Read tiv YOHANE 7 Bible Online

YOHANE 7 - tiv bible

YOHANE 7

¹Ken masejime u akaa ne yô, Yesu gba zenden ken Galilia, gadia lu Un pe zenden ken Yudia ga, sha ci u Mbayuda keren Un a ku yô.

²Hen shighe la iniongo i Mbayuda i Atumbe i mgbôghom.

³Nahan mba ve lu ngô môm a Na la kaa a Na er: Mough heen, yem ken Yudia sha er mbahenen Ou ve̱ nenge ityom i U eren ne yô.

⁴Gadia ma or ngu u nan keren er i̱ fa nan ken igbar man nan gem nan eren akaa ken myer ga. Aluer Wea eren akaa ne nahan yô, pase iyol You sha won.

⁵Gadia mba ve lu ngô môm a Na la je kpaa na Un jighjigh ga.

⁶Tsô Yesu kaa a ve er: Shighe Wam ngu a kuma ga; kpa shighe wen yô, ngu her gbem.

⁷Tar fatyô u kôron ne ihom ga; kpa Mo yô, u kôrom ihom sha ci u M pasen kwagh u u Mer, aerenakaa a u ka a bo yô.

⁸Gba zan nen iniongo ne tsô, Mo M ngu zan iniongo ne ga, gadia shighe Wam ngu a kuma vough ga.

⁹A ôr ve akaa ne cii A bee kpa A lu ken Galilia her.

¹⁰Kpa mba ve lu ngô môm a Na la mba yemen iniongo kera yô, Un kpaa shi za, kpa lu ken igbar ga, lu er ka ken myer yô.

¹¹Tsô Mbayuda gba keren Un ken iniongo, kaan er: Ngu hana?

¹²Man ikpelaior gba unun sha kwagh Na kpishi. Mbagenev kaa er: Ka ormimi je; mbagenev di yô, ve kaa er: Ei, ngu tsumen a tsume a ior.

¹³Nahan kpaa ma or ôr kwagh Na ken igbar ga, sha ci u cian Mbayuda.

¹⁴Kpa mba eren iniongo i ze dôghôô, Yesu za nyôr ken tempel, gba tesen ior.

¹⁵Nahan kpiligh Mbayuda iyol, ve gba kaan er: Hii nan man Ngun A fe takerada yum man mayange A lu a vande henen ga nahana?

¹⁶Tsô Yesu gema kaa a ve er: Ityesen i M tesen, ka i Yam ga, kpa ka i Un u A tindim la.

¹⁷Aluer i sar hanma or pe eren ishima Na yô, nana fa kwagh u ityesen ne, shin ka her Aôndo i dugh, shin ka kwagh Wam tsô M erou?

¹⁸Or u nan gbe ôron kwagh sha tahav mbu nan iyol i nan yô, ka icivir i nan tsô nan keren ye. Kpa u nan keren icivir i u a tindi nan la yô, ka nan je nan lu u mimi ye, man ma iferkwagh môm ngi ker a nan kpaa ga.

¹⁹Kera ka Mose lu na ne atindi gaa? man mô wen môm nan we atindi la iko ga. Ka nyi ne keren Mo a ku?

²⁰Ikpelaior gema kaa er: U ngu a jijingi u bo, ka an nan keren We a ku?

²¹Yesu gema kaa a ve er: M er kwagh môm tsô, kpiligh ne iyol ci ca cii.

²²Yô, lu Mose na ne icôngo ye, kpa lu hen Mose i due ga, lu hen uter je, man sha iyange i memen je kpaa ka ne tsôngo or.

²³Aluer sha iyange i memen je kpaa a tsôngon or sha er i̱ de peren tindi u Mose ga yô, inja na nan man ne yugh a Mo sha ci u M bee or angev sha iyange i memene?

²⁴De ôron nen ijir sha kwagh u ne nenge tsô ga, kpa ôron nen ijir sha mimi je.

²⁵Tsô mbagenev mba ken Yerusalem kaa er: Kera ka Un u i keren Un a ku ne gaa?

²⁶Nenge ase, ngu ôron kwagh gbar gbar, kpa kera mba er kwagh a Na ga, shin mbavesen fa er A lu Kristu mimi je ase?

