Read tiv Luka 14 Bible Online

Luka 14 - tiv bible

Luka 14

¹Er A za nyôr hen ya u orvesen ugen u ken Mbafarishi sha iyange i memen sha u za yan kwaghyan yô, ve haa ashe sha a Na.

²Tsô orgen u ingôgh i kôr un yô, lu Un sha hemen.

³Yesu gema ôr kwagh a mbafanatindi man Mbafarishi, kaa er: I rumun u i̱ been angev sha iyange i memen shinii?

⁴Kpa ve huan ving. Tsô A tôô un, A bee un angev, A na un gbenda.

⁵A gema A kaa a ve er: Aluer mô u ken a ven nana lu a wan shin bua man mô ve una gba shin ijôr yô, nana kera dugh un fese je sha iyange i memen gaa?

⁶Ve kera fatyô u ôron Un kwagh sha akaa ne ga.

⁷Er A nenge ve lu sangen mkônom ma injaam yô, A ôr ior mba i lehe ve la injakwagh, A kaa a ve er:

⁸Aluer or nana lôhô u iniongo i kwasehe yô, de za tem sha ikônough ki injaagh ga, gayô, alaghga á lôhô orgen u a hembe u icivir yô,

⁹man wen u a lehe u vea orgen la je, una va una va kaa a we er: Na or ne ian; nahan ú za tema ken ikônough ki ken ijime la je a iheen iyol.

¹⁰Kpa aluer á lôhô u yô, za za tema ken ikônough ki ken ijime la je, sha u zum u wen u a lehe u la, una va yô, una kaa a we er: Ikar, kôndo sha hemen! Nahan ú lu a icivir hen mba ve tem kwaghyan a we imôngo la cii.

¹¹Gadia hanma or u nan kende a iyol i nan sha yô, á hire a nan ijime; man u nan hir a iyol i nan ijime yô, á kende nan sha.

¹²Shi A kaa a or u a lehe Un la er: Zum u wea yôr iwer i atetan shin i aikighe yô, de lehe akar a ou, shin anmgbianev ou, shin ityô you, shin mbanyarev mba ve we ndor a we ga, gayô alaghga ve di kpaa vea lôhô u iwer, vea kimbi u.

¹³Kpa zum u wea er iniongo yô, lôhô mbaatsanev man mbaawanev man mbakeer man mbaapirashe.

¹⁴Nahan we kpaa á saan we iyol sha ci u ve mba a kwagh u vea kimbi u ga; gadia á va kimbi u sha mnder u mbaperapera la.

¹⁵Ugen ken mba ve tem ve lu yan kwagh a Na imôngo la, ongo akaa ne yô, a kaa a Na er: Á saan or u nana ya kwaghyan ken tartor u Aôndo la iyol.

¹⁶Kpa A kaa a Na er: Orgen er zegeiniongo, lôhô ior kpishi.

¹⁷Shighe u iniongo la kom yô, a tindi wanakiriki na sha u za kaan mba i lehe ve la er: Va nen, gadia akaa cii kohol ve.

¹⁸Ve cii ve kure zwa môm sha atimbirakaa. U hiihii la kaa a na er: M yam sule, nahan ka u me za nenge kpee je; yô, shi nam ian yôô!

¹⁹Ugen kpaa kaa er: M yam ibua ihiar ihiar kwa taan, me za me za kar i; shi nam ian yôô.

²⁰Ugen kpaa shi kaa er: M sember eren kwase, ka nahan man me fatyô u van ga ye.

²¹Wanakiriki la hire va ôr ter na akaa la. Tsô er vihi orya la yum yô, a kaa a wanakiriki na la er: Hide fefa, za hen akômaigbinda man anigbendav mba ken gar, za vam a atsanaior man mbaawanev man mbaapirashe man mbakeer heen.

²²Wanakiriki la kaa er: Tere, kwagh u u kaa la i er un ve, nahan kpa ian shi heregh.

²³Ter la kaa a wanakiriki la er: Za ken uigbudu man indyoor za za ve iyol, ve̱ nyôr, sha u ya wam a̱ iv yô.

²⁴Gadia me kaa ne, ior mba i lehe ve mbala, mô ve môm nana bende iwer yam zwa ga.

²⁵Ikpelaior kpishi lu zan a Na imôngo; A gema ashe A kaa a ve er:

²⁶Aluer anti or nana va hen Mo, man nana kôr ter u nan ihom ga, kua ngô u nan, man kwase u nan man ônov mba nan mba nomso man mba kasev, kua uma u nan je kpaa nana kôr un ihom ga yô, nana fatyô u lun orhenen Wam ga.

²⁷Hanma or u nana tôô terankon u nan iyol i nan, nana dondo sha a Mo ga yô, nana fatyô u lun orhenen Wam ga.

²⁸Gadia ka anti ken a ven a lu nan ka maan gôgôyou u taven sha, nana kera tema nana vande ôron inyaregh ki maan a mi la ga, sha u nana fa shin nan ngu a kwagh u nana kure i a min kpaou?

²⁹Gayô, aluer nana maa imagh kera, man nana kera za fatyô u kuren ga yô, alaghga mba vea nenge la cii vea gba nahan nan tar,

³⁰kaan er: Or ne hii u maan kpa a kera fatyô u kuren ga.

³¹Shin ka hanma tor a lu nan pe za zuan ityav a tor ugen, nana kera tema nana vande henen kwagh la, shin sha ior dubu pue nana fatyô u za yan gadoga a u a lu van a ior dubu ikundu la kpaou?

³²Gayô, nana tindi mbatyomov, vea za pine akaa a á er man á hime iyongo er ngula a lu ica je yô.

³³Ka nahan man hanmô wen u nan undu inyarev mbi nan cii ga yô, nana fatyô u lun orhenen Wam ga.

³⁴Bar doo kpee, kpaa aluer bar una kera nyoho ga yô, ka sha nyi je á shi á sôr unu?

³⁵Una kera lu a inja shin inya shin sha tihi u ihôgh kpaa ga; á haa un kera. U nan lu a ato a ungwan yô, nana̱ ungwa.