Read tiv YOHANE 2 Bible Online

YOHANE 2 - tiv bible

YOHANE 2

¹Sha iyange i sha utar la iniongo i kwasehe lu ken Kana u Galilia; ngô u Yesu kpaa lu heregh.

²I lôhô Yesu iniongo i kwasehe la kua mbahenen Nav kpaa.

³Wain yen yô, ngô u Yesu va kaa a Na er: Ve mba a wain ga.

⁴Yesu kaa a na er: Kwase, ka nyi i zoughom a we? Shighe Wam ngu a kuma ga.

⁵Ngô Na kaa a mbaerentom mbala er: Hanma kwagh u Una kaa ne yô, er nen je.

⁶Uzwar mba awenev lu her ataratar sha inja i mwangeryol u Mbayuda, hanma zwar kpaa kuma galon ikundu shin ikundugber nahan.

⁷Yesu kaa a ve er: Iv nen mngerem shin uzwar mban. Ve iv ve lev lev.

⁸A kaa a ve er: Kese nen hegen, za nen a mi hen oriniongo; tsô ve tôô.

⁹Oriniongo ungwa mngerem ma i gem ma ma hingir wain la, kpa a fa ape i zough a mi ga (kpa mbatomov mba ve kese mngerem mala yô ve fa), nahan oriniongo la yila orkwasehe,

¹⁰kaa a na er: Hanma or ka nan vande nan wain u dedoo, ior vea man kpishi yô, ka masen van a u doon ga la; kpa we yô, u gema u koso wain u dedoo zan zan hegen.

¹¹Ivande i hiihii ne yô, Yesu er ken Kana u Galilia, A tese icivir Na ken igbar; mbahenen Nav kpaa na Un jighjigh.

¹²Ken masejime la yô, a yem shin Kapernahum, Un vea ngô Na man anngôôv Nav, kua mbahenen Nav; keela yô ve tsa ayange ngee ga.

¹³Paseka u Mbayuda mgbôghom yô, Yesu za ken Yerusalem.

¹⁴A za zua a mba ve lu teen ibua kua iyôngo man mkungum ken tempel, man shi mbamusaninyaregh kpaa ve tema ker.

¹⁵Tsô A tôô ikar A tume akpa sha ikar, A zenda ve ken tempel kera cii, iyôngo kua ibua kpaa; inyaregh ki mbamusaninyaregh yô, A haa ki inya. A mgbegha utebul vev kera kpaa.

¹⁶A gema A kaa a mbateenmkungum la er: Yem nen a akaa angan kera, de gem nen iyou i Terem, i̱ hingir iyou i kasua ga.

¹⁷Nahan mbahenen Nav umbur er i nger er: Ishima i veren i sha iyou You la ia wuam.

¹⁸Nahan Mbayuda gema kaa a Na er: Ka nyi ivande U tese se er U eren akaa a angana?

¹⁹Yesu gema kaa a ve er: Yôhôl nen tempel ne kera, Mo Me maa un sha ayange atar.

²⁰Tsô Mbayuda kaa er: I maa tempel ne anyom akunduahar kar ataratar, nahan We, Ú gema Ú maa un ayange ataraa?

²¹Kpa Un yô, lu ôron kwagh u tempel u iyol Na la.

²²Nahan zum u i nder Un shin mbakpenev kera la, mbahenen nav umbur er lu kaa kwagh ne yô. Tsô ve na icighanruamabera jighjigh man kwaghôron u Yesu lu ôr la kpaa.

²³Man er A lu ken Yerusalem sha iniongo i Paseka la yô, ior kpishi na iti Na jighjigh er ve nenge uivande mba A lu eren la yô.

²⁴Kpa Yesu yô, na ve jighjigh ga A na iyol Na sha ikev ve kpaa ga, sha ci u A fe ior cii,

²⁵man shi sha ci u kwagh gbe Un a ma or u nana pase mlu u orgen ga yô, gadia Un iyol Na A fa kwagh u a lu ken or yô.