Read tiv Luka 3 Bible Online

Luka 3 - tiv bible

Luka 3

¹Tsô ken inyom i sha pue kar utaan u Shisar Tiberiu lu tor, er Pontiu Pilatu lu gomna sha Yudia, Herode gema lu tor u tetera sha Galilia, man anngô na, Filibu, lu di tor u tetera sha Ituria man sha tar u Terakoniti, man Lisania kpaa lu di tor u tetera sha Abilene,

²sha ayange a Ana man Kayafa lu uzegembaupristi la yô, mkaanem ma Aôndo va hen Yohane, wan u Sekaria, ken taaikôngo.

³A va ken iningir i tar u ifi u Yordan cii, lu pasen kwagh u batisema u mgemshima sha u den asorabo;

⁴er i nger ken takerada u akaaôron a profeti Yesaia er: Imo i or u yilan ken taaikôngo er: Sôr nen gbenda u Ter kôôm nen gbenda Na jighilaa.

⁵Á cir hanma pev, hanma uwo man igungu kpaa á sambe ve, uihurenmbaigbendav vea hingir nôô, igbenda i i lu agbee agbee la ia hingir vaanaa.

⁶Man uumace cii vea nenge a myom u Aôndo.

⁷Tsô a kaa a ikpelaior i i due sha u a̱ er ve batisema la er: Ne ônov mba igbindev mban, ka anti man nan we ne kwagh er, ne̱ yevese iyugh i i lu van la ase?

⁸Nahan yô, ume nen ase atam a a kom mgemshima yô. De kera gbe kaan ayol a en ner: Se mba a ter wase Aberaham ga, gadia m ngu kaan ne mer, awen ne je kpaa Aôndo Una fatyô u geman a hingir ônov mba Aberaham.

⁹Ahegen kpaa i ver ijembe hen misekon; hanma kon u u um atam a injaa ga yô, á gber u kera, á kende ken usu.

¹⁰Nahan ikpelaior gema pine un er: Tsô sé er nana?

¹¹A gema a kaa a ve er: U nan lu a uriga uhar yô, nana̱ pande nana na u a lu a mi ga la; U nan lu a kwaghyan kpaa kape nana̱ er la.

¹²Mbangoholkpandegh kpaa va, sha u i̱ er ve batisema; ve pine un er: Ortesen se yô, se̱ er nana?

¹³A kaa a ve er: De ngohol nen kwagh i̱ hemban kwagh u i we ne la inya ga.

¹⁴Mbautyav kpaa pine un er: Man se yô, se̱ er nana? A kaa a ve er: De gbe eren nen ma or ican gbilin ga, shi de ngohol nen ma or kwagh sha apera ga; injar i i ne ne la i̱ kuma ne.

¹⁵Tsô nongo la cii lu veren ashe, lu henen ken asema a ve sha kwagh u Yohane er: Shin ka Kristu je neou?

¹⁶Nahan Yohane gema kaa a ve cii er: Mo yô, M ngu eren ne batisema sha mnger, kpa u A hembem agee ngu van, u mo m kom u saghen kwange u akôvangahar a Na ga; Wen yô, Una er ne batisema sha Icighan Jijingi man sha usu kpaa.

¹⁷Tser ngu sha uwegh Nagh, Una ese vande Na tsembelee, Una kohol uwua Na Una za ombo sha una Na; kpa akoo yô, Una nande sha usu u pirin mayange ga.

¹⁸Nahan a ôr ior Loho u Dedoo sha akaawan agen kpishi kpaa.

¹⁹Kpa er a yange Herode u tetera sha kwagh u Herodia, kwase u anngô na Filibu, man shi sha akaa a dang agen a a lu eren la yô,

²⁰Herode mase seer kwagh ne sha akaa la, a wuhe Yohane ken gaadi.

²¹Tsô mba eren ior batisema cii, mba been yô, Yesu kpaa i er Un batisema; ngur eren msen yô, i bugh Sha,

²²man Icighan Jijingi sen sha a Na sha inja i iyolough er ikungugh nahan; imo kpaa due Sha kaa er: We, U ngu Wan Wam u ishima ishima; ka We ishima i doom a We yum ye.

²³Man Yesu iyol Na, zum u A hii u tesen yô, anyom a Na kuma er ikundugber nahan; man i lu henen er Un ka wan u Yosev, wan u Heli,

²⁴wan u Matati, wan u Levi, wan u Melki, wan u Yani, wan u Yosev,

²⁵wan u Matatia, wan u Amoshi, wan u Nahum, wan u Eseli, wan u Nagai,

²⁶wan u Maati, wan u Matatia, wan u Semein, wan u Yoseki, wan u Yoda,

²⁷wan u Yoanan, wan u Resa, wan u Serubabel, wan u Shealtiel, wan u Neri,

²⁸wan u Melki, wan u Adi, wan u Kosam, wan u Elmadam, wan u Er,

²⁹wan u Yosua, wan u Elieser, wan u Yorim, wan u Matati, wan u Levi,

³⁰wan u Shimeon, wan u Yuda, wan u Yosev, wan u Yonan wan u Eliakim,

³¹wan u Melea, wan u Mena, wan u Matati, wan u Natan, wan u Davidi,

³²wan u Yese, wan u Obedi, wan u Boashi, wan u Salmon, wan u Nashon,

³³wan u Aminadabi, wan u Ademini, wan u Arni, wan u Heseron, wan u Pereshi, wan u Isaka, wan u Ademini, wan u Pereshi, wan u Yuda,

³⁴wan u Yakob, wan u Isaka, wan u Aberaham, wan u Tera, wan u Nahor,

³⁵wan u Serugi, wan u Reu, wan u Pelegi, wan u Eber, wan u Shela,

³⁶wan u Kainan, wan u Arpakasadi, wan u Shem, wan u Noa, wan u Lameki,

³⁷wan u Metusela, wan u Enoki, wan u Yaredi, wan u Mehalalel, wan u Kainan,

³⁸wan u Enoshi, wan u Setu, wan u Adam, wan u Aôndo.