Read tiv Duteronomi 23 Bible Online

Duteronomi 23 - tiv bible

Duteronomi 23

¹Or u i cagh nan ake shin i tende nan ilyeegh ki ken myer kpaa, nana nyôr ken mkohol u ior mba TER ga.

²Wan u i mar nan sha tindi u peren nana nyôr ken mkohol u ior mba TER ga; zan zan ikov pue kpaa, ma or ken tsombor u nan nana nyôr ken mkohol u ior mba TER ga.

³Oramon shin Ormoabi nana nyôr ken mkohol u ior mba TER ga; zan zan ikov pue kpaa, ma or ken a ve nana nyôr ken mkohol u ior mba TER mayange ga;

⁴sha ci u ve za kegh ne gbenda a kwaghyan man mngerem, zum u ne due ken Igipiti la ga yô, man shi sha ci u ve goho Balaam, wan u Beor, hen Petor u ken Mesopotamia, sha u a̱ va wa u ifan yô.

⁵Nahan kpaa, TER, Aôndo wou, rumun u ungwan imo i Balaam ga, kpa TER, Aôndo wou, gema ifan la, hingir we iveren, gadia u doo TER, Aôndo wou, ishima.

⁶De keren bem shin mkpeyol sha ci ve ga sha ayange a ou cii.

⁷Oredom yô, nana̱ de luun we kwagh u ihôngorough ga, gadia un ka anngôu; Origipiti kpaa, nana̱ de luun we kwagh u ihôngorough ga, gadia ngise u lu shin ken tar na.

⁸Ônov vev mba i mar sha kov u sha utar yô, vea nyôr ken mkohol u ior mba TER.

⁹Zum u ú due ú za haa afo sha u za tan num sha mbaihomov ou yô, kura iyol you sha hanma kwagh u bo.

¹⁰Aluer ma or nana lu ken a ven u nan kera lu wang ga, sha ci u kwagh u a ne nan anzughul tugh yô, nana̱ due ken akôngoafogh nana̱ de hidi nana̱ nyer ken afo ga;

¹¹kpa zum u iyange ia mgbôghom u been yô, nana̱ ôô iyol sha mnger, shighe u iyange ia mire yô, nana nyôr ken afo.

¹²Ver ijiir ken akôngoafogh i zan her,

¹³wa tôgh ken ikav you, zum u ú za ken akôngo yô, time, gema cir akôngo ou;

¹⁴gadia TER, Aôndo wou, zenden ken atô u afo ou, sha u yiman we, nan we mbaihomov ou sha ikev, nahan yô, afo ou a̱ lu wang, A̱ de nengen a kwagh u vihin her a we, A̱ undun we ga.

¹⁵Kpan u a yevese ter na a va nyer hen a we yô, de ne un sha ikev i ter na ga,

¹⁶a̱ tema a we imôngo ken atô wou, hen ijiir i a tsough, ken ma gar wou, henpe i hembe doon un yô, de eren un ican ga.

¹⁷Ma agbaga a̱ de lu ken ônkasev mba Iserael ga; ma Orsodom kpaa, a̱ de lu ken ônnomso mba Iserael ga.

¹⁸De ve a injar i idyakwase, shin injar i iwa, hen ya u TER, Aôndo wou, sha ci u hanma iceghzwa ga, gadia ve uhar cii ka TER, Aôndo wou, kwagh u ihôngorough je.

¹⁹De pwaren anngôu kwagh, wan mtser sha mi ga, shin mtser u sha inyar, shin mtser u sha kwaghyan, shin mtser u sha hanma kwagh u ka i pwar or i ya mtser sha mi yô.

²⁰Or u ken nongo ugen yô, i rumun er ú pwar nan kwagh, wan mtser sha mi, kpa de pwaren anngôu kwagh yaan mtser sha mi ga, sha er TER, Aôndo wou, A̱ ver u doo doo ken akaa cii a u ker ave sha mi ken tar u ú nyôr ú za ngohol u la.

²¹Zum u u tsegh zwa a TER, Aôndo wou, yô, de ngôôr u eren sha mi ga, gadia TER, Aôndo wou, Una ker un her a we kpee, nahan kwagh la una hingir isholibo je u er ye.

²²Kpa aluer u tsegha zwa ga yô, á lu isholibo hen a we ga.

²³Kwagh u a vande duen ken zwa wou yô, ver ishima, er sha mi, gadia u tsegha zwa a TER, Aôndo wou, sha ishima i dedoo u pase sha zwa wou iyol you je.

²⁴Zum u ú nyôr ken sule u ikon i wain u or u nan we ndor a we yô, i rumun er u̱ ya atam sha ishima you zan zan á kuma u, kpa de we ma kwagh shin ikpa you ga.

²⁵Zum u ú nyôr ken iyiagh ki ki lu shisha ki or u nan we ndor a we yô, i rumun er u̱ tôndo asagher sha uwegh ough, kpa de we louji sha iyiagh ki ki lu shisha ki or u nan we ndor a we la ga.