Read tiv YOHANE 12 Bible Online

YOHANE 12 - tiv bible

YOHANE 12

¹Tsô ka shin ayange ataratar a Paseka una kuma yô, Yesu va ken Betani ape Lasaru lu la, un u Yesu nder un shin mbakpenev la.

²Nahan ve yôr Un iwer her man Marta lu duen a kwaghyan Lasaru kpaa lu a mba ve tema kwaghyan a Na la imôngo.

³Tsô Maria tôô mkurem kuma pams u ikaren môm, ma nardu jim ma taver ishe kpishi, a shighe Yesu ma shin angahar, shi a ese Un angahar sha ice na; iyou la cii mgbough a ihuma i mkurem mara.

⁴Kpa Yuda Isekarioti, orhenen Na ugen, u una va nenge mker sha a Na la, kaa er:

⁵Ka nyi man i tee mkurem man i yam sule deri utar i ne mbaatsanev ga?

⁶A kaa nahan, kpa lu sha ci u a wa mbaatsanev iko ga, kpa lu sha ci u un lu ormbaiv yô, man er a tilin ikpanyar yô, a dughun kwagh u i we kimi la.

⁷Tsô Yesu kaa er: De nen un, a koso ma sha ci u iyange i m-ii Wam.

⁸Gadia ne mba a mbaatsanev gbem, kpa Mo yô, né kera lu a Mo her a ven gbem ga.

⁹Tsô ikpelaior kpishi i ken Mbayuda ungwa er ngu her nahan ve va, lu sha ci u Yesu tseegh ga, kpa lu sha u vea nenge a Lasaru u A nder un shin mbakpenev la kpaa.

¹⁰Kpa upristi mba tamen gba henen imôngo er Lasaru kpaa vea wua un;

¹¹gadia Mbayuda kpishi lu zan za nan Yesu jighjigh sha kwagh na la.

¹²Kper nan ikpelaior kpishi i i va iniongo la ungwa er Yesu A lu van ken Yerusalem yô,

¹³nahan ve tôô andar a avilegh, ve due u za keghen Un gbenda, ve gba genger imo, kaan er: Hosana! I̱ wuese Un u A ve ken iti i Ter la, ka Tor u Iserael je la.

¹⁴Yesu zough a wanjaki yô, A tema sha mi, er i nger nahan la er:

¹⁵De cie ga, wankwase u Shion, nenge Tor wou ngu van, A tema sha wanjaki.

¹⁶Akaa la mbahenen Nav kav a sha hiihii la ga, kpa zum u i na Yesu icivir kera yô, ve mase umbur er i nger akaa ne sha a Na, man er i er Un a kpaa yô.

¹⁷Ikpelaior i i lu vea Na zum u A yila Lasaru shin uwar man A nder un shin mbakpenev la, ve pase kwagh la.

¹⁸Ka sha ci u kwagh ne kpaa ikpelaior due, za kohol Un sha gbenda sha ci u ve ungwa er A er ivande la yô.

¹⁹Tsô Mbafarishi kaa ayol a ve er: Ne nenge kpa, mayange kwagh wen ngu zan hemen ga; nenge, tar cii ngu dondon Un ijime.

²⁰Mba ve zaan sha u za civir Aôndo sha iniongo la yô, Mbagrika mbagenev kpaa lu ker.

²¹Nahan ve va hen Filibu u a due ken Betesaida u Galilia la, ve kaa a na er: Tere, ka se ka nengen a Yesu.

²²Filibu va, va kaa Anderia; man Anderia vea Filibu ve va kaa Yesu.

²³Kpa Yesu gema kaa a ve er: Shighe kuma u a na Wan u or icivir ve.

²⁴Mimi mimi je, M kaan ne ne, aluer ishangewua ia gba hen inya ia kpe ga yô, ia lu di her môm tsô; kpa aluer ia kpe yô, ia mar kpishi.

²⁵Or u uma u nan a doo nan yô, uma la una saa nan; kpa u nan ker uma u nan ihom shin tar ne yô, nana lu a mi zan zan uma u tsôron.

²⁶Aluer anti or nana eren Mo tom yô, Ter Una civir nan, nana̱ dondo sha a Mo; hen ape Mo M lu la, ka her je man or u nan eren Mo tom kpaa nana lu ye. Aluer anti or nana eren Mo tom yô, Ter Una civir nan.

