Read tiv YOHANE 14 Bible Online

YOHANE 14 - tiv bible

YOHANE 14

¹Asema a̱ de kera te ne kwe ga; na nen Aôndo jighjigh, Mo kpaa nam nen jighjigh.

²Ken ya u Terem ayou nga kpishi; a lu nahan ga yô, ma M kaa ne; gadia Me yem sha u Me za sôr ne ijiir.

³Me yem Me za sôr ne ijiir yô, Me shi Me hide, Me va kua a ven sha er ne kpaa né lu hen ape M lu yô.

⁴Hen ape M lu zan kpaa, ne fa gbenda.

⁵Toma kaa a Na er: Tere, se fa hen ape U lu zan ga, nahan sé er nan man sé fa gbenda?

⁶Yesu kaa a na er: Mo M ngu gbenda man mimi man uma kpaa. Ma or gbe van hen Terem ga, saa nana kar her a Mo.

⁷Nea fem yô, ma ne fe Terem kpaa; hii hegen je zan zan ne fa Un ve, ne nenge a Na kpaa.

⁸Filibu kaa a Na er: Tere, tese se Ter, tsô á kuma se.

⁹Yesu kaa a na er; M ngu a ven ayange ngee, nahan kpaa, we Filibu, u fam gaa? U nan nenge a Mo yô, nan nenge a Ter je ve; man er nan u kaan wer: Tese se Tere?

¹⁰U na jighjigh er Mo M lu ken Ter, Ter kpaa A lu ken a Mo gaa? Mkaanem ma M er ne ne, M er ma ka sha tahav av ga kpa ka Ter u A lu ken Mo la, A eren ityom Na ye.

¹¹Nam nen jighjigh er M lu ken Ter, Ter kpaa A lu ken a Mo yô; gayô, nam nen jighjigh sha ci u ityom la iyol i i.

¹²Mimi mimi je, M kaan ne ne, u nan nem jighjigh yô, ityom i M eren ne, nan kpaa nana er i; i i hembe ingin je kpaa nana er, sha ci u M lu yemen hen Ter yô.

¹³Man nyityô kwagh i ne sôn ken iti Yam yô, Me er i, sha er Ter A̱ zua a icivir ken Wan yô.

¹⁴Aluer ne sôn nyityô kwagh ken iti Yam yô, Me er i.

¹⁵Aluer Mea doo ne ishima yô, né kuran atindi Am.

¹⁶Me sôn Ter, man Una na ne Orsurunshima ugen u Una lu a ven gbem yô,

¹⁷ka Jijingi u mimi u tar u fetyô u ngohol Un ga yô, gadia ngu nengen a Na ga, mfe kpaa u fa Un ga; ne yô, ne fa Un, gadia ngu a ven, shi Una lu ken a ven kpaa.

¹⁸Me undu ne icôghol ga, M ngu van her a ven.

¹⁹Mase shin ciôn man tar ua kera nenge a Mo ga; kpa ne yô, né nenge a Mo, sha ci u Mo M lu uma, ne kpaa né va lu uma yô.

²⁰Sha iyange la né fa er M lu ken Terem ne kpaa ne lu ker a Mo, man Mo di kpaa M lu ken a ven yô.

²¹Or u nan lu a atindi Am, man nan we a iko kpaa yô, ka nan je, M doo nan ishima ye. Or u M doo nan ishima kpaa, nana doo Terem ishima; Mo kpaa nana doom ishima, man Me pase iyol Yam her a nan kpaa.

²²Tsô Yuda, kpa ka u Isekarioti la ga, kaa a Na er: Tere á hii nan man ú pase iyol You hen vese, á kera lu hen tar ga?

²³Yesu gema kaa a na er: Aluer Mea doo or ishima yô, nana kuran kwaghôron Wam, Terem kpaa nana doo Un ishima; Sé va her a nan Sé va er ijiir i tsan her a nan kpaa.

²⁴Or u M doo nan ishima ga yô, nan we kwaghôron Wam iko ga; kwaghôron u ne ongo ne kpaa, ka u Wam ga, kpa ka u Ter u A tindim la.

²⁵Akaa ne M ôr ne je, er M lu a ven her yô.

²⁶Kpa Orsurunshima, ka Icighan Jijingi je la, u Ter Una tindi ken iti Yam yô, ka Un je, Una tese ne akaa cii, man shi Una umbur ne akaa a M er ne cii kpaa ye.

²⁷M ngu veren ne bem, M ngu nan ne bem Wam; M ngu nan ne, kpa ka er tar u ne nahan ga. Asema a̱ de kera te ne kwe ga, man shi de kera cie nen kpaa ga.

²⁸Ne ungwa er M kaa ne Mer, Me yem kpa Me shi Me va her a ven. Mea doo ne ishima yô, ma ne ember sha ci u M lu yemen hen Ter yô; gadia Ter hembam.

²⁹Man hegen M vande kaan ne je, er i lu a er ga yô, sha u né na jighjigh zum u ia va er yô.

³⁰Me kera seer ôron kwagh a ven kpishi ga; gadia tor u tar ne ngu van, ngu a ma ityôkwagh sha a Mo ga,

³¹kpa tar u̱ fa er Ter A doom ishima, man shi M eren er Ter A wem kwagh yô. Mough se yem nen heen kera.