Read tiv YOHANE 17 Bible Online

YOHANE 17 - tiv bible

YOHANE 17

¹Zum u Yesu ôr akaa ne kera yô, A kende ashe Sha, a kaa er: Tere, shighe kuma, na Wan Wou icivir, sha er Wan Wou kpaa A̱ na U icivir yô,

²gadia U na Un tahav sha uuma cii, sha u mba U ne Un cii A̱ na ve uma u tsôron yô.

³Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.

⁴M na U icivir shin tar ne, er M kur tom u U nem wer, M̱ er la.

⁵Hegen yô, Tere, nam icivir hen We, sha icivir i M lu a mi her a We je, er i lu a gba tar ga la.

⁶M pase iti You hen ior mba U tsough ve shin tar ne, U nem la. Ve lu mba Ou je man U gem ve U nem ye; ve kpaa ve wa kwaghôron wou iko.

⁷Hegen yô, ve fa er akaa a U nem cii, i lu her a We a dugh yô;

⁸gadia akaaôron a U nem, M na ve, ve ngohol, ve fa mimi je er M dugh her a We yô, man ve na jighjigh er i lu We, U tindim yô.

⁹M ngu eren msen sha ci ve; ka sha ci u tar M eren msen ga, kpa ka sha ci u mba U nem la, gadia ka mba Ou je.

¹⁰Akaa a a lu a Am cii ka a Ou, a Ou di kpaa ka a Am je, shi i nam icivir ken a ve kpaa.

¹¹Kera lun Yam shin tar ne ga, kpa mban yô, mba shin tar ne heregh; Mo yô, M ngu van hen We, Icighan Ter. Mba U nem la, kuran ve ken iti You sha u ve̱ lu kwagh môm er se nahan.

¹²Er M lu a ve, M kuran mba U nem la, ken iti You. M kumba ve doo doo, mô ve môm kpaa saa ga, saa wan u mtim, sha er icighanruamabera una kure sha mi yô.

¹³Kpa hegen yô, M ngu van hen we, man akaa angan M ngu ôron shin tar ne sha er vea iv a iember Yam gbing yô.

¹⁴M na ve kwaghôron Wou, kpa tar kôr ve ihom, sha ci u ve lu ior i tar ne ga yô, er Mo kpaa M lu or u tar ne ga nahan.

¹⁵M ngu eren msen Mer: Kura ve shin tar ne kera ga, kpa M ngu sônon Mer kura ve sha ifer.

¹⁶Ve mba ior i tar ne ga, er Mo kpaa M lu or u tar ne ga nahan.

¹⁷Tsegha ve ken mimi, ka kwaghôron Wou je a lu mimi ye.

¹⁸Er U tindim shin tar ne nahan, Mo kpaa, kape M tindi ve shin tar ne je ne.

¹⁹Man ka sha ci ve je M lu tseghan iyol Yam ye, sha er ve kpaa i̱ tsegha ve ken mimi yô.

²⁰Man ka sha ci u mban tseegh M eren msen ga, kpa ka sha ci u mba vea va nam jighjigh sha kwaghôron u mban la kpaa,

²¹sha u ve cii ve̱ lu kwagh môm, er We Ter, U lu ken a Mo, Mo kpaa m lu ken a We nahan, sha u ve kpaa ve̱ lu ken avese; sha er tar u̱ na jighjigh er U tindim yô.

²²Man icivir i U nem la, M na ve, sha u ve̱ lu kwagh môm er se se lu kwagh môm nahan.

²³Mo ken a ve, man We di ken a Mo, sha u ve̱ hingir kwagh môm vough yô; sha er tar u̱ fa er We U tindim man shi er ve doo U ishima er M doo U ishima nahan kpaa yô.

²⁴Tere, mba U nem yô, kam ka ve̱ lu a Mo imôngo ape M lu la, sha u ve̱ nenge icivir Yam i U nem la; gadia M doo U ishima je er i lu a gba tar ga yô.

²⁵Ter u perapera, tar fa U ga, kpa Mo M fa U, man mban kpaa fa er We U tindim yô.

²⁶Man M pase ve iti You; Me shi Me pase ve i kpaa; sha u dooshima u M doo U la, a̱ lu ken a ve, Mo kpaa M̱ lu ken a ve yô.