Read tiv Duteronomi 12 Bible Online

Duteronomi 12 - tiv bible

Duteronomi 12

¹Akaawan man akaaôron a jirigh a né waan a iko, né eren sha mi ken tar u TER, Aôndo u uter ou, A ne u er u̱ ngohol u la, sha ayange a né lu uma sha won cii yô, ka a ne:

²Vihi nen ajiir, a akuraior a né za zenda a la, a lu civir mbaaôndo vev ker la kera cii, ka sha ugôgômbaiwoov man sha agungu man shin itine i hanma kon u ndor;

³yôhôl nen atse a ve a nanden nagh sha mi, hembe nen mtôm ma awenem vem, nande nen Asherim ve sha usu; gber nen ieev mbi gban a gba mbi mbaaôndo vev kera; er nen iti ve i̱ hungul hen ijiir la kera.

⁴Kpa de eren nen a TER, Aôndo wen, nahan ga.

⁵Kpa ijiir i TER, Aôndo wen, Una tsuwa ken ikwe yen cii, sha u Una ver iti Na ker, er i̱ lu ijiir Na i teman yô, ker nen i, vaan nen her;

⁶ka her kpaa né vaan a iniav yenev mbi nanden man iniav yenev mbi sôngon man môm-ken-upue enev man nagh ku kenden sha ku sha uwegh enegh man uiceghzwa enev man iniav yenev mbi sha ishima i dedoo man ônovmbaiundav mba ibua you man mba iyôngo you ye.

⁷Shi ka her né yaan kwagh sha ishigh ki TER, Aôndo wen, ne a ior enev, né ember sha hanma kwagh u ne ker ave sha mi, u TER, Aôndo wou, A ne u iveren sha mi yô.

⁸De kera eren nen er se eren nyian ne nahan ga, er hanma or ka nan gba eren kwagh u a lu vough ken ashe a nan tsô la;

⁹gadia ne mba a ar hen ijiir i memen ga, man shi hen dyako, u TER, Aôndo wou, Una na u la kpaa ga.

¹⁰Kpa zum u né per Yordan né tema ken tar u TER, Aôndo wen, Una na ne dyako sha u, man Una na ne mmem sha kwagh u mbaihomov enev cii mba ve kase ne la, man né tema bem bem yô,

¹¹shighe la ijiir i TER, Aôndo wen, Una tsuwa i, sha u Una ver iti Na i̱ luun ker la, ka ker né zaan a akaa a M kaa ne la cii ye: iniav yenev mbi nanden man iniav yenev mbi sôngon man môm-ken-upue enev man nagh ku kenden sha ku sha uwegh enegh, man uicighan mba uiceghzwa enev mba ne tsegh a TER yô;

¹²né ember sha ishigh ki TER, Aôndo wen, ne a ônov enev mba nomso man mba kasev man ikpan yen i nomso man i ukase man Orlevi u nan va nyer u a nyôr, sha ci u nan lu a kwar shin dyako a ven imôngo ga yô.

¹³Yô, kura iyol you, de gbe nan iniav you mbi nanden hen hanma ijiir i u nenge a min tsô ga,

¹⁴saa hen ijiir i TER Una tsuwa ken ma kwe wou, ka heregh ú naan iniav you mbi nanden, shi ka heregh kpaa ú eren akaa a M kaa u cii ye.

¹⁵Nahan i rumun we u sôngon inyam, ú yaan er i sar u cii, sha iveren i TER, Aôndo wou, A ver u ken uya ou cii; mba ve lu wang ga kua mba ve lu wang cii, ve̱ yaan, er ka i yaan inyam i morya man ashim nahan.

¹⁶Kpa awambe yô, de ye nen a ga, haa nen a inya er mngerem nahan.

¹⁷I rumun er u̱ yaan môm-ken-upue u iyiagh you hen uya ou ga, shin u wain wou, shin u mkurem ou, shin ônovmbaiundav mba ibua man iyôngo you kpaa ga, man shi uiceghzwa ou mba u tsegh cii, shin iniav mbi sha ishima i dedoo, shin nagh ku kenden sha ku sha uwegh ou kpaa ga;

¹⁸kpa ka sha ishigh ki TER Aôndo wou ú yaan akaa ne ye, hen ijiir i TER, Aôndo wou, Una tsuwa yô, we, man wan wou u nomso man wan wou u kwase man kpan wou u nomso man kpan wou u kwase man Orlevi u nan va nyer u a nyôr; ember sha ishigh ki TER, Aôndo wou, sha akaa a u ker ave sha mi cii.

¹⁹Kura iyol you, de nengen sha Orlevi dang ga, sha ayange a ou a u tem ken tar wou la cii.

²⁰Zum u TER, Aôndo wou, Una seer we tar wou er A tende zwa a we nahan, man ú kaa wer: Me ya inyam — gadia sar u u yan inyam; yô, gba yan ase inyam sha ishima you je tsô.

²¹Aluer ijiir i TER, Aôndo wou, A tsough sha u veren iti Na ker la, ia gba u ca yum yô, sôngo ibua you man iyôngo you i TER, Aôndo wou, A ne u la, er m ne u zwa nahan, gba yan ase hen ya wou sha ishima you je tsô.

²²Yaan i er ka i ya inyam i morya man ashim nahan, mba ve lu wang ga man mba ve lu wang cii ve̱ yaan i.

²³Ver ishima de ye awambe la mayange ga, gadia ka awambe je a lu uma ye, de ye uma a inyam imôngo ga.

²⁴De ye a ga, haa a inya er mngerem nahan.

²⁵De ye a ga; sha er á kpe u iyol we a ônov ou mba ken ijime you, aluer ú er kwagh u a lu vough sha ashe a TER yô.

²⁶Kpa uicighanmbaakaav ou mba u lu a mi man uiceghzwa ou yô, tôô ve za a mi hen ijiir i TER Una tsuwa la.

²⁷Va a iniav you mbi nanden, inyam man awambe la, va penda sha atse a nanden nagh sha mi a TER, Aôndo wou; awambe a iniav you mbi sôngon yô, i̱ gema a, i̱ haa sha atse a nanden nagh sha mi a TER, Aôndo wou, kpa inyam la yô, ya.

²⁸Ver ishima ungwa akaaôron a m kaa u ne cii, sha er á kpe u iyol a ônov ou mba ken ijime you cii, gbem sha won, aluer ú er kwagh u doon man u vough sha ashe a TER, Aôndo wou, yô.

²⁹Zum u TER, Aôndo wou Una tim akuraior sha ishigh you kera, a u ze wer ú za zenda a la, man zum u ú zenda a, ú tema ken tar u a yô,

³⁰kura iyol you, kwaghhônon a̱ de ker u sha u dondon ve ga, zum u á tim ve sha ishigh you kera la, man de timen nen sha kwagh u mbaaôndo vev sha u pinen er: Akuraior ne nga dondon mbaaôndo vev nana sha u mo kpaa ma m er nahan ga.

³¹De eren a TER, Aôndo wou, nahan ga; gadia hanma kwagh u a lu TER kwaghhôngorough a vihi Un yô, ve er mbaaôndo vev; gadia ônov vev mba nomso man mba kasev je kpaa, ka ve nande ve sha usu sha ci u mbaaôndo vev.

³²Hanma kwagh u m kaa ne cii, ka un ver nen ishima sha mi, eren nen ye; de seer nen ma kwaghgen sha mi ga, shi de panden kwagh ker kpaa ga.