Read tiv Luka 6 Bible Online

Luka 6 - tiv bible

Luka 6

¹Tsô iyange i memen igen A lu karen her atô u ishule i alakema, mbahenen Nav lu kever asagher a alakema, njighen ken ave, yan.

²Kpa Mbafarishi mbagenev kaa er: Inja na nan man ne eren kwagh u i rumun er i̱ er sha iyange i memen ga nahana?

³Yesu gema kaa a ve er: Ne mba a ôr kwagh u Davidi lu er zum u ijen kôr un, kua mba ve lu a na ityô la ga,

⁴er a nyôr ken iyou i Aôndo, a tôô ubredi mba sha ishi la, a ya, a shi a na mba ve lu a na ityô la kpaa, mba i rumun er ma or nana̱ ya ga, saa upristi tseegh la gaa?

⁵A kaa a ve er: Wan u or ka Ter u iyange i memen je.

⁶Shi sha iyange i memen igen A nyôr ken shinagoge, A gba tesen. Tsô orgen lu keregh, u nan uma uwegh ku yanegh yô.

⁷Tsô mbangeren man Mbafarishi ver ashe sha a Na er vea nenge shin Una war un sha iyange i memenou, sha u vea zua a kwagh u vea na un ibo sha mi yô.

⁸Kpa Wen fa mbamhen vev, nahan A kaa a or u uman uwegh la er: Mough sha, tile her atô. Tsô a kighir a mough a tile.

⁹Nahan Yesu kaa a ve er: Pinen Yam ne kwagh, i rumun u eren kwagh u dedoo sha iyange i memen, shin i̱ er ifere, i̱ yima a yima or shin i̱ wua a wua oro?

¹⁰Tsô A jinge sha a ve cii, A kaa a or la er: Naregh uwegh ough. A er nahan. Uwegh nagh maa hingir dedoo.

¹¹Kpa ihundugh iv ve asema, ve gba henen ayol a ve sha kwagh u vea er a Yesu yô.

¹²Tsô sha ayange la, A due A yem sha uwo sha u za eren msen; A tsa sônon Aôndo kaka.

¹³Tsô sev mbu aven yô, A yila mbahenen Nav her a Na, man A tsuwa pue kar uhar ken a ve, A yila ve er Mbaapostoli, lu:

¹⁴Shimon, u A ii un iti igen er Peteru, man Anderia, anngô na, man Yakobu man Yohane, man Filibu man Bartolomeu, man

¹⁵Mateu man Toma, man Yakobu wan u Alefeu, man Shimon u i yilan un er Ortseenshima la;

¹⁶man Yuda wan u Yakobu, man Yuda Isekarioti u a hingir or u nengen mker la.

¹⁷Tsô A hungwa a ve, A va tile hen ijiir i kpuun kpuun a mbahenen Nav kpishi man ikpelaior kpishi i ken Yudia cii man Yerusalem man hen kpe u zegemnger u Tiru man Shidon; ve va sha u ungwan Un man shi sha u i̱ war ve sha angev vev.

¹⁸Man A war mba ican i lu eren ve sha ujijingi mba hôngorouv.

¹⁹Ikpelaior cii lu nôngon u ma ve bende a Na, gadia agee due ken a Na, war ve cii.

²⁰Tsô A kende ashe sha mbahenen Nav, A kaa er: Saan ne iyol, ne mbaatsanev, gadia tartor u Aôndo ka u wen je.

²¹Saan ne iyol, ne mba ijen i ker ne hegen, gadia né va ide. Saan ne iyol, ne mba ne vaa hegen, gadia né va se.

²²Saan ne iyol zum u ior ka vea kôr ne ihom, man vea dughun ne kera, vea hee ne kpaa, man shi vea teren iti yen dang, sha ci u Wan u ôr yô.

²³Ember nen sha iyange la, tsuwe nen sha iember kpaa, gadia nenge, injar yen vese Sha; gadia kape uter vev er a uprofeti je la.

²⁴Kpa kwagh á tser ne, ne mbanyarev, gadia ne vande zuan a msurshima wen kera ve.

²⁵Kwagh á tser ne, ne mba ne idi hegen, gadia ijen ia va kôr ne. Kwagh á tser ne ne mba ne lu ahan zwa hegen, gadia né va zungwe né vaa kpaa.

²⁶Kwagh á tser ne zum u ior cii vea wuese ne, gadia kape uter vev er a uprofeti mba aiev je la.

²⁷Kpaa M ngu kaan ne mbaungwan mban ne Mer, doo nen a mbaihomov enev, eren nen a mba ve ker ne ihom la dedoo;

²⁸ver nen mba ve toho ne la dedoo; man eren nen msen sha ci u mba ve eren ne akaa a dang la.

