Read tiv Luka 21 Bible Online

Luka 21 - tiv bible

Luka 21

¹A kende ashe, a nenge mbanyarev lu haan uiwua vev ken akwati u inyar.

²A nenge kwasecôghol ugen u a lu icankwase kpaa lu haan ideri ihiar kimi.

³Tsô A kaa er: Mimi je M kaan ne ne, kwagh u kwasecôghol u a lu icankwase ne a hee kimi la, hemba u ve cii;

⁴gadia ve cii ka ken mngee u ve ngee a akaa man ve hee kimi ye, kpa wen yô, ka ken ibanave na a hee kimi ye, ka kwagh u a lu a mi sha u koson iyol na cii je la.

⁵Er mbagenev lu ôron kwagh u tempel, teren hwe u i er un sha awen a dedoo man sha iniav mbi i tsegh mbi la yô, A kaa er:

⁶Akaa a ne nenge a mi ne yô, ayange nga van a iwen i môm kpaa i á de i i̱ lu sha igen ia lu ga, á yôhôl ca ca.

⁷Tsô ve pine Un er: Ortesen, ka hanma shighe man akaa ne aa ere, man ka nyi ia lu ikav er shighe u akaa ne aa kuma u erene?

⁸A kaa er: Ver nen ishima, i̱ de tsughun ne ga; gadia ior kpishi vea va ken iti Yam, vea kaan er: Ka mo Un je ne; man shi: Shighe mgbôghom; de ze nen a ve ityô ga.

⁹Man shi zum u nea ungwa kwagh u utya man ayôôso a num kpaa, de cie nen ga; gadia akaa ne aa vande eren keng je; kpa mkur yô, una lu a kuma ve ga.

¹⁰Tsô A kaa a ve er: Ikurior igen ia mough num a ikurior igen; tartor ugen kpaa ua mough num a tartor ugen.

¹¹Ityartenger i vesen ia lu sha ajiir kposo kposo, kua ijen man ubombauangev kpaa; man akaa a cieryol man uivande mba vesen kpaa vea due sha aôndo.

¹²Kpa er akaa ne aa lu a er ga je tsô, vea kôr ne, vea tôv ne a ican, vea za a ven ken ushinagoge man ugaadi; vea va a ven sha ishigh ki utor man ugomna sha ci u iti Yam.

¹³Kwagh ne una gema á hingir ne ian i pasen kwagh Wam.

¹⁴Nahan yô, ver nen ishima, de vanden henen nen sha kwagh u né za ôr ga;

¹⁵gadia Mo Me na ne zwa man mfe u mba ve hendan kwagh a ven cii vea fatyô u vendan ga, u nyiman kpaa ga yô.

¹⁶Kpa mbamaren enev man mba ve lu ngô môm a ven man ityô yen man akar a en kpaa, vea na ne ken ijir, á wua mbagenev ken a ven kpaa.

¹⁷Ior cii vea kôr ne ihom sha ci u iti Yam.

¹⁸Kpa gwarce wen u sha ityou môm tsô kpaa una saa ishe ga.

¹⁹Ka sha ishima yen i wan man né zua a uma wen ye.

²⁰Man zum u né nenge akumautya aa kase Yerusalem á wa atô yô, fa nen je ner, mtim na kuma ve.

²¹Hen zum la mba ve lu ken Yudia, ve̱ yevese ve̱ yem sha iwo; mba ve lu ken atô u gar yô, ve̱ due ken won; man mba ve lu ken akôngo a gar la kpaa ve̱ de kera nyer kimi ga;

²²gadia ayange la ka a oron iyev sha u akaa a i nger cii a̱ kure sha mi vough yô.

²³Kpa kasev mba lun iyav man mba lun a ônov sha ikum sha ayange la yô, kwagh á tser ve gadia zegecan una er sha tar, man iyugh ia lu sha ikurior ne.

²⁴Vea kpe ku u ishôm; á yem a ve uikangen hen atôatyev cii; Yerusalem kpaa atôatyev á ndyar un shin angahar zan zan shighe u atôatyev á kar kuman.

²⁵Uivande vea lu sha iyange man uwer man asan, man asema aa nyian akuraior a a lu sha tar á kondo a iyol sha ci u kume u zegemnger man agôndoamnger;

²⁶asema aa yina ior sha mcie man sha mkegh u akaa a a lu van sha won la kpaa; gadia agee a a lu Sha la aa tenger.

²⁷Zum la vea nenge Wan u or Una va sha abeen, a agee a vesen kua iengem kpaa.

²⁸Kpa er akaa angan aa hiin u eren yô, nenge nen sha, kende nen ityouv sha, gadia mpaa wen mgbôghom ve.

²⁹Tsô A ôr ve injakwagh er: Nenge nen sha tur man ikon cii,

³⁰zum u ka ia hômon yô, ne nenge a mi, nahan ne fa ayol a en ner, wangernyom mgbôghom hegen ve.

³¹Nahan ne kpaa, shighe u né nenge akaa ne aa eren yô, fa nen ner, tartor u Aôndo mgbôghom ve.

³²Mimi je, m kaan ne ne, kov ne ua kar kera ga je tsô akaa ne cii aa er.

³³Sha man tar vea kar kera, kpa akaaôron Am aa kar kera mayange ga.

³⁴Kpa ver nen ishima sha ayol a en, asema a en a̱ de yoho sha hua u sha kwaghyan man sha ihundugh man sha akaa a nyian ishima a uma ne ga, iyange la i̱ de va bulun ne er kwaghhônon nahan ga;

³⁵gadia kape ia va bul a bul mba ve tem sha won cii la.

³⁶Nahan kuran nen shi eren nen msen hanma shighe cii, sha er né kuma u waren akaa a á va er la cii, man né tile sha ishigh ki Wan u or yô.

³⁷A lu tesen ken tempel ayange ayange; hanma tugh kpaa A due A za tsa sha uwo u i yer er Olev la.

³⁸Ior cii gba van hen Na ken tempel pepe je sha u ungwan Un.