Read tiv Luka 10 Bible Online

Luka 10 - tiv bible

Luka 10

¹Ken masejime u akaa ne Ter shi ver mbagenev akunduatargber, tindi ve uhar uhar er, ve̱ hira hemen ve̱ za hen hanma gar man hanma idiôya i i lu Un ka zan her la yô.

²Man A kaa a ve er: Sunda yô, ngee, kpa mbatomov yô, gema mba ciôn tsô; nahan yô, sôn nen Ter u sunda A̱ tindi mbatomov ken sunda Na.

³Gba yemen nen tsô; nenge, M ngu tindin ne er aniyôngov ken atô u ugbaseela nahan yô.

⁴De tee nen asukunyar, shin ikpa, shin akôvangahar kpaa ga; de sughun nen ma or sha gbenda kpaa ga.

⁵Hanma ya u nea nyôr kpaa, vande kaan nen ner: Bem a̱ lu hen ya ne.

⁶Aluer wan u bem una lu her yô, bem wen una lu sha a nan; una lu ga yô, una shi á hire hen a ven.

⁷Tsa nen ken ya la, ya nen shi ma nen akaa a i ne ne yô, gadia ortom kuma injar i nan. De tsaregh nen sha uya uya ga.

⁸Hanma gar u nea nyôr ker, vea rumun ne yô, ya nen akaa a i ne ne.

⁹Waren nen mbauangev mba ve lu kimi la, kaa nen ve ner: Tartor u Aôndo mgbôghom a ven.

¹⁰Kpa hanma gar u nea nyôr kimi, vea rumun ne ga yô, due, za nen ken igbenda na, kaa nen ner:

¹¹Shin ihundu i ken gar wen i i te se angahar kpaa, se mba kuren ne i heregh nahan kpaa fa nen er tartor u Aôndo u mgbôghom yô.

¹²Kpa M ngu kaan ne, sha iyange la yô, guda Sodom a gar la.

¹³We, Korashin kwagh á tser u, we Betesaida, kwagh á tser u. Gadia a lu ken Tiru man Shidon man a er akaa ageegh a i er ken a ven nahan ne yô, ma ve zamber ngise je, ma ve te ajav iyol kua mtwem.

¹⁴Kpa sha ijir yô, guda Tiru man Shidon a ven.

¹⁵Man we, Kapernahum, á kende u sha aôndo jeo? Ka shin Hade je ú za ye.

¹⁶U nan ongo ne yô, nan ngu ungwan Mo; u nan vende ne yô, nan ngu vendan Mo; man u nan vendem yô, ka u A tindim la je, nan vende ye.

¹⁷Tsô mba akunduatargber mbala hide a iember, gba kaan er: Tere, ujijingi mba bov je kpaa hingir sha ikev yase ken iti You.

¹⁸A kaa a ve er: M nenge Satan sen sha aôndo, gba er inyiar nahan.

¹⁹Nenge M na ne tahav mbu ne ndyar iyô man ayese, man shi tahav mbu sha agee a orihom cii, ma kwagh una vihi ne je ga.

²⁰Kpa de ember nen er ujijingi ve lu sha ikev yen ga, kpa ember nen er i nger ati a en Sha yô.

²¹Hen shighe la A ember ken Icighan Jijingi, A kaa er: M ngu sughun We, Tere, Ter u Sha man tar, sha er U yer mbafankwagh man mbakavenkwagh akaa ne, kpa U gem U pase anikundanev a yô; een Tere! kape i doo U ken ishima je la.

²²Akaa cii Ter gema a wam sha ikev; man shi ma or fa Wan ga, saa Ter tseegh; man shi ma or fa Ter kpaa ga, saa Wan, man shi hanmô u Wan A we ishima u pasen nan yô.

²³Tsô A gema ken mbahenen Nav A ôr kwagh a ve tseegh A kaa er: Ashe a a nengen akaa a ne nenge ne yô, saan a iyol.

²⁴Gadia M kaan ne, uprofeti man utor kpishi lu ve pe ma ve nenge akaa a ne nenge ne, kpa ve nenge a mi ga; man shi ma ve ongo akaa a ne ongo ne, kpa ve ungwa a ga.

²⁵Tsô orfanatindi ugen mough, tile sha, gba karen Un, kaan er: Ortesen, me er nan man me zua a uma u tsôrono?

²⁶A kaa a na er: I nger ken atindi nana? Ka u ôr nana?

²⁷A gema a kaa er: Ter Aôndo, A̱ doo u ishima a ishima you cii man a uma wou cii man a agee ou cii man a mfe wou cii, man or u nan we ndor a we kpaa, nana̱ doo u ishima er we iyol you nahan.

²⁸A kaa a na er: U kaa vough; er nahan, tsô ú lu uma.

²⁹Kpa er lu un pe keren ishô iyol na yô, a kaa a Yesu er: Man ka an nan lu orwan ndor a mo?

³⁰Yesu gema kaa er: Orgen mough ken Yerusalem u zan Yeriko, a za ande sha mbanumungbenda, ve er un ikav iyol kera, ve gbidye un kpaa, ve yem, ve undu un nôngon ku.

³¹Tsô pristi ugen gba va karen hen gbenda la; nengen na yô, a kar bar ugen.

³²Or u Levi kpaa er nahan, er va nôôr hen ijiir la yô, a nenge a na, shi a kar bar ugen.

³³Kpa Orsamaria er lu zan zende yô, a va ar henpe a lu la; nengen na yô, mhôônom kôr un.

³⁴Tsô a za hen na, a kange un avav, a haa mkurem man wain sha mi, a tôô un a penda sha jaki na, a va a na hen iyou i mbavannya la, a koso un dedoo.

³⁵Kper gen a dugh sule uhar, a na orya la, a kaa er: Nenge sha a na dedoo; kwagh u ú vihi, una hemba ngun yô, iyange i me hide yô, me kimbi u.

³⁶Ken ve mba utar mban yô, ka hanmô je u henen wer nan ngu u wan ndor a or u nan va ande sha mbanumungbenda laa?

³⁷A kaa er: Ka or u a zungu un mhôônom la. Yesu maa kaa a na er: We kpaa, za er nahan.

³⁸Tsô er ve lu ken zende ve, A va nyôr hen wangar ugen; tsô kwase ugen, iti na er Marta, nyôr a Na hen ya na.

³⁹A lu a anngô u kwase u i yilan er Maria, u a tema Ter hen angahar, a ungwa kwaghôron Na la.

⁴⁰Kpa Marta yô, gilim sha je tume un iyol; a va her a Na, a va kaa er: Tere, anngôm undum, m ngu gilim sha tswen, nahan kpaa U shi U wa iko je gaa? Yô, kaa un a̱ va wasem!

⁴¹Kpa Ter gema kaa a na er: Marta, Marta, ishima ngi nyian we, akaa nga zan we iyol kposo kposo.

⁴²Kpa kwagh u kwagh a gbe sha mi yô, ngu môm tseegh; Maria yô, tsuwa ci u dedoo u mayange á kera tsuwe un her a na kera ga yô.