Read tiv Duteronomi 1 Bible Online

Duteronomi 1 - tiv bible

Duteronomi 1

¹Ka akaaôron a Mose ôr Mbaiserael cii, yande Yordan ken desereti, ken Araba u a lu sha ishigh ki Sufi her atô u Paran man Tofel man Laban man Haseroti kua Di-sahabi ne.

²U moughon hen Horebi karen gbenda u sha uwo u Seir zan hen Kadeshi-barnea la, ka u tsan gbenda ayange pue kar môm.

³Tsô sha inyom i akunduahar la, uwer u sha pue kar môm sha iyange i hiihii i uwer la, Mose ôr Mbaiserael akaa a TER A kaa Un er a̱ ôr ve a la cii;

⁴er a vande hemban Shihon tor u Mbaamor, u lu tema ken Heshebon la kera, kua Ogo tor u Bashan, u lu tema ken Ashetaroti hen Ederei la kpaa.

⁵Ka yande Yordan ken tar u Moabi la, Mose kôr a mi pasen tindi ne ye; a kaa er:

⁶TER, Aôndo wase, ôr kwagh a vese hen Horebi, A kaa er: Ne tsa hen uwo ne kuma ve;

⁷yô, hembe yem nen ken tar u iwoogh u Mbaamor, man ken ajiir a a dondo a u cii, ken Araba man ken tar u iwoogh, man tar u shin upev man ken Imbusutarimese la man hen kpe u Zegemnger, ka tar u Mbakanaan man Lebanon zan zan za ar hen ifi u tamen, ka ifi u Uferati je la.

⁸Nenge, M gema tar la m na ne; yô, nyôr nen, ngohol nen tar la, u TER lu bum a uter enev, Aberaham man Isaka man Yakob, er Una na ve u, kua vor ve u ken ijime ve la.

⁹Hen shighen la m ôr kwagh a ven, m kaa mer: Me fatyô u tôôn ne, mo tswen ga;

¹⁰TER, Aôndo wen, seer ne iyenge; nenge, nyian ne ngee er asan a sha aôndo nahan.

¹¹TER Aôndo u uter enev, A̱ shi A̱ seer ne iyenge er né hemba iyenge yen i hegen ne kwa dubu je, A̱ ver ne doo doo, er A tende zwa a ven nahan yô.

¹²Á er nan man mo tswen me tôô zayol wen, ne mba ne lu ikav mbi yuhwan ne, man num wene?

¹³Yô, tsuwa nen ior sha ikwe yen, mbafankwagh man mbakavenkwagh, mba i fe ve yô, me ver ve ve̱ lu mbahemenev enev.

¹⁴Nahan ne rumun a mo, ne kaa ner, kwagh u u kaa la doo u eren.

¹⁵Tsô m tsuwa mbahemenev mba sha ikwe yen, ior mba fan kwagh, mba i fe ve yô, m ver ve, ve lu mbahemenev enev, ka ukur mba ve lu a ior dubu dubu sha ikev, man ukur mba ve lu a ior deri deri, man ukur mba ve lu a ior akunduahargber akunduahargber, man ukur mba ve lu a ior pue pue, kua mbavesen mba sha ikwe yen.

¹⁶Man hen shighe la, m kaa a mbaajiriv enev mer: Waan nen iko sha ijir i yilan i anmgbianev enev, ôr nen ijir i or a anngô u nan man shiror u a lu a nan la kpaa, sha mimi.

¹⁷Sha ijirôron kpaa, de hembe wan nen orgen iko a orgen ga, or u ikoogh ga kpaa, waan nen nan iko vough er or u ikoogh nahan, de cie nen or ashe ga, gadia ijir ka i Aôndo; kwagh u a hembe ne yô, va nen a mi her a mo, mo me ungwa un.

¹⁸Hen shighe la m wa ne akaa a né za er cii.

¹⁹Tsô se hembe hen Horebi, se nyôr zegedeserti u cier iyol u ne nenge a mi sha gbenda u zan ken tar u iwoogh u Mbaamor la, er TER, Aôndo wase, kaa se nahan; se va ar hen Kadeshi-barnea.

²⁰Tsô m kaa a ven mer: Ne ar hen tar u iwoogh u Mbaamor, u TER Aôndo A lu nan se ne ve.

²¹Nenge, TER, Aôndo wou, gema tar la na u; kôndo, ngohol nen u, er TER, Aôndo u uter ou, A kaa u nahan; de cie ga, de yen ishima kpaa ga.

²²Tsô ne cii, ne va her a mo, ne kaa ner: Sé tindi nen ior mbagenev ve̱ kar ken hemen, ve̱ za nenge tar la mker sha ci wase, ve̱ va ôr se kwagh u gbenda u sé kôndo la, man agar a sé za ar sha a yô.

