Read tiv Luka 20 Bible Online

Luka 20 - tiv bible

Luka 20

¹Tsô sha iyange igen i ken ayange la, er lu tesen ior ken tempel, man ôron Loho u Dedoo yô, upristi mba tamen man mbangeren kua mbatamen va, va tile heregh;

²ve ôr kwagh a Na er: Kaa se: Ka sha tahav mbu nyi man U eren akaa nee? Man ka anti nan ne U tahav mbunuu?

³A gema A kaa a ve er: Mo kpaa me pine ne kwagh, yô, kaam nen:

⁴Batisema u Yohane la yô, ka Sha a dugh, shinii, ka hen ioroo?

⁵Ve gba henen ayol a ve er: Aluer sea kaa ser: Ka Sha yô, Una kaa er: Tsô ka nyi ne na un jighjigh ga?

⁶Man aluer sea kaa ser: Ka hen ior yô, ikpelaior cii ia ta se awen, gadia ve fa mimi je er Yohane a lu profeti yô.

⁷Tsô ve kaa er, ve fa hen pe a dugh ga.

⁸Yesu kpaa kaa a ve er: Mo kpaa Me kaa ne tahav mbu M eren akaa ne sha mi ga.

⁹A hii u ôron ior injakwagh ne er: Orgen er sule u wain, a gema u a wa sha ikev i mbashiren sule sha tôndo, a yem tar ugen sha u una za tema ker ica i gba yô.

¹⁰Shighe kom yô, a tindi ortom na hen mbashirensule mbala er ma ve pande un atam a wain la; kpa mbashirensule mbala gbidye un, na un gbenda aveve.

¹¹A shi a tindi ortom ugen; ngula kpaa ve gbidye, ve hee un, ve na un gbenda aveve.

¹²A shi a tindi u sha utar la; ngula kpaa ve vihi un iyol, ve zenda un kera.

¹³Tsô ter u sule la kaa er: Me er nana? Me tindi wan wam u ishima ishima, alaghga vea wa un iko.

¹⁴Kpa er mbashirensule mbala nenge a na yô, ve hen ayol a ve, ve kaa er: Ngun ka u dyako je ne, se wua nen un, sha u dyako la a̱ hingir u wase yô.

¹⁵Tsô mba dugh a Na ken sule kera yô, ve wua un. Nahan yô, or u sule la una er a ve nana?

¹⁶Una va, una va tim mbashirensule mbala kera, una gema sule la una na ior mbagenev. Mba ongo nahan yô, ve kaa er: I̱ de lu nahan ga!

¹⁷Kpa A kenger ve, A kaa er: Kwagh u i nger heen ne inja na nana? er: Iwen i mbamaan venda i, ka i je, i hingir i sha zongo ye.

¹⁸Hanma or u nana gba sha iwen ne, nana sombo njighe njighe, man u ia gba sha a nan yô, ia her nan lighe lighe er vuulevu nahan.

¹⁹Tsô mbangeren man upristi mba tamen gba keren ian sha u vea kôr Un hen shighe la, kpa ve lu cian ikpelaior, gadia ve kav er A er injakwagh la sha a ve je yô.

²⁰Ve gba kuran Un, ve shi ve tindi mbamkerev mba ve er inja er ve mba ior mba mimi yô, sha u vea zua a ityôkwagh sha kwaghôron Na, sha u vea na Un sha ikev i gomna kua ijirôron i gomna kpaa.

²¹Ve pine Un er: Ortesen, se fa er U er kwagh vough, shi U tesen nahan kpaa, U sangen a sange ma or ga, kpa ka sha mimi je U tesen gbenda u Aôndo ye.

²²Yô, u sé ta Shisar kpandegh, ka sha mi shinii, ka sha mi ga?

²³Kpa A kav atseregh a ve, tsô A kaa a ve er:

²⁴Tesem nen sule; ityough kin man kwaghngeren ne ka u ana? Ve kaa er: Ka u Shisar je!

²⁵A kaa a ve er: Na nen Shisar akaa a a lu a Shisar yô, Aôndo kpaa na nen un akaa a a lu a Aôndo yô.

²⁶Nahan ve fatyô u zuan a kwagh u vea kôr Un a ikaazwa sha kwaghôron sha ishigh ki iorough ga. Kpiligh ve iyol a kwaghôron Na, tsô ve huan ving.

²⁷Mbagenev ken Mbasadushi mba ve nyiman er mnder u shin ku ngu ga la, va her a Na, ve pine Un er:

²⁸Ortesen, Mose nger se er: Aluer wanngô u or una lu a kwase, una lu a wan ga, man una kpe yô, wanngô na a̱ tôô kwase la, a̱ ver wanngô na tse.

²⁹Tsô ior lu utaankaruhar, ve lu ngô môm je; u hiihii la er kwase, kar kpe kera, ver tse ga.

³⁰U sha uhar la kpaa nahan,

³¹man u sha utar la kpaa tôô un zan zan ve mba utaankaruhar mbala cii, mô ve môm ver tse ga, maa ve kpe

³²ken masejime kwase la iyol na kpaa kpe.

³³Sha mnder u shin ku yô, una lu kwase u an ken a ve? Gadia ve utaankaruhar cii ve er un.

³⁴Yesu gema kaa a ve er: Ônov mba ken tar ne mba eren kasev, shi mba ne kwase ken nom kpaa;

³⁵kpa mbala mba i nenge ve kom er vea ar sha tar ugen la, man sha mnder u shin mbakpenev kpaa yô, mba eren kasev ga, man shi mba ne kwase hen nom kpaa ga.

³⁶Gadia vea kera fatyô u shi kpen mayange ga, gadia ka ve lu er mbatyomov mba Shaav nahan, er ônov mba Aôndo je nahan sha ci u ve lu ônov mba mnder u shin ku yô.

³⁷Man sha kwagh u mbakpenev er á nder a ve yô, Mose kpaa tese hen kwagh u ageva la, er a yila Ter er Aôndo u Aberaham, man Aôndo u Isaka, man Aôndo u Yakob.

³⁸Wen yô, ka Aôndo u mbakpenev ga, ka u mbaumav je, gadia ka sha a Na man ve cii ve lu uma ye.

³⁹Mbagenev ken mbangeren gema kaa er: Ortesen, U kaa doo!

⁴⁰Gadia ve kera fatyô u pinen Un ma kwagh ga.

⁴¹Tsô A kaa a ve er: Er nan man i kaan er, Kristu ka Wan u Davidi?

⁴²Gadia Davidi iyol na kaa ken ruamabera u Upasalmi er: Ter kaa a Terem er: Temam ken uwegh ku yanegh,

⁴³zan zan Me gema mbaihomov Ou ve̱ hingir We kwagh u pendan angahar sha mi.

⁴⁴Davidi yô, yila Un er Ter, man er nan A shi A lu Wan Naa?

⁴⁵Er ior ca ca lu ungwan ato nahan, A kaa a mbahenen er:

⁴⁶Kura nen ayol a en sha mbangeren, mba i doo ve u zenden a ugôgômbarigav man u ior ve̱ sughun ve sha ityembe kasua, man mba ajiir a teman a injaa ken ushinagoge kua mkônom ma injaam ken uiniongo hemba doon ve;

⁴⁷mba yan uya mba kasev mba côgholov, man eren ugôgômbamsen sha imanger; ka ve je vea hemba zuan a ibo sha ijir ye.