²⁹U nana ta u sambe sha henge, gema nan kugenegh kpaa; u nana ngohol we ikondo i cirin iyol yô, de nyum nan riga kpaa ga.

³⁰Hanma or u nana sôn u kwagh yô, na nan; u nana ngohol we akaa kpaa, de pin wer i̱ hide u a mi ga.

³¹Man er i lu ne pe ior ve̱ eren a ven la, ne kpaa eren nen a ve di nahan kpaa.

³²Man aluer ka mba ne doo ve ishima la tsô vea doo ne yô, ka nyi iwuese á wuese ne a mini? Gadia mbaasorabo je kpaa, mba ve doon ve ishima la yô, ve kpaa mba doon di ve ishima je.

³³Man aluer ne eren dedoo a mba ve eren a ven dedoo yô, ka nyi iwuese á wuese ne a mini? Gadia mbaasorabo je kpaa mba eren nahan.

³⁴Man aluer ka mba ne veren ishima ner, né shi né zua a kwagh hen a ve la, man nea pwaren ve akaa yô, ka nyi iwuese á wuese ne a mini? Gadia mbaasorabo je kpaa mba pwaren mbaasorabo inyaregh, sha u shi vea zua a mi nahan vough yô.

³⁵Kpa mbaihomov enev ve̱ doo ne ishima, eren nen a ve doo doo, pwaren nen kwagh, kpa de veren nen ishima u shi ngohol kpee ga; nahan injar yen ia lu i vesen je, man né lu ônov mba Uhembansha ye; gadia Wen yô, eren dedoo a mba ve lu a ishughun ga kua mbabov kpaa.

³⁶Yô, zungwen nen mhôônom er Ter wen kpaa A zungu mhôônom yô.

³⁷De gbe nan nen or ibo gagh ga, nahan ne kpaa á kera na ne ibo gagh ga ye; de gbe kuren kwagh u or dang ga, nahan ne kpaa á kera kure kwagh wen dang ga, pase tuhwa nen, man ne kpaa á pase ne á tuhwa ye.

³⁸Na nen, nahan ne kpaa á na ne; ikaren i dedoo, i kindigh, i yegher, i ivin poo, á na i sha ikum yen, gadia ikaren i ne karen a mi ne, ka i á va kar ne sha min ye.

³⁹Shi A ôr ve injakwagh kpaa er: Orapirashe fatyô u hemen orapirashe ugen kpa? Ve uhar cii vea gba shin ihungwa gaa?

⁴⁰Orhenen hembe ortesen u nan ga; kpa hanma or u i tese nan nan kom vough yô, nana hingir er ortesen u nan nahan.

⁴¹Inja na nan man u nengen anivurkon u a lu anmgbian wou ken ishe, kpa gungurkon u u lu u ken ishe yô, u we u iko ga?

⁴²Shin u er nan man u fatyô u kaan a anmgbian wou wer: Anmgbian, de, m̱ dugh u anivurkon u a lu u ken ishe, man we iyol you, u nenge gungurkon u u lu u ken ishe la ga ase? We orimangeregh ne, vande dughun gungurkon ken ishe you kera, nahan man ú nenge doo doo er ú dugh anivurkon u a lu anmgbian wou ken ishe la kera ye.

⁴³Gadia ma kon u dedoo ngu um ityamegh ki bogh ga; man shi ma kon u bo ngu um ityamegh ki dedoo kpaa ga.

⁴⁴Hanma kon, ka sha ityamegh ki u man i fe u ye; gadia mba zer tur sha usaa ga, man shi mba zer wain sha ageva ga.

⁴⁵Orinjaa ka nan due a kwagh u dedoo ken kwagh u ikoogh u ken ishima i nan je, man orbo kpaa ka nan due di a kwagh u bo ken kwagh u bo u ken ishima i nan je; gadia ka sha m-iv u ken ishima man zwa u er kwagh ye.

⁴⁶Inja na nan man ne yerem ner, Tere! Tere! man ne eren akaa a M kaan ga?

⁴⁷Hanmô u nan ve hen Mo, nan ongo akaaôron Am, man nan eren sha mi yô, Me tese ne or u nan lu er nan yô.

⁴⁸Nan ngu er or u maan iyou nahan, nan time za shimi, nan tim imagh sha vande. Zum u mngerem iv, ikuwan ande ta sha iyou la, i fatyô u tenger i ga, sha ci u i maa i dedoo yô.

⁴⁹Kpa u nan ungwa man nan er sha mi ga yô, nan ngu er or u nan maa iyou hen tareghnyaagh, kpa imagh ki lu ga. Ikuwanmnger i va ta sha i, i gba fese, myôhôr u iyou la kaa kpee.