²³Kwagh la doom, nahan m tsuwa ior pue kar uhar ken a ven, hanma kwe m tsuwa or môm.

²⁴Tsô ve gba unden sha uwo la, ve za ar hen pev u Esekol, ve jinge her cii.

²⁵Ve kura atam a ikon a ken tar la, ve va se a mi, shi ve va ôr se kwagh u ker kpaa, ve kaa er: Tar u TER, Aôndo wase, A lu nan se ne ka u dedoo.

²⁶Nahan kpaa, ne rumun ne kôndo ga, kpa ne gema ne hemba TER, Aôndo wen, ato, ne ungwa imo Na ga;

²⁷man shi ne gba hunan ken utenti enev, kaan ner: Ka er TER A ker se ihom man A dugh a vese ken tar u Igipiti sha u va nan se sha ikev i Mbaamor er ve̱ tim se ye.

²⁸Ka han sé yemene? Anmgbianev asev na se asema a yinan sha er ve kaa er: Ior mbala hemba se ikôr i gban man ityaven kpaa, agar kpaa ka a tamen, i maa a ugil tav za tagher sha aôndo je; se nenge a Mbaanaki keregh kpaa.

²⁹Zum la m kaa a ven mer: Ishima i̱ de yen ne ga, man de cie nen ve kpaa ga.

³⁰TER, Aôndo wen, u A hemen ne ne, Un Una nôngo ityav sha ci wen, vough er A vande eren sha ci wen ken tar u Igipiti sha ashe a en la,

³¹kua ken desereti kpaa, henpe u nenge er TER, Aôndo wou, A tôô u sha, er or ka nan tôô wan u nan nahan, sha igbenda i ne lu karen la cii zan zan ne va ar hen ijiir ne.

³²Nahan je kpaa, mayange ne na TER, Aôndo wen, jighjigh ga,

³³u A hemen ne gbenda, sha u keren ne ijiir i né haan afo; tugh yô, i lu sha usu, sha u Una tese ne gbenda u né kar yô; atetan yô, i lu sha ibeen.

³⁴Zum u TER ungwa imo i akaaôron a en la yô, ishima vihi Un, A bum er:

³⁵Mimi je, ior mba kov u bo mban ne, mô ve môm nana nenge a tar u dedoo u M bum Mer, Me na uter enev la ashe ga,

³⁶saa Kalebu wan u Yefune una nenge a u ye; man ka un kua ônov nav Me na ve tar u a ndyar nguhar sha u la, sha ci u a dondo TER a ishima i môm yô.

³⁷Mo kpaa, ishima vihi TER a mo sha ci wen, A kaa er: We kpaa ú nyôr ker ga;

³⁸ka Yosua wan u Nun, u a lu sha ishigh you la, ka un una nyôr ker ye; yô, taver un ishima, gadia ka un una na Mbaiserael vea ya dyako u u ye.

³⁹Man shi mbayev enev mba kiriki, mba ne kaa ner á va kura ve la, man ônov enev mba ve fe kwagh u dedoo shin u bo nyian ga ne, ka ve vea nyôr ker ye, ka ve Me na ve u, shi ka ve vea ngohol u ye;

⁴⁰kpa ne yô, hide nen ijime yem nen ken desereti sha gbenda u zan hen Zegemnger u Nyian la.

⁴¹Tsô ne gema ne kaa a mo ner: Se er TER kwaghbo; yô, sé kôndo sé za nôngo ityav, er TER, Aôndo wase, A kaa se nahan cii. Tsô hanmô wen kange iyol i utya seer seer sha u za unden sha uwo la, lu ne kwagh u ikoogh ga.

⁴²Kpa TER kaa a mo er: Kaa ve wer: De undu nen ga, man de nenge nen ityav kpaa ga, gadia M kera ngu a ven ga; sha er mbaihomov enev ve̱ de za hembe ne ga yô.

⁴³Kape m ôr kwagh a ven la, kpa ne ungwa ga, ne gema ne hemba TER ato, ne wa imo Na iko ga, ne cihi ne unde sha uwo la.

⁴⁴Tsô Mbaamor mba ve tema sha uwo la, due ta num sha a ven, ve cir sha a ven er iyough ka i er nahan, ve haa ne inya shin Seir zan zan va ar hen Horma.

⁴⁵Tsô ne hide ne gba vaan sha ishigh ki TER; kpa TER wa imo yen iko ga, ato tsô kpa, A ver sha a ven ga.

⁴⁶Nahan ne tsa hen Kadeshi ayange kpishi, sha iyenge i ayange a ne tema ker la.