Read tiv Duteronomi 17 Bible Online

Duteronomi 17 - tiv bible

Duteronomi 17

¹De ne TER, Aôndo wou, nagh sha bua shin iyôngo, kwagh u a lu a ihogholough iyol, shin u a lu a ma kwagh iyol u vihin kpaa ga, gadia nahan ka TER, Aôndo wou, kwagh u ihôngorough je.

²Aluer á kohol or u ken a we, ken hanma gar wou u TER, Aôndo wou, Una na u la, a lu nomsoor shin kwase nana lu eren ma iferkwagh sha ishigh ki TER, Aôndo wou, nana vihi ikuryan Na,

³nana za civir mbaaôndo mbagenev, nana gure ú civir ve, a lu iyange shin uwer, shin hanma kwagh u a lu ken ikum i Sha, u Mo M ne zwa ga,

⁴man i kaa u, u ungwa kwagh la yô, tôv sha min kpiligh kpiligh, aluer kwagh la una lu nahan mimi keng je, er i er kwagh u ihôngorough ken Iserael yô,

⁵due a or la, shin kwase la, u nan er ifer la, hen ihindagar you, or la shin kwase la, ta ve awen ve̱ kpe.

⁶Ka sha zwa u mbashiada uhar shin utar man á wua or u i er nan ijiir i kuugh la ye; sha zwa u shiada môm yô, i̱ de woo nan ga.

⁷Uwegh ku mbashiada la kua vande lun sha a nan sha u wuan man ave a ior mbagenev cii aa mase ye. Kape ú er man ú dugh ifer ken we kera ne.

⁸Aluer ma kwagh una hemba u u ôron ijiir na yô, á lu kwagh u iwooor, shin kwagh u kpelan, shin ivav i gberen, ayôôso a hen agar a ou la, nahan mough za hen ijiir i TER Aôndo wou Una tsuwa la,

⁹za hen Mbalevi mba ve lu upristi yô, man hen orjir u a tem ijir hen ayange la, za pine, nahan vea tese u mkur u ú kure ijir la yô.

¹⁰Er sha zwa u ve kur ijir, ve kaa u, hen ijiir i TER Una tsuwa la vough; ver ishima, er sha akaa a ve tese u la cii,

¹¹ka sha tindi u vea tese u man sha mkur u ijirigh u vea tese u la, de kahan ken uwegh ku yanegh shin ku imesegh ga.

¹²Or u nana eren kwagh sha icihi nana vendan u ungwan imo i pristi u nan lu her nan eren tom sha ishigh ki TER, Aôndo wou la, shin nana vendan imo i orjir yô, or la nana̱ kpe; kape ú er man ú dugh ifer ken Iserael kera ne.

¹³Nahan ior cii vea ungwa, vea cia, vea kera seer cihin kwagh ga.

¹⁴Zum u ú nyôr ken tar u TER, Aôndo wou, Una na u la, ú ngohol u, ú tema ker, man ú kaa wer: Me ver tor a̱ lu tor sha a mo, er akuraior a a kasem ne cii a eren nahan;

¹⁵yô, ka or u TER, Aôndo wou, Una tsuwa nan la, ka nan ú ver ye; i̱ lu or u ken anngôôv ou ú kôr nan tor nana tema tor sha a we ye; de veren or u ken nongo ugen u nan lu anngôu ga, wer nana̱ lu tor wou ga.

¹⁶Nana̱ de seer a seer anyinya kpishi sha ci u nan ga, shi nana̱ de hidi a ior ken Igipiti sha u nana̱ seer anyinya ga; gadia TER vande kaan ne je er: Mayange de kera shi hidi nen sha gbenda la ga.

¹⁷Man shi nana̱ de seer a seer kasev kpishi ga, sha er ishima i nan i̱ de danen ga yô; shi nana̱ de kohol azurfa man zenaria kpishi sha ci u nan ga.

¹⁸Tsô zum u nana teman sha ikônough nagh ki torough yô, nana̱ nger tindi ne ken ruamabera, vough er a lu sha ishigh ki Mbalevi mba ve lu upristi la nahan;

¹⁹nana̱ lu a mi, nana̱ ôron ker sha ayange a uma u nan cii; sha u nana̱ hen u cian TER, Aôndo u nan, man u wan akaaôron a tindi ne cii kua akaawan ne iko, nana̱ eren sha mi;

²⁰sha er nana̱ de gbanger sha anmgbianev mba nan nana̱ undu tindi ne nana̱ kaha ken uwegh ku yanegh shin ku imesegh ga, sha er á seer nan ayange ken tartor u nan a ônov mba nan ken Iserael yô.