Read tiv YOHANE 19 Bible Online

YOHANE 19 - tiv bible

YOHANE 19

¹Tsô Pilatu kôr Yesu, gbidye Un akpa.

²Mbautyav tume atsar sha saa, penda Un sha ityou, haa Un riga u nyian dindee,

³ve va her a Na, ve kaa er: Se sugh U, Tor u Mbayuda. Shi ve gba tan Un ishambe.

⁴Pilatu shi due ken won, za kaa a ve er: Nenge nen, m ngu duen a Na ken won her a ven sha er ne fa er m zough Un a kwaghbo ga yô.

⁵Tsô Yesu due ken won a atsar a saa man riga u nyian dindee iyol. Nahan Pilatu kaa a ve er: Nenge nen or ne.

⁶Nahan upristi mba tamen man udugwer mba nengen a Na yô, ve gba genger imo kaan er: I̱ mande Un sha terankon, i̱ mande Un sha terankon. Pilatu kaa a ve er: Kôr nen Un ayol a en, za mande nen sha terankon, gadia mo m zua Un a kwaghbo ga.

⁷Mbayuda gema kaa a Na er: Se mba a tindi man sha tindi wase la yô, A kuma ku, sha ci u A veren iyol er Un ngu Wan u Aôndo je yô.

⁸Tsô er Pilatu ongo kwagh ne nahan yô, shi seer cier un iyol,

⁹nahan a shi a nyôr ken ya u gomna, a kaa a Yesu er: U ngu Or u hana? Kpa Yesu bugh un zwa ga,

¹⁰Nahan Pilatu kaa a Na er: U bughum zwa gaa? U fa er m lu a tahav mbu me pase U me tuhwa, man shi m lu a tahav mbu me mande U sha terankon kpaa gaa?

¹¹Yesu gema kaa er: Aluer a ne u tahav mbu mbu sen sha la ga yô, ma u lu a ma tahav sha a Mo ga; nahan yô, or u nan lu nan Mo sha ikev you la, nan hemba ngun a isholibo.

¹²Hii hen shighe la je Pilatu gba keren ian i pasen Un tuhwan, kpa Mbayuda genger imo, kaa er: Aluer u pase or ne yô, u ngu ikar u Shisar ga; hanma or u nan veren iyol er nan ngu tor yô, nan ngu hendan kwagh a Shisar.

¹³Pilatu ongo akaaôron ne nahan yô, a due a Yesu ken won, a za tema sha ikônough ki orjir ki hen ijiir i i yilan er, vande man ken zwa u Heberu er, Gabata.

¹⁴Lu sha iyange i kohol iyol i Paseka je, kuma er ahwa ataratar nahan; tsô a kaa a Mbayuda er: Nenge nen tor wen!

¹⁵Kpa ve genger imo er: I̱ yem a Na kera, i̱ yem a Na kera. I̱ za mande Un sha terankon. Pilatu kaa a ve er: M̱ mande Tor wen sha terankono? Upristi mba tamen gema kaa er: Se mba a tor ga, saa di Shisar tsô.

¹⁶Tsô a maa a na ve Un sha u i̱ za mande Un sha terankon yô.

¹⁷Nahan ve kôr Yesu, ve yem a Na. Man er A tôô terankon iyol Na yô, A due A za hen ijiir i i yilan er ijiir i igbôndotyou la, man ken zwa u Heberu yô, er Golgota.

¹⁸Ve mande Un sha terankon her man mbagenev uhar a Na imôngo kpaa; u môm keen u môm keen, Yesu lu her atô.

¹⁹Shi Pilatu nger kwaghyôôn var sha terankon la; i nger er: Yesu Ornasareti, Tor u Mbayuda.

²⁰Kwaghyôôn shon la Mbayuda kpishi ôr un; gadia ijiir i i mande Yesu sha terankon la, lu ikua ikua a gar; man i nger un ken zwa u Heberu, man u Romanu, man u Grika.

