Read tiv Duteronomi 4 Bible Online

Duteronomi 4 - tiv bible

Duteronomi 4

¹Hegen yô, we Iserael, ungwa akaawan man atindi a m lu tesen ne mer, eren nen sha mi, sha er né lu uma né nyôr né ngohol tar u TER, Aôndo u uter enev, A lu nan ne la yô.

²De seer ne kwagh sha kwaghôron u m we ne tindi sha mi ne ga, man de panden nen kwagh sha min kpaa ga, sha er né waan atindi a TER, Aôndo wen, a m lu wan ne ne, iko yô.

³Ashe a en nenge kwagh u TER A er sha kwagh u Baal-peor la, gadia ior mba ve dondo Baal-peor cii, TER, Aôndo wou, tim ve hen a we kera.

⁴Kpa ne mba ne var a TER, Aôndo wen, yô, ne mba uma her cii, nyian.

⁵Nenge, m tese ne akaawan man atindi, er TER, Aôndo wam, A kaam yô, sha u né za eren sha a, ken tar u né lu zan sha u za ngohol u la.

⁶Waan nen a iko, eren nen sha a; gadia ka kwaghfan wen man mkav wen je la, sha ashe a akuraior a á va ungwa akaawan ne cii man aa kaa er: Mimi je zegeikurior ne ka ior i fan kwagh man i kaven kwagh kpaa.

⁷Gadia ka hanma zegeikurior je, i lu a Aôndo ikua ikua a i, er TER, Aôndo wase, zum u ka sea yila Un nahana?

⁸Man ka hanma zegeikurior je i lu a akaawan man atindi a perapera er atindi ne nahan cii, a m lu veren ne sha ishi nyian nee?

⁹Kura iyol you, ver ishima sha uma wou dedoo sha er akaawan a ashe ou a nenge a mi la, a̱ de hungul we ga, sha er sha ayange ou cii a̱ de karen we ken ishima kera ga yô, kpa tesen ônov ou a, kua shi ônov mba ônov ou kpaa;

¹⁰iyange i u tile sha ishigh ki TER, Aôndo wou, hen Horebi la, shighe u TER kaa a mo er: Kohol Mo ior cii, M̱ ôr ve akaaôron Am, ve ungwa, sha u ve̱ hen u cian Mo sha ayange a vea tsa sha won cii man sha u ve̱ tesen ônov vev a kpaa.

¹¹Ne kpaa ne kporom ne va tile hen itinewoogh la; uwo la gema lu yeghen usu je usu mande Sha, ime kpaa lu, man abeen man angôghime.

¹²TER ôr kwagh a ven, imo Na due ken atô u usu; ne ungwa imo i akaaôron, kpa ne nenge a ma kwagh sha ashe ga, saa imo la tseegh.

¹³Man A pase ne ikuryan Na, i A kaa er ne̱ er sha mi la, ka Atindiakaa a pue la; shi A nger a sha ikpande i awen ihiar.

¹⁴Hen shighe la, TER kaa a mo er, m̱ tese ne akaawan man atindi sha er né er sha a ken tar u ne lu zan sha u za ngohol u la.

¹⁵Kura nen ayol a en dedoo je, gadia iyange i TER ôr kwagh a ven hen Horebi hen atô u usu la ne nenge a ma kwagh sha ashe ga;

¹⁶sha er né de kera eren dang de dang sha u gban eev mbu been a bee ma kwagh ga, er mlu u nomsoor shin kwase nahan,

¹⁷shin mlu u hanma zendenya u a lu shin tar, shin mlu u hanma inyon i lun a akper, i purugh sha,

¹⁸shin mlu u hanma kwagh u a kper a kpela inya, shin mlu u hanma ishu i i lu shin mngerem ma shin mkur u inyaagh kpaa;

¹⁹man shi sha er u̱ de kera kenden ashe sha man zum u ú nenge iyange man uwer man asan, akum a sha la cii, ú rumun wer a̱ urugh we zan zan ú gure ú civir a ga; ka akaa a TER, Aôndo wou, A kar kwar a mi A ne akuraior a a lu sha won cii yô.

²⁰Ne yô, TER kua a ven due a ven ken usu u ken adum kera, ka ken Igipiti je la, sha u ne̱ hingir Un ikurior i dyako, er i lu nyian nahan.

²¹Man ishima vihi TER a mo kpaa sha ci wen, maa bum je er, mo me per Yordan ga, man me nyôr ken tar u dedoo u TER, Aôndo wou, A lu nan we u dyako la ga.

²²Mo yô, m ngu kpen ken tar ne, me per Yordan ga; kpa ne yô, né per, né ngohol tar u dedoo la.

²³Kura nen ayol a en, sha er ikuryan i TER, Aôndo wen, A ye a ven la, i̱ de hungul ne, né gbaan eev mbu been ma kwagh u TER, Aôndo wou, A yange u la ga.

²⁴Gadia TER, Aôndo wou, ka usu u hian, ka Aôndo u gban iwuhe je.

