Read tiv Marku 9 Bible Online

Marku 9 - tiv bible

Marku 9

¹A kaa a ve er: Mimi je, M kaan ne ne, mba ve til heen ne, mbagenev ker ka mba vea kpe mayange ga, saa vea vande nengen tartor u Aôndo ua va sha agee ve.

²Tsô ayange nga kar ataratar yô, Yesu kua a Peteru man Yakobu man Yohane, za unde sha gôgôwo, ve tseegh; tsô i gema iyol Na sha ishiv vev.

³Akondo a Na gema engem, kungu segh segh, er orkilenakondo kungun a u shin tar ne mayange nana fatyô u kungun a nahan ga.

⁴Tsô Eliya vea Mose va ande hen ve, ve gba ôron kwagh a Yesu.

⁵Peteru gema kaa a Yesu er: Ortesen, se mba heen, nahan doo; sar U pe se̱ er atumbe atar, i môm sha ci Wou, i môm sha ci u Mose, i môm di sha ci u Eliya zee?

⁶Gadia a fa kwagh u una kaa ga, sha ci u cier ve iyol yum yô.

⁷Tsô ibeenegh va gba mure sha a ve, imo kpaa due ken ibeenegh kila kaa er: Ngun ka Wan Wam u ishima ishima, ungwan nen Un!

⁸Nahan mba jingi yô, ve kera nenge a ma or ga, saa Yesu tseegh lu a ve ye.

⁹Mba ngur hungwan sha uwo yô, A ta ve icin er ve̱ de ôron ma or kwagh u ve nenge a mi ne ga, saa Wan u or Una nder shin mbakpenev ve.

¹⁰Ve koso mkaanem mara ken asema a ve, ve gba pinen ayol a ve inja i mnder u shin mbakpenev la.

¹¹Tsô ve pine Un er: Inja na nan man mbangeren ve kaan er, saa Eliya una vande van kenge?

¹²A gema a kaa a ve er: Eliya una vande van kpee sha u sôron akaa cii; tsô er nan man i nger kwagh sha Wan u or er, Una ya ican sha akaa kpishi, shi á laha Un kpaa?

¹³Kpa M kaa ne Mer, Eliya va kera ve, ve er un nyi ityôkwagh i i sar ve u eren un yô, er i nger kwagh sha a na la.

¹⁴Ve hen mbahenen yô, A nenge a ikpelaior kpishi kase ve, mbangeren kpaa lu sendegh akaaôron a ve.

¹⁵Ikpelaior la cii, mba nengen a Na yô, kpiligh ve iyol kpishi, ve hembe ayem, ve za sugh Un.

¹⁶Tsô A pine ve er: Ka nyi ne sendegh kwaghôron a mbana?

¹⁷Ugen ken ikpelaior la gema kaa er: Ortesen, m va a wan wam u a lu a jijingi u kondon iker, her a We.

¹⁸Hanma pe ka una kôr un yô, a ta un inya; a mbuwa hugh zwa, a yan anyi, a taver nulôô. M kaa a mbahenen Ou mer, ve̱ dugh un, kpa ve fatyô ga.

¹⁹A gema A kaa a ve er: Kpash, kov u lun a jighjigh u nan ga ne! Mase shin ayange a me je man Me tema a vene? Mase shin ayange a me je man Me wa ishima a vene? Va nen a na her a Mo.

²⁰Tsô ve va a na hen a Na. Nengen a Na yô, jijingi la kende un, a gba inya, a gba viligh iyol inya, mbuwan hugh zwa.

²¹A pine ter na er: Kwagh ne hii un ica i gba nana? A kaa er: A lu wanye je.

²²Acin imôngo ka a gbihi un ken usu man shin mnger kpaa, sha u wuan un. Kpa aluer Wea fatyô u eren ma kwagh yô, zungwe se mhôônom, wase se.

²³Yesu kaa a na er: Aluer wea fatyô yô, akaa cii a kôrcio hen or u nan ne jighjigh la.

²⁴Nahan ter u wan la genger imo, kaa er: M na jighjigh, wasem sha myina u jighjigh wam u nan ne.

²⁵Tsô Yesu nengen ikpelaior i gbe kohol ayem nahan yô, A yange jijingi u hôngorough la A kaa a na er: We, jijingi u kondon iker man u kondon ato ne, M ngu kaan a we, due ken a na kera, mayange de kera shi nyer ken a na ga.

