Read tiv Luka 17 Bible Online

Luka 17 - tiv bible

Luka 17

¹Tsô A kaa a mbahenen Nav er: Á fatyô u yangen atôakaa a nan gbev mbu nôngon ga; kpa kwagh á gema á tser or u nan ve a mi la!

²Kwagh u a lu nan guda yô, ka u ma i har nan nase sha mon, ma i gbihi shin zegemnger, a u ma nan ne u môm ken mbakiriki mban gbev mbu nôngon yô.

³Ver nen ishima sha ayol a en. Aluer anmgbian wou una er kwaghbo yô, yange un; aluer una gema ishima yô, de un kwaghbo na.

⁴Aluer una er u kwaghbo kwa taankaruhar sha iyange i môm, man shi una hire her a we kwa taankaruhar, una kaa er: M vaa afanyô yô, de un kwaghbo na.

⁵Mbaapostoli kaa a Ter er: Seer se jighjigh u nan!

⁶Tsô Ter kaa er: Nea lu a jighjigh u nan sha inja i ishange i masetadi yô, ma ne kaa a itine i sukamino ne ner: Môgh, i môôr we shin zegemnger! Kpa ma i rumun imo yen.

⁷Kpa ka anti ken a ven aluer nana lu a or u shiren nan u kahan sule, shin u kuran ilev, man una za kur ken ityev yô, nana kaa a na er: Va hegen, va tema kwaghyan ase?

⁸Nana kera kaa a na er: Er kwaghyan u me ya tugh ne, haa ikondo iyol, duem a kwaghyan, m̱ ya, m̱ ma, tsô we ú mase yan man man, gaa?

⁹Una sugh orshiren la sha ci u a er akaa a i kaa un la kpa?

¹⁰Kape ne kpaa, zum nea er akaa a i kaa ne cii yô, kaa nen ner: Se mba mbashiren kpa se kuma injar ga, se er kwagh u ma se er keng la tsô.

¹¹Tsô ngur yemen sha Yerusalem yô, A lu karen ken atô u Samaria man Galilia.

¹²Nyer hen wangar ugen yô, mbaamandev pue va kohol Un; ve tile ica.

¹³Ve genger imo ve kaa er: Yesu, Tere, zungwe se mhôônom!

¹⁴Nengen a ve yô, A kaa a ve er: Yem nen, za tese nen upristi ayol a en, ve̱ nenge. Mba moughon a mough u yemen nahan, wanger ve kera kpaa.

¹⁵Or ve u môm nengen er i bee un kwagh la yô, a cin a hide, a gba wuese Aôndo sha imo i taver;

¹⁶a va gba inya a cir ishigh inya hen angahar a Na; ngula yô, lu or u Samaria je.

¹⁷Yesu gema kaa er: Ka ior pue je i wanger ve gaa? Man mba utaankarunyiin mba hana?

¹⁸I kera zua a mba vea hire sha u vea va wuese Aôndo ga, saa orvannya ne tseeghe?

¹⁹A kaa a na er: Mough, gba zan tsô; jighjigh u nan wou war u.

²⁰Er Mbafarishi pine Un shighe u tartor u Aôndo ua va yô, A gema A kaa a ve er: Ka sha mnenge u sha ashe man tartor u Aôndo u ve ga.

²¹Mkaa kpaa vea kera kaa er ungun heen shin ungula heera kpaa ga; gadia tartor u Aôndo ngu ken a ven je.

²²Tsô A kaa a mbahenen er: Ayange nga van pe á sar ne ka ma ne nenge a iyange imôm ken ayange a Wan u or, kpa nea nenge a mi ga.

²³Vea kaa er: Ngula keela la! Shin: Ngun heen ne! De ze nen ga, de dondon nen ve kpaa ga.

²⁴Gadia er inyiar ka i nyiar i wanger vegher ugen u Sha zan zan i mande vegher ugen u Sha nahan, kape Wan u or kpaa Una lu sha iyange Na la.

²⁵Kpa saa ican ia vande eren Un sha akaa kpishi keng, kov ne kpaa ua venda Un.

²⁶Er i lu sha ayange a Noa la nahan, kape sha ayange a Wan u or kpaa á lu je la.

²⁷Ve lu yan akaa, man akaa eren kasev, nan kasev ken unoo, zan zan ar sha iyange i Noa kar nyôron ken tso, man mngerem ma deemee va, tim ve cii la.

²⁸Man shi er i lu sha ayange a Loti nahan kpaa; ve lu yan akaa, man akaa, yamen ukasua, lôôn akaa, maan uya.

²⁹Kpa sha iyange i Loti due ken Sodom yô, usu man sulfur due sha, haa shin inya, i tim ve cii.

³⁰Ka anzaakaa ne aa er sha iyange i á pase Wan u or la ye.

³¹Sha iyange la u nana lu sha tor, ikav mbi nan mbia lu ken iyou yô, nana̱ de hongo sha u nana tôô ga; u nana lu ken ityev kpaa, nana̱ de hidi ken ya ga.

³²Umbur nen kwagh u kwase u Loti la.

³³Hanma or u nana nôngo u lun a uma u nan her yô, uma u nan la una saa nan a saa; kpa hanma or u nana gbihi un una saa nan yô, nana lu a mi doo doo.

³⁴M ngu kaan ne, hen tugh mbula ior uhar vea lu sha gambe môm; á tôô u môm, á undu u môm.

³⁵Kasev uhar vea lu wuan kwagh sha nase imôngo; á tôô u môm a undu u môm. [

³⁶Ior uhar vea lu ken ityev; á tôô u môm man á undu u môm.]

³⁷Ve gema ve kaa a Na er: Ka hana, Tere? A kaa a ve er: Ka henpe gundukwagh a lu la, man mbaapu vea kohol ye.