²⁵Zum u ú mar ônov kua ônov mba ônov ou man nea tsa ken tar la kpishi man nea va gema eren dang sha u gban eev mbu been ma kwagh, nea er kwagh u ifer sha ashe a TER, Aôndo wou, sha u bamen Un yô,

²⁶m yila Sha man tar ve̱ lu shiada sha a ven nyian, né per Yordan sha u za ngohol u la je ga; né tsa ayange kpishi ken u ga, tsô né tim purututu.

²⁷Shi TER Una sambe ne ken ior, ior enev vea mase shin kpeghee ken akuraior, henpe TER Una za haa ve la.

²⁸Né civir mbaaôndo mbagenev keregh mba ve lu tomaveegh u or, mba sha ikon man mba sha awen, mba ve nengen ga, ve ongo kpaa ga, kwagh kpaa ve ye ga, ihumakwagh kpa ve ongo ga la.

²⁹Nahan ú gba keren TER, Aôndo wou, keregh; ú zua a Na je, aluer u ker Un a ishima you cii man a uma wou cii yô.

³⁰Zum u ú lu ken ican, man akaa ne cii á tser u yô, sha ayange a masetyô, ú gema hen TER, Aôndo wou, ú ver ato sha imo Na;

³¹gadia TER, Aôndo wou, ka Aôndo u zungwen mhôônom je; Una kende u ga, shi Una tim u kpaa ga, man ikuryan i A ye a uter ou la kpaa ia hungul Un ga.

³²Yô, pine ase hegen, sha ayange a a kar la, a u lu a lu ga la, hii sha iyange i Aôndo gba or sha won la, man hii hen ikighir i Sha ne, zan zan za ar ikighir i ngila, i vande eren ma kwagh u vesen er ngun nahan mayange vee, shin i vande ungwan injakwagh ne nahan mayange kpa?

³³Mayange ma ikurior igen ungwa imo i Aôndo lu ôron kwagh ken atô u usu er we u ongo nahan man shi ve lu uma her kpa?

³⁴Ma aôndo nôngo u za tôôn ikurior sha ci na ker atô u ikurior igen sha ikaren man sha uivande man akaakpilighyol man sha utya man sha uwegh ku ageegh man uwegh ku naregh man sha akaacieryol, er TER, Aôndo wen, lu er sha ci wen ken tar u Igipiti sha ashe a en la, mayange je kpa?

³⁵Ka we i tese u a ye, sha u u̱ fa er i lu TER A lu Aôndo yô; mô gen ngu ga, saa Un tseegh.

³⁶A er u u ungwa imo Na Sha je, sha u Una tese u yô; shi A er u u nenge a zegeusu Na shin tar kpaa; u ungwa akaaôron a Na ken atô u usu je.

³⁷Ka sha ci u uter ou lu doo Un ishima man A tsuwa tsombor ve u ken ijime, man Un iyol Na A due a we sha agee Na a hemban la ken Igipiti ye,

³⁸sha u Una zenda akuraior sha ishigh you kera a a hembe ngeen a we, shi a hembe u agee kpaa, sha u Una nyôr a we, Una na u tar ve, ú ya dyako sha u, er i lu nyian nahan.

³⁹Fa ase nyian ne, koso ken ishima you kpaa, er i lu TER A lu Aôndo u Sha man u shin tar kpaa yô; mô gen ngu ga.

⁴⁰Yô, ver ishima sha akaawan a Na, man atindi a Na a m we u nyian ne, sha er á kpe u iyol yô, we kua ônov ou mba ken ijime, sha er á seer we ayange a ou ken tar u TER, Aôndo wou, A lu nan we er u̱ lu u wou gbem sha won la.

⁴¹Hen shighe la je, Mose tsegha agar atar yande Yordan sha vegher u iyange i dugh la;

⁴²Sha er or u nan woo or yô, nana̱ za ta ker; or u nan woo orgen abu man nan vande kôron nan ihom kera kpaa ga, nana̱ yevese nana̱ za ta ken gar môm u ken agar la nana̱ war:

⁴³Beser ken desereti ken tar u kpuun kpuun la sha ci u Mbaruben, man Ramoti ken Gileadi sha ci u Mbagadi, man Golan ken Bashan sha ci u Mbamanase.

⁴⁴Ka tindi u Mose ver Mbaiserael sha ishi ne.

⁴⁵Ka mbampase man akaawan man atindi a Mose ôr Mbaiserael zum u ve due ken tar u Igipiti la,

⁴⁶yande Yordan, shin pev sha ishigh ki Bete-peor, ken tar u Shihon tor u Mbaamor u iyange tema hen Heshebon la, u Mose a Mbaiserael ve hemba un zum u ve due ken Igipiti la;

⁴⁷ve ngohol tar na hingir kwagh ve, kua tar u Ogo tor u Bashan, utor mba Mbaamor uhar mba ve tema yande Yordan sha vegher u iyange i dugh la,

⁴⁸hii hen Aroer u a lu hen kpe u pev u Arnon la zan zan za ar hen uwo u Shihon (ka Hermon je la),

⁴⁹man Araba cii yande Yordan vegher u sha ityoughkitaregh zan zan za ar hen zegemnger u Araba shin soughsough u Pisega.