Read tiv Duteronomi 21 Bible Online

Duteronomi 21 - tiv bible

Duteronomi 21

¹Aluer á kohol orgen u i woo nan i gbihi ken ikôngo, ken tar u TER, Aôndo wou, Una na u er ú ngohol u la, man á fa or u a woo nan ga yô,

²mbatamen ou man mbaajiriv ou ve̱ due ve kar ilihen, hii hen u i woo nan la, zan zan za ar sha agar a a kase nan la;

³tsô gar u una hemban lun ikua a or u i woo nan la yô, mbatamen mba hen gar la, ve̱ kôr tulebua u i lu a vande eren tom a na ga, u a lu a kpela ikyekye sha igbur kpaa ga yô;

⁴mbatamen mba hen gar la ve̱ sen a tulebua la shin pev u mngerem ma om shimi ga yô, u i lu a vande kahan kwagh shimi man i lu a vande lôôn kwagh her kpaa ga yô, ve̱ sombo tulebua la mon shin pev la;

⁵upristi, ônov mba Levi ve̱ kporom; gadia ka ve je, TER, Aôndo wou, A tsough ve sha u ve̱ eren Un tom, ve̱ naan iveren ken iti i TER, man ka sha imo ve man á kuren anyiman man hanma gbidiv kpaa ye;

⁶mbatamen mba hen gar la cii, mba ve hembe lun ikua a or u i woo nan la, ve̱ ôô ave, ve̱ haa sha tulebua u i sombo un mon shin pev la;

⁷ve̱ kaa er: Ave ase haa awambe ne ga, ashe ase kpaa nenge ga,

⁸TERE, de ior Ou, Iserael, mba U paa ve la, asorabo a ve, de deen ibo i awambe a orishôôgh i̱ lu ker atô u ior Ou Iserael ga, de ve ibo i sha awambe la.

⁹Kape ú ese awambe a orishôôgh ker a we kera, aluer u er kwagh u a lu vough sha ashe a TER yô.

¹⁰Zum u ú due u za nôngon ityav a mbaihomov ou man TER, Aôndo wou, Una na ve sha ikev you yô, ú kôr ve,

¹¹man ken mba u ker ve mbala wea nenge a kwase u doon ashe, una sar u, á lu u ka tôôn hingir kwase wou yô,

¹²va a na hen ya wou, a̱ hondo ityough nagh man a̱ tôndo akughul a na;

¹³a̱ er akondo a na, a i ker un a mi iyol la kera, a̱ tema ken ya wou a̱ zungwe ter na man ngô na uwer môm vough, ken masetyô la ú tsa a na, ú hingir nom na, un kpaa una hingir kwase wou.

¹⁴Aluer una kera doo u ga yô, de un a̱ yem henpe i sar un yô; kpa de teen un sha inyar je ga, shi de eren a na er ka kpankwase ga, sha ci u u vande nan un kunya yô.

¹⁵Aluer or á lu a kasev uhar, u môm una doo nan ishima, ugen una doo nan ishima ga, man ve uhar cii ve mar nan ônov yô, u a doo nan ishima man u a doo nan ishima ga la; man aluer waniunda u nomso una lu u a doo nan ga la yô,

¹⁶nahan sha iyange i nana kar ônov mba nan dyako u nan la, a̱ de gem wannomso u kwase u doon nan ishima la, a̱ hingir waniunda sha ityough ki wannomso u kwase u a doo nan ishima ga, u a lu waniunda jim la, ga,

¹⁷kpa nana̱ rumun waniunda u kwase u a doo nan ishima ga la, nana̱ na un kwar kwa har sha akaa a nan lu a min cii, gadia un ka mhii u agee a nan, nahan dyako u waniunda ka u na je.

¹⁸Aluer or nana lu a wan u taver ityough u aperagh u hemban ter u nan man ngô u nan atô, shin ve tsaha nan, kpa nan we ve iko ga yô,

¹⁹ter u nan kua ngô u nan ve̱ kôr nan ve̱ za a nan hen mbatamen mba hen gar u nan, hen hundagar u nan la;

²⁰ve̱ kaa mbatamen mba hen gar la er: Wan wase ne ka u taver ityough, u aperagh, ongo imo yase ga, vihin inyaregh dang dang, hundu msôrom kpaa.

²¹Nahan nomsombaiorov mba hen gar u nan la cii ve̱ ta nan awen nana̱ kpe; kape ú er man ú dugh ifer ken a we kera ne; Iserael cii vea ungwa vea cia kpaa.

²²Man aluer or á er isholibo i i kom ku man á wua nan, man ú hambe nan sha kon yô,

²³Ikom i nan i̱ de tse sha kon ga, kpa ii nan iyange la je; gadia or u i sende nan yô, Aôndo wa nan ifan; sha u u̱ de hôngor a tar u TER, Aôndo wou, Una na u dyako la ga.