Betesaida, Wen iyol Na yô, Una na ior gbenda ve̱ yem ve.

⁴⁶Ne ve gbenda kera yô, A unde sha uwo sha u za eren msen.

⁴⁷Iyange i mir yô, tso la lu ken atô u zegemnger, Wen gema lu sha tar, Un tswen.

⁴⁸Tsô A nenge ve lu yan ican sha u nahan tso, gadia ahumbe lu van ve sha hemen; nahan A va her a ve sha ahwa atar a utu, lu zenden sha kwavmnger, er Una kar ve sha hemen nahan.

⁴⁹Kpa er ve nenge lu zenden sha kwavmnger nahan yô, lu ve er, ka ormbakuv, tsô ve genger imo taver taver;

⁵⁰gadia ve cii ve nenge a Na, nahan cier ve iyol. Kpa A ôr kwagh a ve, A kaa a ve er: Taver nen ishima, ka Mo, de kera cie nen ga.

⁵¹Nahan A nyôr A kohol ve ken tso; ahumbe maa de. Tsô kunda ve iyol ken asema je gande;

⁵²gadia ve kav kwagh u ubredi la ga, sha ci u asema cighir ve ker yô.

⁵³Mba peren yô, ve ar ken tar u Genesareti, ve zer tso hen kpe.

⁵⁴Mba dugh ken tso yô, fese je ior kav Un.

⁵⁵Nahan ve gba zan ayem ken iningirtar la cii, ve gba tôôn mbalun dedoo ga sha ugambe zan a mi henpe ve ungwa er ngu la.

⁵⁶Man shi hanma ijiir i Una nyôr, shin a lu ken agar a kiriki shin agar a tamen, shin ken uya mba ken ityev kpaa, ve za ver mba ve lu dedoo ga sha ityembekasua, ve zamber a Na er, Una rumun yô, shin a lu mkaikondo Na tsô kpaa, ve̱ bende ave; mba ve bende a Na cii yô, angev bee ve je.