Read tiv Luka 12 Bible Online

Luka 12 - tiv bible

Luka 12

¹Tsô hen shighe la er ior kohol udubu imôngo je, lu ndyaren ayol a ve yô, A gba kaan a mbahenen Nav er: Kura nen ayol a en sha kwagh u kwa u Mbafarishi, ka imanger je la.

²Kpa ma kwagh ngu u i cir man á de pasen un ga; man shi u a lu myer, man á de fan un ga.

³Ka sha ci u nahan man hanma kwagh u ne er ken ime, á ungwa un ken igbar ye; kwagh u ne kaan ivarivase ken iuv kpaa á yôô un sha ityoriyoughough.

⁴Ne akar Am yô, M ngu kaan ne: De cie nen mba ve woo iyol kpa ken masejime yô, ve kera lu a ma kwagh ugen u vea er ga la ze.

⁵Kpa Mo Me kaa ne u a lu u ne cia Un yô; cia nen Un u Una wua man shi Una fatyô u gbihin ken gehena kpaa la; M ngu kaan ne, ka Wen cia nen ye.

⁶Mba teen mbaatsator utaan sha toro uhar gaa? Mô ve môm kpaa i hungul Aôndo ga.

⁷Man shi ice yen i sha ityou je kpaa i ôr i cii. De cie nen ga; mbaatsator kpishi je kpaa ne hemba ve inja.

⁸Man shi M kaan ne: Hanma or u nana pasem sha ishigh ki iorough, Wan u or kpaa Una pase nan sha ishigh ki mbatyomov mba Aôndo.

⁹Kpa u nana nyiman Mo sha ishigh ki iorough yô, á nyiman nan sha ishigh ki mbatyomov mba Aôndo kpaa.

¹⁰Man shi hanma or u nana ôr kwagh sha Wan u or dang, á de nan, kpa u nana ôr kwagh u ityuhwan sha Icighan Jijingi yô, á de nan ga.

¹¹Man shi zum u vea va a ven hen ushinagoge man hen mbatarev yô, asema a̱ de nyian ne sha inja kwaghôron u né ôr shin sha kwagh u né kaa ga;

¹²gadia hen shighe la Icighan Jijingi Una tese ne kwagh u i doo u né ôr yô.

¹³Tsô u môm ken ikpelaior kaa a Na er: Ortesen, kaa anngôm a̱ kar dyako vea mo.

¹⁴Kpa A kaa a na er: Nomsoor! Ka an nan verem orjir shin or u karen ne kwara?

¹⁵Tsô A kaa a ve er: Ver nen ishima, kura nen ayol a en sha hanma hua; gadia ka sha u ngeen a akaa kpishi la man or nana lu a uma ga.

¹⁶Tsô A ôr ve injakwagh ne, A kaa er: Sule u ornyar ugen doo iyiagh kpishi.

¹⁷Nahan a gba henen ken ishima na, kaan er: Me er nana? Gadia m ngu a ijiir i me ombo iyiav ga.

¹⁸Tsô a kaa er: Kwagh u me er yô, me hembe iuna yam kera me maa i i hembe vesen yô, ka ker man me koso iyiagh man inyarev yav kpaa ye.

¹⁹Tsô me kaa a ishima yam mer: Ishima, u koso akaa kpishi, a aa kuma anyom imôngo je; gba memen tsô, yaan akaa, maan akaa, i̱ lu u iyol yagh yagh.

²⁰Kpa Aôndo kaa a na er: We ibumeor ne! Ka nyian tugh je i lu keren uma wou hen we ye; nahan akaa a u kohol ne yô, aa hingir a ana?

²¹Or u nan lu koson inyaregh sha ci u iyol i nan, kpa nan kera lu ornyar sha kwagh u Aôndo ga la, kape kwagh u nan a lu ne.

²²Tsô A kaa mbahenen Nav er: Ka nahan man M kaan ne ye, mer, asema a̱ de nyian ne sha ci u uma wen sha kwagh u né zer la ga.

²³Gadia uma hemba kwaghyan, iyol kpaa i hemba akondo.

²⁴Nenge nen ugugôô, mba lee ga, mba sondo kpaa ga, mba a ityumbe ga, mba a una kpaa ga, nahan kpaa Aôndo koson ve; ne ne hemba inyon inja tsung je gaa?

²⁵Ka an wen je sha ishima i nyian i nan, nana fatyô u seer ishiva i môm sha ityaven i nan ase?

²⁶Aluer nea faan ityô u eren ankwagh u kiriki nahan ga yô, inja na nan man ishima i nyian ne sha akaa agene?

²⁷Nenge nen er uimondon mba ken toho ve vesen yô; mba eren tom ga, mou kpaa mba te ga; man M kaan ne ne, Solomon a iengem na cii je kpaa mayange haa akondo er mo ve môm nahan ga.

²⁸Yô, aluer Aôndo Una wuhan ahu a a lu ken toho la iyol doo doo nahan, a a lu uma nyian, kper á haa a ken atse la, man hire ne mba ne lu a anjighjigh u nan nee?

²⁹Ne kpaa de keren nen kwagh u né ya man kwagh u né ma ga; asema kpaa a̱ de nyian ne ga;

³⁰gadia akaa ne cii akuraior sha won cii nga keren; kpa Ter Wen fa er kwagh a gbe ne sha akaa ne cii yô.

