Read tiv Luka 13 Bible Online

Luka 13 - tiv bible

Luka 13

¹Hen shighe la ior mbagenev lu heregh lu ôron Un kwagh u Mbagalilia mba Pilatu lu nungwa awambe a ve sha nagh vegh la.

²A gema A kaa a ve er: Ne mba henen ner, Mbagalilia mbala hemba Mbagalilia cii asorabo, sha ci u kwagh ne a tser ve nahan yôô?

³Me kaa ne, ka nahan ga; ne cii kpaa kape né tim ne, saa nea gema asema.

⁴Shin mba pue kar anigheni mba gôgôyou yôhôl, kighir ve ken Shiloam, wua ve la, ne mba henen ner, ve hemba eren kwaghbo a ior mba ken Yerusalem cii hi?

⁵Me kaa ne, ka nahan ga, kape ne cii kpaa né tim ne, saa nea gema asema.

⁶A shi A ôr injakwagh ne er: Orgen lu a kon u tur, i môôr u ken sule na. A va ker atam sha u, kpa a zua a min ga.

⁷Tsô a kaa a or u shiren sule la er: Nenge, ka anyom atar je ne a m va keren atam hen tur ne, kpa m zough a min ga; gber un kera; ka nyi a gbe yisan ijiir ne gbilinii?

⁸Ngula gema kaa a na er: Tere, shi de un inyom ne kpaa, me vughul un itine, me haa ihôghonov,

⁹aluer una ume atam inyom i i lu van ne yô, doo; aluer una ume ga yô, ú gba gberen kera tsô.

¹⁰A lu tesen ken shinagoge ugen sha iyange i memen.

¹¹Tsô nenge, kwase ugen u a lu a jijingi u uange anyom pue kar anigheni; iyol na cii kôvor ng'wenee, kera fatyô u naregh sha ga.

¹²Er Yesu nenge a na yô, A yila un, A kaa a na er: Kwase, i war u sha angev ou ve.

¹³A penda un ave iyol; nahan a naregh jighilii, tsô a gba civir Aôndo.

¹⁴Ka vihin orvesen u shinagoge la sha ci u Yesu A bee angev sha iyange i memen yô, a gema a kaa a ikpelaior er: Ayange nga ataratar a a doo u eren tom yô; ka sha a je, vaan nen, i̱ been ne angev ye, kpa i̱ de lu sha iyange i memen ga.

¹⁵Kpa Ter gema kaa a na er: Ne mbaimangerev, hanmô wen kpaa ka nan sagh bua u nan shin jaki i nan hen anar u haan ilev kwaghyan shimi sha iyange i memen, nan za na un mngerem er a̱ ma gaa?

¹⁶Man hire kwase u a lu wan u Aberaham ne man Satan lu kange un anyom pue kar anigheni yô, kera ka u ma i sagh un ikangenev mbin sha iyange i memen keng gaa?

¹⁷Kaan nahan yô, mba ve hendan a Na cii, ve hee. Ikpelaior la cii ember sha ci u akaa a doon a A eren la cii.

¹⁸Tsô A kaa er: Tartor u Aôndo ngu er nyi nahana? Ka sha nyi je man Me kar u?

¹⁹Ngu er ishange i masetadi i or ka nan tôô, nan ta ken sule u nan; i mende i hingir kon, inyon i sha i va i va wa aya sha agbaa a na.

²⁰A shi A kaa er: Ka sha nyi kwagh man Me kar tartor u Aôndo?

²¹Ngu er kwa u kwase ka nan tôô, nan wa ken mwem ma ma kom uikaren utar zan zan u zende sha mi cii.

²²A gba yemen zende Na, lu nyôron ken agar a vesen man angarev mba kiriki, lu tesen, veren ishigh u zan ken Yerusalem.

²³Tsô orgen pine Un er: Tere, mba á yima ve yô, mba ciôn tsôô? Kpa A kaa a ve er:

²⁴Nôngo nyôr nen hen hunda u hogholoo, gadia M kaan ne ne, ior kpishi vea nôngo u nyôron, kpa vea fatyô ga.

²⁵Aluer orya una vande moughon una wuhe hunda kera yô, né gba tilen ken won manden uwegh sha katsor, kaan er: Tere, shi bugh se ga! kpaa Una gema Una kaa a ven er: M fa ne hen ape ne dugh ne ve ga.

²⁶Hen shighe la né gba kaan ner: Se yaan kwagh se maan kwagh a We, U shi U tesen sha igbenda yase kpaa.

²⁷Una gema A kaa er: M kaan ne, M fa hen ape ne dugh ne ve ga; kar nen heen sha, ne mba eren uifermbatomov cii.

²⁸Keregh la né haan mliam né yaan anyi kpaa zum u nea nenge a Aberaham man Isaka man Yakob kua uprofeti cii ken tartor u Aôndo, man ne ayol a en á gema á gbihi ne ken won yô.

²⁹Ior vea due sha ityoughkitaregh man shin ityôtar man ken imbusutariyan man imese, vea va tema ken tartor u Aôndo.

³⁰Mbamasetyô mbagenev vea hingir mbahiihii; mbahiihii mbagenev di vea gema á hingir mbamasetyô.

³¹Hen shighe la je Mbafarishi mbagenev va, va kaa a Na er: Mough heen, yem, gadia ka Herode ka wuan We.

³²Kpa A kaa a ve er: Yem za kaa nen icôngo la ner: M ngu dughun ujijingi mba bov, M ngu been angev, nyian man kper kpaa, sha iyange i sha utar la Me kure.

³³Kpa ka u me yem zende Wam keng nyian man kper man duela kpaa, gadia á gba wuan profeti mape gen ga saa ken Yerusalem.

³⁴Kpash! Yerusalem, Yerusalem, we u u woo uprofeti man u te mba i tindi ve her a we, awen ne! Ka acin a me je man i lum pe kohol ônov ou er ngôikegh ka a kohol ônov nav, shin akper a na nahan, kpa ne rumun ga!

³⁵Nenge ase, i undu ya wou, hingir ice. Mimin je M kaan ne ne, né nenge a Mo ga, saa sha shighe u né va kaa ner: I̱ wuese Un u a ve ken iti i Ter la.