²⁶Er a genger imo, shi a kende un taveraa yô, a due. Wanye la hingir er a kpe nahan; nahan ior mbagenev kpishi kaa er: A kpe ve.

²⁷Kpa Yesu kôr un sha uwe, mough a na sha; wen kpaa a mough a tile sha.

²⁸Tsô nyer ken iyou yô, mbahenen Nav pine Un ken myer er: Ka nyi man se fetyô u dughun un ga?

²⁹A kaa a ve er: Imba ne ka i dugh sha ma kwagh ugen ga, saa sha msen u eren.

³⁰Ve mough heera kera, ve kar ken tar u Galilia; kpa lu Un ka or nana̱ fa ga;

³¹gadia A lu tesen mbahenen Nav kaan a ve er: Á na Wan u or sha ikev i ior, vea wua Un yô, sha iyange isha utar la, Una nder.

³²Ve kav mkaanem mara ga, kpa ve lu cian u pinen Un.

³³Tsô A va ken Kapernahum. Tem hen ya yô, A pine ve er: Ka nyi ashen ne lu ôron sha gbenda laa?

³⁴Kpa ve huan ving; gadia ve lu ôron kwagh sha gbenda er, ka an nan lu orvesene?

³⁵Tsô a tema, A yila ve mba pue kar uhar, A kaa a ve er: Aluer a sar or ka lun orhemen yô, nana̱ hingir u masetyô cii, shi nana̱ eren mbagenev cii tom.

³⁶Tsô A tôô wanye, a ver un her atô ve, A kuve un, A kaa a ve er:

³⁷Hanmô u nana rumun u môm ken imba i mbayev mban ken iti Yam yô, ka Mo je nan rumun ye; man shi hanmô u nan rumun Mo yô, ka Mo nan rumun ga, kpa ka Un u A tindim la.

³⁸Tsô Yohane gema kaa a Na er: Ortesen, se nenge orgen u a dondo sha a vese ga, ngu dughun ujijingi mba bov ken iti You, yô, se yange un sha ci u a dondo sha a vese ga yô.

³⁹Kpa Yesu kaa er: De yangen nen un ga, gadia or u nana er tom u ageegh ken iti Yam man nana gema nana ôr kwagh u vihin sha a Mo fefa yô, nan ngu ga;

⁴⁰gadia u nan lu ihom a vese ga yô, nan ngu nongo a vese.

⁴¹Gadia hanmô u nana na ne iyongomnger ken iti Yam er, ne̱ ma, sha ci u ne lu ior i Kristu yô, mimi je M kaan ne ne, mayange injar i nan ia saa nan je ga.

⁴²Man shi hanmô u nana na u môm ken mbakiriki mban mba ve nem jighjigh ne, gbev mbu nôngon yô, kwagh u a lu nan guda yô, ka u ma i har nan zegenase sha mon ma i kende nan shin zegemnger.

⁴³Man shi aluer uwegh ough kua na u gbev mbu nôngon yô, tôndo ku kera; u ú nyôr ken uma a iwan yô, ka u guda a u lun a ave ahar geman nyôron ken gehena, ken usu u pirin mayange ga la [

⁴⁴ape ijôô ve ia kpe ga, man usu kpaa u pirin mayange ga la.]

⁴⁵Man shi aluer nguhar wou ua na u gbev mbu nôngon yô, tôndo u kera; gadia u ú nyôr ken uma a ikeer yô, ka u guda a u ma u lu a angahar ahar ma i kende u ken gehena [

⁴⁶ape ijôô ve ia kpe ga, man usu kpaa u pirin mayange ga la.]

⁴⁷Man shi aluer ishe you ia na u gbev mbu nôngon yô, dugh i kera; u ú nyôr sha tartor u Aôndo a ishe i môm yô, ka u guda a u ma u lu a ashe ahar ma i kende u ken gehena,

⁴⁸ape ijôô ve ia kpe ga, man usu kpaa u pirin mayange ga la.

⁴⁹Gadia hanma or je, á sôr nan sha usu.

⁵⁰Bar doo, kpa aluer bar una kera nyoho ga yô, ka sha nyi né shi né sôr unu? Lu nen a bar ken a ven je, man lu nen bem bem ayol a en.