²¹Tsô upristi mba tamen mba Mbayuda kaa a Pilatu er: De ngeren wer: Tor u Mbayuda ga, kpa nger wer: Kaan er: M ngu Tor u Mbayuda je.

²²Pilatu gema kaa er: Kwagh u m nger yô, m nger je ve.

²³Tsô mbautyav mba manden Yesu kera yô, ve kura akondo Na, ve ver atihi anyiin, tihi môm sha ci u hanma orutya, kua riga u vesen kpaa. Riga la lu a ikoron ga, lu diem cii, tume shin inya.

²⁴Nahan ve kaa ayol a ve er: Se ande nen un ga, kpa se er nen ishor sha mi, man sé fa or u una lu u nan ye; sha er kwagh u icighanruamabera lu kaa la, a̱ kure sha mi vough yô, er: Ve kar akondo Am her ayol a ve, ve er ishor sha riga Wam. Akaa ne mbautyav er a.

²⁵Tsô hen terankon u Yesu la yô, ngô Na tile heregh kua anngô u ngô Na u kwase, ka Maria, kwase u Kelopa, man shi Maria Magedalena kpaa.

²⁶Tsô Yesu nengen er ngô Na a til her kua shi orhenen u a doo Un ishima la yô, A kaa a ngô Na er: Kwase, nenge ka wan wou je ne.

²⁷Shi A gema A kaa a orhenen la er: Nenge ka ngôu je ne. Hii hen shighe la je maa orhenen la kua a na yem a na ken ya na.

²⁸Ken masejime la, Yesu fe er akaa cii a kur yô, A kaa er: Imura kôrom. Lu sha u icighanruamabera una kure sha mi vough yô.

²⁹Hen ijiir la ityumnger lu heregh a vineger poo; tsô ve tôô kileyongo, ve shindi sha iyiagh ki hisop, ve za Un a mi sha zwa.

³⁰Yesu ngohol vineger la yô, A kaa er: Bee ve. Tsô A suwa ityough, A na jijingi Na kera A sule.

³¹Er lu shighe u kohol iyol man shi er i doo u akomaior á lu sha terankon sha iyange i memen ga yô, sha ci u iyange i memen la lu zegeyange je yô, nahan Mbayuda zamber a Pilatu er i̱ kever angahar a ve, i̱ tôô ve kera.

³²Tsô mbautyav va kever angahar a u hiihii la, man a u keela, u i mande un a Na imôngo la kpaa.

³³Kpa mba ve hen Yesu, mba nengen er A vande kpen kera yô, ve kera kever Un angahar ga.

³⁴Kpa u môm ken mbautyav mbala kuma Un iwange hen ihan; nahan awambe man mngerem due.

³⁵Man un u a nenge la a er shiada sha mi, shiada na kpaa ka u mimi; a shi a fa kwagh u un kaa la ka u mimi je, sha u ne kpaa ne na jighjigh yô.

³⁶Gadia akaa ne er sha er icighanruamabera a̱ kure sha mi vough yô, er: Á kever Un ma kuhe ga.

³⁷Shi icighanruamabera ugen kpaa kaa er: Vea nenge Un u ve kom Un la.

³⁸Ken masejime u akaa la, Yosev u Arimatia, un u a lu orhenen u Yesu, kpa lu ken myer, sha ci u cian Mbayuda la, a zamber a Pilatu er, ma un tôô ikom i Yesu kera, Pilatu rumun. Tsô a za a za tôô ikom i Yesu kera.

³⁹Shi Nikodemu u yan hii van hen Na tugh la, kpaa va, a va a mire u i nongo sha alue yô, iyohov nav kuma er pams u ikaren akunduataan nahan.

⁴⁰Tsô ve tôô ikom i Yesu la, ve kange sha akondo kua akaahumandoon sha inja i m-ii u Mbayuda.

⁴¹Yô, ape i mande Un sha terankon la, sule lu her; uwar u he lu ken sule la, u i lu a ii or ker mayange ga.

⁴²Ka ken u je ve ii Yesu, sha ci u iyolkohol i Mbayuda gadia uwar la lu hen ijiir la ikua ikua.