Read tiv YOHANE 10 Bible Online

YOHANE 10 - tiv bible

YOHANE 10

¹Mimi mimi je, M kaan ne ne, or u nan nyer hen hunda u ityôr i iyôngo ga, kpa nan nyer i jiir igen yô, nan ngu ormbaiv man ornumungbenda kpaa.

²Kpa u nan nyer sha hunda yô, nan ngu orkuran u iyôngo je.

³Ka nan je man orhunda ka a bugh nan hunda ye; iyôngo i ungwa imo i nan; nan yilan i i lu i nan sha ati ati, nan due a i ken won.

⁴Nana due a i nan la cii yô, nan hemen i, iyôngo la i dondo sha a nan gadia i fa imo i nan.

⁵Kpa a lu or u i fe nan ga yô, ia dondo sha a nan ga, kpa ia yevese a yevese nan, sha ci u mba i fe ve ga la yô i kav imo ve ga.

⁶Injakwagh ne, Yesu ôr ve, kpa ve kav inja i akaa a A er ve la ga.

⁷Nahan Yesu shi kaa er: Mimi mimi je, M kaan ne ne, Mo M ngu hunda u iyôngo.

⁸Mba ve vande van a Mo cii, ka mbaiv man mbanumungbenda kpaa; kpa iyôngo ungwa ve ga.

⁹Mo M ngu hunda; aluer anti or nana nyôr her a Mo yô, á yima nan; nana nyôron, nana duen nana zuan a ijiir i yan toho.

¹⁰Ormbaiv yô, nan ve kwagh ugen ga, ka sha u nana va ii man nana wua man nana tim tsô; Mo yô, M va sha u ve̱ zua a uma, ve̱ zua a mi wuee je.

¹¹Mo M ngu Orkuranilev u dedoo; orkuranilev u dedoo ka A gbihi uma na sha ci u iyôngo.

¹²Or u eren tom sha inyar u nan lu orkuran ga, man iyôngo kpaa i lu i nan ga yô, nana nengen gbaseela van yô, nana undu iyôngo, nana yevese, gbaseela a kôr i, a sambe i;

¹³ka sha ci u nan lu or u eren tom sha inyar tsô yô, nan wa iyôngo iko ga.

¹⁴Mo M ngu Orkuranilev u dedoo; M fa mbi Yav, mbi Yav kpaa fam,

¹⁵vough er Ter A fem, Mo kpaa M fe Un nahan; man shi M ne uma Wam sha ci u iyôngo.

¹⁶M ngu a iyôngo igen i i lu hen ityôr ne ga yô, i kpaa Me va a i keng, ia ungwa imo Yam; ia hingir ikum i môm man orkuran môm kpaa.

¹⁷Ka sha ci u nahan M doo Ter ishima ye, sha ci u M ne uma Wam, sha u Me shi Me ngohol un kpaa yô.

¹⁸Ma or kpaa nan ngu ngohol Mo un ga, kpa ka Mo iyol Yam je M lu nan un ye. M ngu a tahav mbu Me na un, M ngu a tahav mbu Me shi Me ngohol un kpaa. Tindi ne M ngohol un hen Terem.

¹⁹Mpav shi mough hen Mbayuda sha ci u akaaôron ne.

²⁰Mbagenev kpishi ken a ve kaa er: Ngu a jijingi u bo, ngu hunden kpaa; inja na nan man ne veren ato sha a Na?

²¹Mbagenev di ve kaa er: Akaaôron ne ka a or u lun a jijingi u bo ga; jijingi u bo una fatyô u bughun orapirashe ashe kpa?

²²Zum la gema lu iniongo i mtsegh u tempel ken Yerusalem, lu fam.

²³Yesu lu zenden ken tempel ken kungur u Solomon.

²⁴Tsô Mbayuda va kase Un, gba pinen Un er: Ka hanma shighe je U bee se akpelan ken ishima? Wea lu Kristu je yô, kaa se gbar gbar.

²⁵Yesu gema kaa a ve er: M kaa ne, kpa ne na jighjigh ga, ityom i M eren ken iti i Terem, ka i je i pasen kwagh Wam ye.

²⁶Kpa ne na jighjigh ga, sha ci u ne lu ken iyôngo Yam ga yô.

²⁷Iyôngo Yam ngi ongo imo Yam, Mo kpaa M fa i, ngi dondon sha a Mo kpaa.

²⁸Mo m ne i uma u tsôron ia tim mayange ga, ma or kpaa nana tsuwem i sha ikev je ga.

²⁹Terem u A nem i la, hemba cii; ma or môm kpaa nana fatyô u tsuwen i sha ikev i Ter ga.

³⁰Mo a Ter ka kwagh môm.

³¹Mbayuda shi tôô awen er vea ta Un.

³²Yesu kaa a ve er: M tese ne ityom i dedoo kpishi i Terem; ka sha hanmô ken i man ne tem awen mini?

³³Mbayuda gema kaa a Na er: Ka sha ci u tom u dedoo se lu tan We awen ga, kpa ka sha ci u ityuhwanev, gadia We, U lu or tsô, U veren iyol You Wer, U ngu Aôndo.

³⁴Yesu gema kaa a ve er: I kera nger ken atindi a en er: M kaa je Mer, ne mba mbaaôndo gaa?

³⁵Aluer a yila mbala mba kwaghôron u Aôndo lu va her a ve la er mbaaôndo yô, man a fatyô u bunden icighanruamabera kpaa ga yô,

³⁶ka nyi man ne kaan a Un u Aôndo a tsegh Un, A tindi Un shin tar la, ner: U ngu tuhwan Aôndo, sha ci u M kaa Mer: M ngu Wan u Aôndo?

³⁷Aluer Mea eren ityom i Terem ga yô, de nem nen jighjigh ga;

³⁸kpa aluer Mea eren i, man nea nam jighjigh ga kpaa, na nen ityom la jighjigh; sha er ne̱ fa man ne̱ kav er Ter A lu ken a Mo, man Mo kpaa M lu ken Ter yô.

³⁹Ve shi ve gba nôngon u vea kôr Un, kpa A war sha ikev ve kera.

⁴⁰A shi A per yande Yordan, A za ape Yohane eren batisema hiihii la, A za lu her.

⁴¹Tsô ior kpishi va her a Na, ve gba kaan er: Ka mimi, Yohane er ma ivande ga, kpa akaaôron a Yohane ôr sha Or ne yô, ka mimi je.

⁴²Tsô ior kpishi na Un jighjigh keregh.