²⁷Hegen ishima ngi tan Mo kwe, tsô shi Me kaa nana? Tere, yimam due a Mo hen shighe ne kera! Kpa ka sha ci u kwagh ne je man M ve hen shighe ne ye.

²⁸Tere, na iti You icivir. Tsô imo due Sha kaa er: M vande civir i, Me shi Me civir i kpaa.

²⁹Ikpelaior i i tile her la ungwa i nahan ve kaa er: Aôndo kume ve! Mbagenev kaa er: Ka ortyom u Sha a er kwagh a Na ye.

³⁰Yesu gema kaa er: Imo ne i va, ka sha ci Wam ga, kpa ka sha ci wen.

³¹Ka hegen je i lu u ôron tar ne ijiir ye; ka hegen je á dugh tor u tar ne kera ye.

³²Man Mo zum u á tôôm shin inya á kendem sha yô, Me urugh ior cii her a Mo.

³³A ôr kwagh ne nahan, lu sha inja i kuugh i Una kpe yô.

³⁴Tsô ikpelaior gema kaa a Na er: Se ungwa ken atindi er Kristu Una lu gbem; man er nan U kaan Wer, á kende Wan u or sha kenge? Wan u or la ka ana?

³⁵Yesu gema kaa a ve er: Iwanger hira ngi her a ven anyangem kpeghee; zende nen er ne lu a iwanger her ne, sha u ime i̱ de kohol ne ga yô. U nan zenden ken ime yô, nan fe hen ape nan ze ga.

³⁶Er ne lu a iwanger her ne, na nen i jighjigh sha u né hingir ônov mba iwanger yô. Yesu ôr akaa ne nahan A yem, A za yer iyol Na.

³⁷Kpa shin er A er uivande kpishi sha ishiv vev, nahan kpaa ve na Un jighjigh ga,

³⁸sha er kwaghôron u profeti Yesaia lu ôr la a̱ kure sha mi vough yô, er: Tere, ka an je nan ne kwagh u i ongo hen vese la jighjighi? Man i pase uwegh ku Ter hen ana?

³⁹Ka sha ci u nahan man ve fatyô u nan jighjigh ga ye, sha er Yesaia shi kaa er:

⁴⁰A pir ve ashe, shi A cighir ve asema kpaa, sha u ve̱ de nengen sha ashe ve ga yô, shi ve̱ de kaven ken ishima man ve̱ gema ishima, M̱ war ve ga.

⁴¹Akaa ne Yesaia ôr sha ci u a nenge icivir Na shi a ôr kwagh Na kpaa yô.

⁴²Nahan kpaa mbavesen mbagenev na Un jighjigh; kpa sha ci u Mbafarishi yô, ve kera pase nahan ga, sha u i̱ de dughun ve ken shinagoge kera ga yô;

⁴³gadia icivir i ior hemba doon ve a icivir i Aôndo.

⁴⁴Tsô Yesu genger imo kaa er: Or u nan nem jighjigh yô, ka Mo nan nem jighjigh ga, kpa ka Un u A tindim la,

⁴⁵man shi or u nan nenge a Mo yô, nan ngu nengen a Un u A tindim la.

⁴⁶Mo M va shin tar ne er iwanger nahan, sha u hanma or u nan jighjigh yô, nana̱ de kera luun ken ime her ga yô.

⁴⁷Man shi aluer anti or nana ungwa mkaanem Am, kpa nana wa ma iko ga yô, Me ôr nan ijir ga; gadia M va sha u Me ôr tar ijir ga, kpa ka sha u Me yima tar yô.

⁴⁸Or u nan vendem man nan rumun mkaanem Am ga yô, nan ngu a orjir, ka kwaghôron u M er ne je, ka un man una ôr nan ijir sha iyange i masetyô ye.

⁴⁹Gadia M gba ôron kwagh sha tahav Av ga; kpa ka Ter u A tindim la je, A nem tindi sha kwagh u Me kaa man shi Me ôr kpaa ye.

⁵⁰Man shi M fa tindi Na ka u uma u tsôron je. Nahan akaa a M lu ôron ne ne M ngu ôron vough er Ter A kaam nahan.