Read tiv YOHANE 1 Bible Online

YOHANE 1 - tiv bible

YOHANE 1

¹Sha hiihii je Imo lu; Imo la lu vea Aôndo, man Imo la lu Aôndo je.

²Un yô, lu vea Aôndo sha hiihii je.

³Akaa ci ca cii ka sha a Na i er a ye; akaa a i er la cii, i gba eren ma kwagh môm ga saa sha a Na.

⁴Ka ken a Na je uma a lu ye, man uma la gema lu iwanger i ior.

⁵Iwanger la ngi anem ken ime, kpa ime la hemba i ga.

⁶Or va, Aôndo tindi un, iti na er Yohane.

⁷Un yô, va sha u pasen kwagh, ka sha u pasen kwagh u iwanger la sha u ior cii ve̱ na jighjigh sha tom na la.

⁸Un iyol na yô, lu iwanger shon la ga, kpa a va sha er una pase kwagh u iwanger la yô.

⁹Iwanger i mimi i i wanger hanma or yô, i lu van shin tar.

¹⁰A lu shin tar, ka Un je A er tar ye; kpa tar fa Un ga.

¹¹A va hen ya Na kpa ior Nav rumun Un ga.

¹²Kpa mba ve rumun Un la yô, ve cii A na ve tahav mbu vea hingir ônov mba Aôndo, ka mba ve ne iti Na jighjigh je la;

¹³ka mba i mar ve sha awambe ga, shin sha ishima i iyolough kpaa ga, shin sha ishima i or kpaa ga, kpa ka Aôndo je mar ve ye.

¹⁴Man Imo la hingir or je, va tema her a vese, se kenger icivir Na, icivir la lu er ka i Wan u môm môm u Ter nahan, mgbough a mrumun u sha mhôôn man mimi kpaa.

¹⁵Yohane gba pasen kwagh Na, genger imo kaan er: Ngun ka Un u m ter Un, m kaa mer, Un u A lu van ken ijime yam la, ngu tamen a mo, gadia vande lun a mo.

¹⁶Gadia ka ken m-iv Na man se cii se ngohol ye, mrumun u sha mhôôn u zan hemen ken mrumun u sha mhôôn.

¹⁷Gadia i na atindiakaa a va sha ikev i Mose, kpa mrumun u sha mhôôn man mimi yô, gema ka ken Yesu Kristu ve va ye.

¹⁸Aôndo yô, mayange ma or ngu a nenge a Na ga; Wan u môm môm u A lu sha ikum i Ter la, ka Wen je A va ne i fe Un ye.

¹⁹Man ngun ka mpase u Yohane ne, zum u Mbayuda tindi upristi man Mbalevi her a na; ve due ken Yerusalem sha u ve̱ za pine un er: We yô u ngu ana?

²⁰A rumun, a nyiman ga; a rumun er: Mo m ngu Kristu ga.

²¹Nahan ve pine un er: Tsô u ngu ana? U ngu Eliya? A kaa er: M ngu un ga. Tsô u ngu profeti laa? A gema a kaa er: Ei!

²²Nahan ve kaa a na er: Tsô, u ngu an ase? Sha u ma se zough a imo i se za ôr mba ve tindi se la yô; u yer iyol you wer ana?

²³A kaa er: Mo M ngu imo i oryilan ken taaikôngo, kaan er: Kôôm nen gbenda u Ter jighilaa er profeti Yesaia kaa nahan.

²⁴Mba i tindi ve la lu Mbafarishi.

²⁵Shi ve pine un er: Tsô ka nyi u eren batisema aluer wea lu Kristu ga, man Eliya kpaa ga man profeti la kpaa ga yôô?

²⁶Yohane gema kaa a ve er: Mo m ngu eren batisema sha mnger, kpa Ugen tile ngu heen u ne fe Un ga yô;

²⁷ka u A lu van mo ken ijime je la, u kwange u akôvangahar a Na tsô kpaa m kom u me sagh ga yô.

²⁸Akaa ne er ken Betani yande Yordan, henpe Yohane eren batisema la.

