Read tiv Luka 8 Bible Online

Luka 8 - tiv bible

Luka 8

¹Tsô ayange nga kar ciôn yô, A gba zenden nyôron ken agar a tamen man angarev mba kiriki, lu ôron kwaghaôndo, pasen Loho u Dedoo u tartor u Aôndo; mba pue kar uhar lu a Na ityô,

²kua kasev mbagenev mba i war ve sha ujijingi mba bov man atô a uange kposo kposo, lu Maria u i yilan er Magedalena, u ujijingi mba bov due ker a na utaankaruhar la,

³man Yoana kwase u Kusa, wanakiriki u tamen u Herode man Susana, man shi mbagenev kpishi mba ve wasen ve sha ugbayol vev sha inyarev vev je yô.

⁴Er ikpelaior i kohol imôngo, man ior mba ve due ken agar kposo kposo, ve va hen Na yô, nahan A ôr ve kwagh sha injakwagh er:

⁵Ortanivor due sha u za tan ivor na. Ngur tan yô, igen haa sha gbenda; i ndyar angahar sha mi, inyon i sha va sange, ya.

⁶Igen haa sha ikuu; ngi ngur vesen yô, i use, sha ci u i zough a mndorom ga yô.

⁷Igen haa ker atô u usaa; usaa vese a i imôngo imbishi i.

⁸Igen haa hen inya i dedoo; i mende, i na mtsera kwa akunduataan. Ngur ôron akaa ne nahan yô, A genger imo A kaa er: Or u nan lu a ato a ungwan yô, nana̱ ungwa.

⁹Mbahenen Nav pine Un er inja i kwagh ne i lu yô.

¹⁰Tsô A kaa er: Ne yô, i na ne sha u né fa akaa a myer a tartor u Aôndo; kpa mbagenev yô, saa sha anzaakaa, sha ci u mnenge kpaa ve̱ de nengen ga, man m-ongo kpaa, ve̱ ungwa kpa ve̱ de kaven ga.

¹¹Injakwagh ne ka i ne: Ivor yô, ka kwaghôron u Aôndo.

¹²Mba sha gbenda yô, ka mba ve ungwa tsô diabolo va, va tsuwe ve kwaghôron la ken asema kera, sha u ve̱ de ne jighjigh i̱ yima ve ga.

¹³Mba sha ikuu mbala yô, ka mba zum u ka vea ungwa la ve rumun kwaghôron la saan saan, kpa ve kera lu a amise ga, ve na jighjigh sha anyangem kpeghee tsô, kpa shighe u imeen ia va yô, ve hide ijime.

¹⁴Ivor i i hee ken usaa la yô, ka mba ve ongo, kpa sha ijende ve la anzughul a nyian ishima man inyaregh man ugurgurmbaakaav mba uma ne gema imbishi ve, ve kera ume atam ga.

¹⁵Kpa i hen inya i dedoo yô, ka mba ve ongo kwaghôron la man ve kusu un ken ishima i mimi i dedoo man ve ume atam sha ishimawan.

¹⁶Man shi ma or ngu u nana tsar imenger man nana gema á cir ikagh sha mi, shin nana ver shin ityô gambe ga; kpa nana penda i sha daar u pendan imenger sha mi la, sha u mbanyôron ve̱ nenge a iwanger yô.

¹⁷Gadia ma kwagh ngu myer u á de duen a mi ken igbar ga; shin ken iuv u á de fan un, una due ken igbar kpaa ga.

¹⁸Nahan yô, ver nen ishima sha m-ongo u ne ongo ne, gadia hanma or u nan lu a kwagh yô, ka nan man á na nan ye; man shi hanma or u nan lu a kwagh ga yô, kwagh u nan henen er nan ngu a mi la je kpaa, á ngohol un kera.

¹⁹Tsô ngô Na kua anngôôv Nav va hen Na, kpa ve fatyô u aren her a Na ga, sha ci u ikpelaior la.

²⁰Tsô i kaa Un er: Ngôu kua anngôôv Ou ve tile ken won, ka ve ka nengen a We.

²¹Kpa A gema A kaa a ve er: Mba ve ongo kwaghôron u Aôndo, man shi ve eren sha mi kpaa yô, ka ve je, ve lu ngôm man anngôôv Av ye.

²²Tsô sha iyange igen yô, A nyôr ken tso, Wen a mbahenen Nav, A kaa a ve er: Se per nen ber yande la; nahan ve mough.

²³Kpa mba ngur yemen yô, A hungul mnyam, tsô zegeuraahumbe va haa sha ber; nahan tso gba ivin mngerem, ican lu eren ve kpishi.

²⁴Tsô ve va hen Na, ve va nder Un, ve kaa er: Tere, Tere, se mba timin! Nahan A nder, A yange ahumbe man agôndoamnger; tsô ve de, nahan huan ving.

²⁵A kaa a ve er: Jighjigh wen u nan ngu hana? Kpa er ve cia gema kpiligh ve iyol, ve gba kaan ayol a ve er: Ka nyi Or ne man A yange ahumbe kua mngerem man ve ongo Unu?

²⁶Yô, ve za, ve za ar ken tar u Gerasene u u lu teran môm a Galilia.

