Read tiv YOHANE 9 Bible Online

YOHANE 9 - tiv bible

YOHANE 9

¹Tsô ngur karen yô, A nenge orgen u i mar nan a ashe a pirin yô.

²Mbahenen Nav pine Un er: Rabi, ka anti nan er isholibo man i mar un a ashe a pirini, ka un, shin ka mba ve mar un laa?

³Yesu gema kaa er: Or ne er isholibo ga, mbamaren nav kpaa ga; kpa ka sha er á pase ityom i Aôndo ker a na yô.

⁴Ka u sé er ityom i Un u A tindim la keng er iyange i shi ne; tugh mbu van mbu ma or nana kera fatyô u eren tom ga yô.

⁵Er M lu shin tar yô, M ngu iwanger i tar je.

⁶Kaan akaa ne nahan yô, A ta ijer inya, A hôr inya sha ijer la, A shighe un sha ashe;

⁷A kaa a na er: Yem za ôô iyol shin ityungu i Shiloam, (inja i iti la er, i tindi). Nahan a za a za ôô iyol, tsô a hire a gba nengen kera.

⁸Nahan mba ve dondo ya a na, man mba ve vande nengen un er a lu or u sônon kwagh yô, ve kaa er: Ka un u iyange teman sônon kwagh ne gaa?

⁹Mbagenev kaa er: Ka wen je, mbagenev nyiman er: Ei, a bee un a bee tsô. Kpa un iyol na kaa er: Ka mo je.

¹⁰Tsô ve kaa a na er: I er nan man i bugh u ashe?

¹¹A gema a kaa er: Ka Or u i yer er Yesu la A hôr inya A shighem sha ashe, A kaa a mo er: Yem shin ityungu i Shiloam, za ôô iyol. Nahan m za, m za ôô ve m gbe nengen kera ye.

¹²Tsô ve kaa a na er: Or la ngu hana? A kaa er: M fa ga.

¹³Ve va a un shon u ngise lu orapirashe la hen Mbafarishi.

¹⁴Man iyange i Yesu hôr inya bugh un ashe la, lu sha iyange i memen.

¹⁵Mbafarishi kpaa shi pine un er i er man a nengen kera yô. A kaa a ve er: A pendam inya i ndor sha ashe, m za ôô man m gbe nengen ye.

¹⁶Tsô Mbafarishi mbagenev kaa er: Or ne due sha Aôndo ga, gadia we iyange i memen iko ga. Kpa mbagenev kaa er: Á er nan man or u nan lu orisholibo nana fatyô u eren anza a uivande mbana? Nahan ve pav iniongo ihiar.

¹⁷Shi ve kaa a orapirashe la er: Tsô er A bugh u ashe nahan, we yô, u ngu ôron sha kwagh Na nana? A kaa er: Ka profeti je.

¹⁸Mbayuda na jighjigh sha kwagh na la er a lu orapirashe man a hingir u nengen kera ga, saa ka er ve yila mbamaren mba or u a hingir u nengen kera la, ve pine ve er:

¹⁹Ka wan wen u ne kaa ner, i mar un a ashe a pirin ne shinii? Er nan man a hingir u nengen kera hegene?

²⁰Tsô mbamaren un gema kaa er: Se fa ngun ka wan wase je, man i mar un a ashe a pirin kpaa;

²¹kpa er i er ve a nengen kera hegen ne yô, se fa ga; man u A bugh un ashe kpaa se fa ga; pine nen un, ka wanye ga, a̱ ôr iyol na.

²²Mbamaren un kaa nahan sha ci u ve lu cian Mbayuda yô; gadia Mbayuda vande zuan zwa kera er, aluer ma or nana pase Un er ka Kristu yô, á dugh nan ken shinagoge kera.

²³Ka nahan man mba ve mar un la ve kaa er: Ngu wanye ga, pine nen un, ye.

²⁴Tsô ve shi ve yila un u a vande pirin ashe la myer u sha kwa har, ve kaa a na er: Civir Aôndo! Se yô, se fa Or ne ka orisholibo je.

²⁵Tsô a gema a kaa er: Shin Una lu orisholibo kpaa, m fa ga, m fa di kwagh môm tsô; lu m pir ashe, kpa hegen m ngu nengen kera.

²⁶Tsô ve shi ve kaa a na er: A er u nyi? A er nan man A bugh u ashe?

²⁷A gema a kaa a ve er: M vande kaan ne kera ve, kpa ne ungwa ga; inja na nan shi i lu ne ka ungwana? Ne kpaa, ka ne ka hingir mbahenen Nava?

²⁸Tsô ve tuhwa un, ve kaa er: Ka we tsô u lu orhenen Na ye; se yô, se mba mbahenen mba Mose.

²⁹Se fa Aôndo ôr kwagh a Mose kpa Or ne yô, se fa ape A dugh ga.

³⁰Or la gema kaa a ve er: Ngun ka kwagh u kpiligh iyol je, er ne fe ape A dugh ga, nahan kpaa A bughum ashe.

³¹Se fa Aôndo ongo imo i mbaasorabo ga; kpa aluer hanma or nana civir Aôndo mimi man nana eren ishima Na kpaa yô, ka nan je A ongo nan ye.

³²Hii sha igbetar je mba a ungwa er i bugh or u i mar nan a ashe a pirin, ashe ga.

³³Or ne Una dugh sha Aôndo ga yô, ma A fetyô u eren ma kwagh ga.

³⁴Ve gema ve kaa a Na er: I mar u ken asorabo eleghee, kpa u gem u tesen se yee? Tsô ve dugh un kera.

³⁵Yesu ungwa er ve dugh un kera yô; tsô va zough a na yô, A kaa a na er: U na Wan u or jighjigh kpa?

³⁶A gema a kaa er: Un ka ana, Tere, sha u m̱ na Un jighjigh?

³⁷Yesu kaa a na er: U vande nengen a Na, shi ka Un je A lu ôron kwagh a we ne.

³⁸Tsô a kaa er: Tere, m na jighjigh! Nahan a gba civir Un.

³⁹Tsô Yesu kaa er: M va shin tar ne sha ci u i̱ hingir ijir i kuren, sha u mba ve nengen ga yô, ve̱ nenge, man mba ve nengen la yô, ve̱ gema di ve̱ hingir mbaapirashe.

⁴⁰Mbafarishi mba ve lu a Na heregh la, ve ungwa akaa ne, tsô ve kaa a Yesu er: Nahan se kpaa se mba mbaapirashe zee?

⁴¹Yesu kaa a ve er: Nea lu mbaapirashe yô, ma ne lu a isholibo ga; kpa hegen ne kaa ner: Se mba nengen; nahan isholibo yen ngi ne her.