²⁹Kper gen yô, a nenge Yesu lu van her a na, tsô a kaa er: Nenge Waniyôngo u Aôndo u A tee isholibo i tar kera ne, Ngula.

³⁰Ka Un shon u m kaa mer: Orgen ngu van mo ken ijime ngu tamen a mo, gadia A vande lun a mo.

³¹Mo kpaa m vande fan Un ga, kpa ka sha u pasen Un ken Iserael je m ve m va eren batisema sha mnger ye.

³²Yohane pase kwagh, kaa er: M nenge Jijingi lu senen Sha er ka ikungugh nahan, va tema sha a Na.

³³Mo kpaa m vande fan Un ga; kpa Un u A tindim sha u eren batisema sha mnger la, ka Un je A kaa a mo er: Or u u nenge Jijingi Una sen sha a Na, Una tema sha a na yô, ka Un u A eren batisema sha icighan Jijingi je la.

³⁴Yô, m nenge, m shi m ngu pasen je mer: Ngun ka Wan u Aôndo je ne.

³⁵Kper gen kpaa Yohane shi tile a mbahenen nav mbagenev uhar.

³⁶Tsô a nenge Yesu lu zenden, a kaa er: Nenge, Waniyôngo u Aôndo Ngula!

³⁷Mbahenen nav mba uhar mbala ungwa er lu ôron nahan, tsô ve dondo sha Yesu.

³⁸Yesu gem ashe yô, A nenge a ve van Un ijime, A kaa a ve er: Ka nyi ne kerene? Ve kaa a Na er: Rabi (inja na yô er, Ortesen) U tem hana?

³⁹A kaa a ve er: Va va nenge nen! Nahan ve za, ve za nenge ape A tem yô; tsô ve shi imôngo a Na iyange la. Shighe la lu er ahwa anyiin aikighe nahan.

⁴⁰Anderia anngô u Shimon Peteru lu môm ken mba uhar mba ve ungwa kwaghôron u Yohane man ve dondo Un kpaa la.

⁴¹Un hii zuan a anngô na Shimon a kaa a na er: Se zua a Mesiya ve (inja na yô, ka Kristu je la.)

⁴²A kua a na a va a na hen Yesu. Yesu kenger un kaa er: We u ngu Shimon, wan u Yona, á masen yilan we er Kefa (inja na yô er Peteru).

⁴³Kper nan yô, lu Un ka zan Galilia, tsô A zua a Filibu. Yesu kaa a na er: Dondo sha a Mo.

⁴⁴Filibu lu or u ken Betesaida, ka gar u Anderia vea Peteru je la.

⁴⁵Filibu zua a Natanael, kaa a na er: Se zua a Un u Mose nger kwagh Na ken atindi, kua uprofeti kpaa ve nger kwagh Na la, ka Yesu Wan u Yosev u a lu or u Nasareti la.

⁴⁶Natanael kaa a na er: Ma kwagh u injaa una fatyô u duen ken Nasareti kpa? Filibu kaa a na er: Yô, va va nenge.

⁴⁷Tsô Yesu nenge Natanael ngur van her a Na yô, A ter un a kaa er: Nenge, mimi je, ka or u Iserael u ma icugh i lu ken a na je ga yô.

⁴⁸Natanael kaa a Na er: Ka han U feme? Yesu gema kaa a na er: Er Filibu a lu a yila u ga je, tsô M nenge a we, er u lu hen itine i tur la.

⁴⁹Natanael kaa a Na er: Rabi, U ngu Wan u Aôndo, U ngu tor u Iserael.

⁵⁰Yesu gema kaa a na er: Ka sha ci u M kaa a we Mer, M nenge a we shin itine i tur la man u ne jighjigh yee? Yô, ú va nenge akaa a a hembe vesen a angan yô.

⁵¹Shi A kaa a na er: Mimi mimi je, M kaan ne ne, né va nenge á bugh Sha man mbatyomov mba Aôndo vea kôndon vea senen sha Wan u or.