Read tiv Marku 7 Bible Online

Marku 7 - tiv bible

Marku 7

¹Mbafarishi man mbagenev ken mbangeren mba ve due ken Yerusalem va kohol her a Na.

²Tsô ve nenge mbagenev ken mbahenen Nav lu yan kwaghyan a ave a wang ga, inja na yô, ve ôô ga.

³Gadia Mbafarishi man Mbayuda cii ve gbaa yan kwagh ga, saa ve vande ôôn ave keng ve, sha u kuran aeren a mbayiase la.

⁴Man shighe u vea hide kasua kpaa, ve gba yan kwagh ga, saa ve vande ôôn iyol ve. Akaa agen kpishi kpaa i na ve er ve̱ kuran a, er u ôôn ayongo man ityev man agbande a togula nahan.

⁵Tsô Mbafarishi man mbangeren pine Un er: Ka nyi mbahenen Ou ve kor atindi a mbayiase ga, ve ye kwaghyan ave ili?

⁶Kpa A kaa a ve er: Kwagh u Yesaia a tsengaôron sha a ven yô, ka vough je, ne mbaimangerev, er i nger nahan er: Nongoior ne ngu civir Mo sha ityumbuzwaav tseegh, kpa ishima ve yô, ngi ica a Mo je;

⁷nahan ka gbilin tsô, ve gur ve civir Mo ye, sha ci u ityesen i ve tesen la, ka atindi a ior tsô.

⁸Gadia ne mba gbihin tindi u Aôndo, geman kuran aeren a ior.

⁹Shi A kaa a ve er: Mimi je ne mba undun tindi u Aôndo, sha u ne wa aeren a en a mbayiase la iko yô.

¹⁰Gadia Mose lu kaa er: Civir teru man ngôu; man shi: Or u nana tuhwa ter shin ngô yô, nana kpe keng.

¹¹Kpa ne yô, ne mba kaan ner, aluer or nana kaa a ter u nan shin ngô u nan er: Kwagh u ma u zough a iwasen sha mi her a mo yô, ka korban (inja na yô er, ka nagh ku i ne Aôndo yô)

¹²nahan ne kera rumun er nana̱ wase ter shin ngô u nan sha ma kwagh ga.

¹³Kape ne bundu imo i Aôndo jim sha aeren a en a mbayiase a ne ne ior la. Akaa kpishi er angan nahan ne mba eren kpaa.

¹⁴A shi A yila ikpelaior her a Na, A kaa a ve er: Ver nen ato sha a Mo, ne cii, shi kav nen kpaa:

¹⁵Ma kwagh u ken won u una nyôr or ken iyol, u una na nan nana kera lu wang ga yô, ngu ga; kpa ka akaa a a dugh ken or la man a ne nan, nan kera luun wang ga ye. [

¹⁶Aluer or a lu a ato a ungwan yô, nana̱ ungwa.]

¹⁷Undun ikpelaior nyer ken iyou yô, mbahenen Nav pine Un kwagh sha injakwagh la.

¹⁸A kaa a ve er: Ne je kpaa, ne mba a kav gaa? Ma kwagh u ken won u a nyer ken or yô, una fatyô u nan nan nana lu wang ga ze; ne kav nahan gaa?

¹⁹Gadia a nyôr nan ken ishima ga, ka ken uya tsô, una shi á za due ken won. Sha u kaan nahan yô, lu wuese akaayan cii.

²⁰Nahan A kaa er: Ka kwagh u ka a due ken or je, a na nan, nan kera lu wang ga ye.

²¹Gadia ka ken ateghatô ken asema a ior je akaabo a henen, man idya i eren, man iv, man iwooor,

²²man shi ivaa i vihin sha idya, man u tômon akaa, man afer a eren a dang, man icugh, man u kôron iyol tsaha ga, man iwuhe, man angereke, man ityough ki kehen, man ibumegh ve dugh ye.

²³Akaabo ne cii ka kimi a dugh, a ne or nan kera lu wang ga ye.

²⁴Moughon heera yô, A yem ken tar u Tiru. Tsô za nyer ken ya ugen yô, A rumun er or a̱ fa ga; kpa fan ityô u lun myer ga.

²⁵Nahan kwase ugen u wan na u kiriki u kwase lu a jijingi u hôngorough, ongo kwagh Na yô, a va, a va gba hen angahar a Na.

²⁶Lu kwase u ken Mbagrika, ityô na yô, lu Mbashiro-Fenishia. A zamber a Na er, A̱ dugh jijingi u bo ken wan na la kera.

²⁷Kpa A kaa a na er: De, mbayev mba hen ya ve̱ vande yan i̱ kuma ve, gadia doo u tôôn kwaghyan u uôn, kenden aniwaav ga.

²⁸Nahan a gema a kaa a Na er: Een Tere, aniwaav kpaa mba ye avur a akaayan a uôn shin ityô i tebul.

²⁹Tsô A kaa a na er: Sha ci u mkaanem man yô, gba yemen tsô, jijingi u bo due ken wan wou kera ve.

³⁰Tsô er a yem hen ya na yô, a za kohol wan na, a lu yaven sha gambe, jijingi u bo la due kera.

³¹Shi A due ken tar u Tiru, A kar sha Shidon, A va hen zegemnger u Galilia, lu karen ker atô u tar u Dekapoli.

³²Tsô ve va Un a or u kondon ato, u eren ikeghem, ve zamber a Na er, A̱ penda uwegh sha a na.

³³Tsô A kua a na A undu ikpelaior, A yem a na ken huwa, A shindi un ahôaveegh ken ato, A haa ijer, A bende un sha nombor.

³⁴Kenger sha yô, A shil ishima, A kaa a na er: Efata! Inja na yô, er: Bugh!

³⁵Tsô ato na bugh, fese nahan kwagh u a kange un nombor la kpaa sagh kera, a ôr kwagh dedoo.

³⁶A ta ve icin er, ve̱ de ôron ma or ga; kpa er A seer tan ve icin nahan kpaa, ve hemba seer a seer u ôron kwagh la.

³⁷Kpiligh ve iyol je zua ga, ve gba kaan er: A er akaa ca ca cii doo doo je, A er mbakondonato mba ungwan, mbakondonaker kpaa mba lamen.