³¹Kpa ker nen tartor Na man akaa ne cii á seer ne a ye.

³²Ne anikumuile u kpeghee ne, de cie nen ga! Gadia i doo Ter wen u nan ne tartor la.

³³Gema nen inyaregh yenegh tee nen, na nen iwua. Kor nen akpa a inyar a a bee iyol ga la sha ci wen, ka kwagh u injaa u a lu Sha u una bee ga, ape ormbaiv nana mgbôghom a min ga, ivina kpaa ia vihi ga yô;

³⁴gadia ape kwagh u injaa wou a lu yô, ka her man ishima you kpaa ia lu ye.

³⁵Ta nen akondo uya, amenger a en kpaa a̱ yeghen.

³⁶Ne ayol a en kpaa, lu nen er ka ior mba veren ashe sha gbenda u ter ve zum u a mough ken iniongo i kwasehe a lu hiden la, sha er shighe u una va una va mande uwegh yô, vea bugh un fese yô.

³⁷A saan mbatomov mba ter ve una va, una va kohol ve kuran la, iyol. Mimi je, M kaan ne ne, una ta ikondo uya, una ver ve hen ijiir i kwaghyan una va due ve a iwer.

³⁸Shin a lu ateghatô u utu shin ahwa atar a utu man una va una va kohol ve nahan yô, á saan mbatomov mbala iyol.

³⁹Kpa fa nen ner, aluer orya una fe shighe u ormbaiv a ve yô, ma a kor, ma a de er i̱ pev un iyou ga.

⁴⁰Ne kpaa, kohol nen iyol nahan; gadia ka hen shighe u ne ver ishima ga la, man Wan u or Una va ye.

⁴¹Tsô Peteru kaa a Na er: Tere, ka se U lu ôron se injakwagh ne shinii ka ior cii?

⁴²Ter kaa er: Ka an nan lu orkuran ya u jighjigh, u fan kwagh, u ter u nan una wa nan ya sha ikev sha u nana̱ karen ve kwaghyan sha ashighe ashighe?

⁴³Ortom u ter u nan una va, man una va kohol nan eren nahan la yô, á saan nan iyol.

⁴⁴Mimi je, M kaan ne, una wa nan akaa a na a a lu a mi la cii sha ikev.

⁴⁵Kpa aluer ortom la nana kaa ken ishima i nan er: Terem timbir u van yum, man nana gba gbidyen mbatomov mba nomso man mba kasev man nana gba yan akaa, man akaa, hunden kpaa yô,

⁴⁶ter u ortom la una va sha iyange i nan ver ashe sha gbenda ga la, hen shighe u nan fe ga kpaa, una gber nan atôôn atôôn, una na nan kwar a mba ve lu jighjigh ga la imôngo.

⁴⁷Man kpan u nan fe awashima u ter u nan la, kpa nan we ago iyol ga, man shi nan er sha ishima na kpaa ga yô, á gbidye nan kpen kpen je.

⁴⁸Kpa u nan fe ga, man nan er kwagh u a kom igbidiv yô, á gbidye nan kpuaa. Man shi hanma or u i ne nan kpishi, á ker di her a nan kpishi, man shi u i ver nan akaa kpishi sha ikev, ka her a nan á hemba keren kwagh ye.

⁴⁹M va sha u Me haa usu sha tar; sarem tsung u ma i keer u kera ve yô.

⁵⁰M ngu a batisema u ma i erem batisema a min yô; M ngu yan ican ken ishima zan zan á kar kuren.

⁵¹Ne mba henen ner, M va u Me va na bem sha wono? Ei! Me kaa ne, jim je yô, ka mpav.

⁵²Gadia hii hegen je zan zan, ior á lu hen ya môm utaan, kpa vea zuan ga; utar a mba uhar, mba uhar di a mba utar.

⁵³Vea pav, ter a wan u nan, wan di kpaa a ter u nan; ngô a wan u nan u kwase, wankwase kpaa a ngô u nan; ngô a kwase u wan u nan, kwase kpaa a ngô u nom u nan.

⁵⁴A shi A kaa a ikpelaior er: Zum u ka nea nenge ibeenegh kia due shin ityôtar yô, ne kaa ner: Ura ua va nôô; kape shi i lu je la.

⁵⁵Shighe u ahumbe ka a due ken imbusutariyan yô, ne kaa ner: á va tsee iyol; kape shi i lu je la.

⁵⁶Ne mbaimangerev, ne fa u tôvon sha anzaakaa a shin tar man a sha kwavaôndo, kpa er nan man ne kera fe u tôvon kwagh u shighe ne ga?

⁵⁷Man ka nyi ne ayol a en kpaa ne kar kwagh u a lu vough la ga?

⁵⁸Gadia er u lu zan a or u yilan we ijir la hen tor yô, sha gbenda la je nôngo tsung u kuren kwagh vea na; sha u a̱ de ze a we hen orjir, man orjir a̱ geman we, a̱ waan sha ikev i dugwer, dugwer a̱ geman we a̱ gbihin ken gaadi ga.

⁵⁹M ngu kaan we, mayange ú due ker ga, saa ú kimbi, anini môm tsô kpaa una kera shi ga.