²⁷Mba dugh sha tar yô, orgen u ken gar va kohol Un, lu a ujijingi mba bov, de ikondo i zeren ica i gba, kera teman hen ya ga, saa hen iwar.

²⁸Zum u a nenge a Yesu yô, a gbidye vaa, a gba Un sha ishi, a genger imo taver taver er: Ka nyi i zoughom a we Yesu, Wan u Aôndo Uhembansha? M ngu zamber a We, de eren mo ican ga.

²⁹Gadia A kaa a jijingi u hôngorough la er, a̱ due ken or la kera; gadia kôron un acin imôngo; i kange un sha mshir i mande un agbe sha u kuran un, nahan kpaa a tôndo ikangenev kera, jijingi u bo zenda un a yem ken taaikôngo.

³⁰Yesu pine un er: Iti you er nyi? A kaa er: Ikpela; gadia ujijingi mba bov kpishi nyôr ken a na.

³¹Ve zamber a Na er, A̱ de kaan ve er, ve̱ yem shin ihungwa i i ze kweng la ga.

³²Ikpelaigo kpishi lu keregh, lu yan akaa sha uwo la; ve zamber a Na er, A̱ de ve vea za nyôr ken i. Tsô A rumun.

³³Nahan ujijingi mba bov mbala due ken or la kera, ve nyôr ken igo la. Ikpelaigo la hembe ayem sen shin ijem guusu shin ber, saa mnger.

³⁴Mbakuran i mba nengen ikaa la nahan yô, ve yevese; ve yem ve za ôr kwagh la ken gar man ken tar la cii.

³⁵Tsô ior due sha u vea za nenge kwagh u a er yô; nahan ve va hen Yesu, ve va kohol or u ujijingi mba bov ve due ken a na la, tema hen angahar a Yesu, haa akondo iyol, fa kwagh doo doo kpaa, nahan cier ve iyol.

³⁶Mba ve nenge la kpaa ve ôr ve er i er man i war or u ujijingi mba bov la.

³⁷Ior mba hen iningirtar u Gerasene cii, ve zamber a na er, A̱ mough hen ve kera, gadia zegemcie gba ve iyol, nahan a nyôr ken tso, A hide.

³⁸Kpa or u ujijingi mba bov due ker a na la, zamber a Na sha u ma un lu a Na ityô. Kpa Yesu na un gbenda kaa er:

³⁹Hire hen ya wou, za pase akaa a vesen a Aôndo A er u ne. Wen kpaa a yem, a gba za ôron akaa a vesen a Yesu A er un la ken gar la cii.

⁴⁰Er Yesu hide nahan ikpelaior ember sugh Un, gadia ve cii ve lu keghen Un.

⁴¹Tsô orgen va, iti na er Yairu, lu orvesen u shinagoge je. A gure hen angahar a Yesu a zamber a Na er, A̱ va ken ya na;

⁴²gadia un lu a wan u kwase môm tsô, anyom a na lu er pue kar ahar nahan, gema lu nôngon ku. Tsô Yesu ngur zan yô, ikpelaior lu imbishi Un.

⁴³Man shi kwase ugen u a lu a imborawambe anyom pue kar ahar, u a vihi inyarev nav hen mbatwerev ca ca, kpa mô ve môm fatyô u waren un ga,

⁴⁴a za va Un ken ijime a va bende mka ikondo Na; fese nahan imbor i awambe la maa tôndo.

⁴⁵Tsô Yesu kaa er: Ka anti nan bende Mo? Ve cii mba gbe nyiman yô, Peteru kua mba ve lu a na la kaa er: Ortesen, ikpelaior imbishi We ngi tan sha a We.

⁴⁶Kpa Yesu kaa er: Orgen bende Mo, gadia M kav agee due ken a Mo.

⁴⁷Kwase la nengen er un kera lu myer ga yô, a va a ikarikase iyol, a va gba inya sha ishigh ki Yesu, a pase sha ishigh ki iorough cii er i lu man un bende Un yô, man shi er i bee un fese kpaa yô.

⁴⁸Tsô Yesu kaa a na er: Wankwase, jighjigh wou u nan war u ve, yem bem bem.

⁴⁹Tsô ngur ôron nahan yô, orgen u ken ya u orvesen u shinagoge la va, va kaa er: Wan wou u kwase la saa ve, de kera shi ze Ortesen iyol ga.

⁵⁰Kpa Yesu ongo nahan yô, A gema A kaa a na er: De cie ga, gba nan jighjigh tsô, á war un.

⁵¹Tsô va nyer ken iyou la yô, A rumun ma orgen nana̱ nyôr a Na imôngo ga, saa Peteru man Yohane man Yakobu kua ter u wankwase la man ngô na tseegh.

⁵²Ve cii ve lu vaan un, gberen kwelegh. Kpa A kaa er: De kera vaan nen ga, gadia a kpe ga, ka mnyam a yav ye.

⁵³Ve gba sen Un ibumegh, sha ci u ve fa er a kpe yô.

⁵⁴Kpa ker un sha uwe yô, A yila un, A kaa er: Wan, mough sha!

⁵⁵Uma na shi hire heregh, maa a mough sha fese; A kaa er, i̱ na un kwagh u yan.

⁵⁶Kondo mbamaren nav iyol; kpa A ta ve icin er ve̱ de ôron ma or kwagh u i er ne ga.