²⁷Or ne, se fa henpe A dugh yô, kpa zum u Kristu Una va yô, ma or nana fa ape A dugh ga.

²⁸Tsô er Yesu lu tesen ken tempel yô, A taver imo genger genger er: Ne fam, shi ne fa henpe M dugh kpaa; Mo kpaa M gba van sha ishima Yam tsô ga, kpa Un u A tindim la, ka u mimi je, kpa ne ne fa Un ga.

²⁹Mo yô, M fa Un; gadia M due her a Na, man ka Un kpaa A tindim ye.

³⁰Tsô ve nôngo u kôron Un; kpa or môm môm kôr Un ave iyol ga gadia shighe Na lu a kuma ga.

³¹Kpa mbagenev ken ikpelaior kpishi na Un jighjigh, ve kaa er: Zum u Kristu Una va yô, Una er uivande vea hemba ngeen a mba Or ne A eren nee?

³²Mbafarishi ungwa ikpelaior lu unun akaa ne sha a Na; nahan upristi mba tamen man Mbafarishi tindi udugwer er ve̱ za kôr Un.

³³Tsô Yesu kaa er: M hira lu a ven anyangem kpeghee, man Me yem hen u A tindim la ye.

³⁴Nea va kerem, kpa né zua a Mo ga; hen ape Me lu la kpaa, ne ne fatyô u van her ga.

³⁵Nahan Mbayuda gba kaan ayol a ve er: Or ne Una za han ve sé zua a Na ga? Shin Una za hen mba ve sambe ve lu shir ken Mbagrika, Una za tese Mbagrikaou?

³⁶Inja na nan man A kaa kwagh ne nahan er: Né va kerem kpa né zua a Mo ga, man shi: Ape Me lu la kpaa ne fatyô u van ga?

³⁷Sha iyange i masetyô la, lu zegeyange u iniongo je la, Yesu tile sha, genger imo kaa er: Aluer imura ia kôr hanma or yô, nana̱ va her a Mo, nana̱ va ma.

³⁸U nan nem jighjigh yô, uifi mba mngerem ma umam vea due ken a nan vea kuwan er icighanruamabera kaa nahan.

³⁹Kpa A ôr kwagh ne, lu sha kwagh u Jijingi u mba ve ne Un jighjigh vea zua a mi yô; gadia i lu a na Jijingi ga sha ci u i lu a ver Yesu sha icivir Na ga yô.

⁴⁰Mbagenev ken ikpelaior mba ongo akaaôron angan nahan yô, ve kaa er: Mimi je, Ngun ka profeti shon mimi je ne.

⁴¹Mbagenev yô, kaa er: Ngun ka Kristu je ne. Kpa mbagenev kaa er: Kristu Una due ken Galilia je kpa?

⁴²Icighanruamabera kera kaa er: Kristu Una due ken tsombor u Davidi man ken gar u Betelehem ape Davidi lu la gaa?

⁴³Tsô ikpelaior pav ikwe ihiar sha kwagh Na la.

⁴⁴Mbagenev ken ve yô, lu ve ka kôron Un, kpa or môm bende Un ave iyol ga.

⁴⁵Tsô udugwer mbala va hen upristi mba tamen man hen Mbafarishi; nahan mbala pine ve er: Ka nyi ne ve a Na ga?

⁴⁶Udugwer mbala gema kaa er: Mayange or ngu a ôr kwagh er Or ne nahan ga.

⁴⁷Tsô Mbafarishi gema kaa a ve er: Ne kpaa i tsume a venee?

⁴⁸Mô u ken mbavesen shin u ken Mbafarishi kpaa nan na Un jighjigh shinii?

⁴⁹Kpa se mba kaan ne, ikpelaior i i fe atindi ga ne ngi a ifan iyol.

⁵⁰Nikodemu u iyange va her a Na la, lu môm ken a ve, a kaa a ve er:

⁵¹Atindi ase ka a gba nan or ibo er i lu a ungwa kwaghôron u nan shin i lu a fa kwagh u nan eren la ga jee?

⁵²Ve gema ve kaa a na er: We kpaa, ka ken Galilia u dugh yee? Time nenge er ma profeti una due ken Galilia ga yô. [

⁵³Tsô hanmô ve yem hen ya u nan.]