Read tiv Luka 16 Bible Online

Luka 16 - tiv bible

Luka 16

¹A shi A kaa a mbahenen Nav er: Ornyar ugen lu, lu a wanakiriki u nengen un sha inyar. Tsô i yila wanakiriki la ijir hen ter na er, ngu vihin un inyaregh.

²Nahan a yila un a kaa a na er: Ka nyi kwagh m ongo sha a we nahana? Ôrom kwagh sha kwagh u m we u sha ikev la, gayô u kera fatyô u nengen mo sha inyar ga.

³Tsô wanye la gba kaan ken ishima er: Me er nana er terem a lu dughun mo sha tom u nengen sha inyar ne kera yôô? M ngu a agee a iyolough a me shire sule ga; man shi kunya gema ngu kôron mo sha sen.

⁴M fa kwagh u me er man iyange i á dughum ken tom u inyar ne kera man vea rumun mo ken uya vev yô.

⁵Tsô a yila mba ve gbe anzô hen ter na la er ve̱ va her a na môm môm; a kaa a u hiihii la er: U gba injô hen terem sha inyaregh nana?

⁶Ngula kaa er: Ka mkurem uikaren akunduataan. A kaa a na er: Tôô takerada wou u injô la tema fese, nger akunduahargber.

⁷A shi a kaa a ugen la er: We yô, u gba injô nana? A kaa er: Ka alakema uikaren akunduataan. A kaa a na er: Tôô takerada wou u injô la, nger akunduanyiin.

⁸Tsô ter la wuese wanakiriki u nengen un sha inyar u lu or u mimi ga la, sha ci u a er kwagh sha kwaghfan yô, gadia sha kov ve yô, ônov mba ken tar u ainge ne ve hemba ônov mba ken iwanger kwaghfan.

⁹Man M kaan ne, kôr nen akar sha inyaregh ki ki lu perapera ga ne, sha u zum u kia kera lu ga yô, vea rumun ne ken atumbe a tsôron yô.

¹⁰U nan lu jighjigh sha ankwagh u kiriki yô, nana lu jighjigh sha kwagh u vesen kpaa; man shi u nan lu perapera sha kwagh u kiriki ga yô, kwagh u vesen kpaa nana lu perapera sha mi ga.

¹¹Nahan aluer ne kera lu jighjigh ga sha kwagh u inyaregh ki ki lu perapera ga la yô, ka an nana wa ne kwagh u mimi sha ikeve?

¹²Man aluer ne kera lu jighjigh sha kwagh u orgen ga yô, ka an nana na ne kwagh u a lu u wene?

¹³Ma wanye ngu u nana fatyô u eren uter uhar tom ga; gadia nana kôr ugen ihom, ugen á doo nan ishima; shin nana var ken ugen, nana laha ugen. Ne fatyô u eren Aôndo tom kua inyaregh kpaa ga.

¹⁴Mbafarishi mba inyaregh doo ve kpishi, mba ongo akaa ne cii yô, ve gba nahan Un tar.

¹⁵Kpaa A kaa a ve er: Ka ne mba ne ne ayol a en ishô sha ishigh ki iorov je ne, kpaa Aôndo fa asema a en; gadia kwagh u a lu ior kwagh u icivirigh yô, gema ka kwagh u ndôhôr Aôndo ishima.

¹⁶Atindi kua uprofeti lu zan zan ar hen Yohane; hii hen shighe la je zan zan, mba ôron Loho u Dedoo u tartor u Aôndo, hanma or kpaa nan nyer ker sha igosor je.

¹⁷Gadia Sha man tar vea kar kera, á lu ican ga, kpa á hemba lun ican u anikav môm ken atindi á saa.

¹⁸Hanma or u nana pav a kwase u nan, nana gema nana er ugen yô, ka idya je nan er ye; man shi u nan er kwase u nom a pav a nan la yô, ka idya je nan er ye.

¹⁹Ornyar ugen lu, haan akondo a nyian dindee man a pupuu a dedoo, ishar haan un iyol ayange ayange.

²⁰I ver orgen hen hunda na u sônon a sôn kwagh, iti na er Lasaru, lu a avav iyol côhôô,

²¹lu tômon u ma i na un avur a kwaghyan a a hee inya hen tebul u ornyar la; iwa i va, i va ndiar un avav.

²²Tsô or u sônon la va kpe, mbatyomov mba Shaav tôô un, za a mi ken ikum i Aberaham.

²³Ornyar la kpaa kpe, i ii un. Er ican lu eren un ken Hade kpishi yô, a kende ashe sha, a nenge a Aberaham ken ica a Lasaru sha ikum.

²⁴A genger imo, a kaa er: Ahii Aberaham, tere! Shi zungwem mhôônom, tindi Lasaru a̱ civ ihôwe na shin mnger, a̱ va surum nombor, gadia ican ngi eren mo sha nomborusu ne je cier iyol.

²⁵Kpa Aberaham kaa er: Wan, umbur er iyange u zuan a akaa a ou a dedoo zum u u lu uma la kape Lasaru kpaa zuan di a akaa a bo je la; kpa hegen yô, mba surun un ishima heen; man we di ican ngi eren we hegen kpishi.

²⁶Kwagh ugen kpaa ngu, hen ihindan wase a ven i ver zegejem, sha u mba a lu ve ka moughon keen peren ken a ven, ve̱ de fetyô ga; man shi sha u ve̱ de moughon keela, ve̱ peren ve̱ vaan hen vese ga.

²⁷Tsô a kaa er: M ngu zamber a we, tere; tindi un a̱ za hen ya u terem;

²⁸gadia mba ve lu ngô a mo mba utaan, a̱ za pase ve nahan, sha u ve kpaa ve̱ de ve hen ijiir ingin i ican ne ga.

²⁹Kpa Aberaham kaa er: Mba a Mose man uprofeti, ve̱ ungwan ve.

³⁰Kpa a kaa er: Ei! tere, Aberaham, kpa aluer orgen nana nder shin mbakpenev, nana za her a ve yô, vea gema asema.

³¹Kpa a akaa a na er: Aluer vea ungwa Mose man uprofeti ga yô, shin orgen nana nder shin mbakpenev je kpaa, vea gema asema ga.