Read tiv Aerenakaa A Mbaapostoli 1 Bible Online

Aerenakaa A Mbaapostoli 1 - tiv bible

Aerenakaa A Mbaapostoli 1

¹Teofilu, takerada u hiihii la m nger, lu akaa a Yesu hii u eren man shi tesen la cii,

²zan zan ar sha iyange i i ngohol Un Sha la; mbaapostoli mba A sange ve la, A vande kaan ve akaa sha Icighan Jijingi a ve̱ er a la; er ican Na la i bee yô,

³A tese ve iyol Na uma sha akav kpishi, lu anden hen ve zan zan ayange akunduahar, lu ôron kwagh u tartor u Aôndo.

⁴Man er A lu a ve imôngo her yô, A ta ve icin er ve̱ de undun Yerusalem ga, kpa ve̱ kegh ityendezwa i Ter, i ne ongo her a Mo (kape A kaa la.)

⁵Gadia Yohane yô, er batisema sha mnger, kpa ne yô, á er ne batisema sha Icighan Jijingi, ayange kpaa kera shi ngee ga.

⁶Tsô mba ve kohol imôngo la, ve pine Un er: Tere, ka hen shighe ne man Ú hide Mbaiserael a tahav mbu veren tor ve ayol a ve yee?

⁷Kpa A kaa a ve er: U ne fa ashighe man a-an a Ter A ver sha tahav Nav, Un mtswen la yô, kwagh wen ngu sha mi ga.

⁸Kpa né va ngohol agee shighe u Icighan Jijingi Una va sha a ven yô, man né lu mbapasen kwagh Wam ken Yerusalem man ken Yudia cii kua Samaria kpaa, zan zan á ar ken ikighir i tar je.

⁹Tsô er A ôr akaa ne kera yô, i tôô Un i yem a Na sha; ve lu nengen je, ibeenegh maa ngohol Un sha ashe ve.

¹⁰Er ve lu kenger Sha heregh er A lu yemen yô, ior ihiar tile a ve a akondo a pupuu iyol,

¹¹man ve kaa er: Ne nomso mba Galilia, ka nyi ne til ne kenger Sha nahana? Un Yesu u i tee Un her a ven i yem a Na Sha ne, er ne nenge Un A kende A yemen Sha nahan, kape mhir kpaa Una hire vough je la.

¹²Tsô ve hungwa sha uwo u i yilan u er Olev u u lu ikua a Yerusalem la, kuma zende u sha iyange i memen nahan, tsô ve hide hen Yerusalem.

¹³Mba va nyer yô, ve unde sha kpoyou u sha ape ve tsaan la, lu Peteru man Yohane man Yakobu man Anderia, kua Filibu man Toma, man Bartolomeu man Mateu kua Yakobu wan u Alefeu man Shimon Selote, man Yuda, anngô u Yakobu.

¹⁴Mban cii zua ishima i môm sha msen u eren kua kasev mbagenev man Maria, ngô u Yesu man angôôv Nav kpaa.

¹⁵Tsô sha ayange la Peteru mough tile sha, her atô u anmgbianev—ikpelaior i i kohol la i kuma er akundu ataratar nahan; a kaa er:

¹⁶Ne anmgbianev, kwagh u icighanruamabera kaa yô, lu u una kure sha mi vough keng, sha kwaghôron u Icighan Jijingi u Davidi gema ôr la, sha kwagh u Yuda u a lu orhemen gbenda u mba ve kôr Yesu la.

¹⁷Gadia i ôr un iyenge a vese imôngo, a ngohol kwar na ken tom ne kpaa.

¹⁸Or ne yô, yam sule sha injar i ifer na, nahan a gba a tume ityough inya, pav, myam nam cii ma haa won.

¹⁹Kwagh ne hingir ken igbar je hen mba ve lu ken Yerusalem cii; ka nahan man i yila sule shon ne ken zwa ve er, Akeldama, inja na yô, er, ka sule u awambe.

²⁰Gadia ken takerada u Upasalmi yô, i nger er: Ijiir na i teman i̱ hingir ice, ma or môm nana̱ de kera tem ker ga! Man shi: Orgen nana̱ ngohol tom na.

²¹Yô, ior mba ve lu a vese sha ayange a Ter Yesu lu a vese la cii,

²²hii sha batisema u Yohane zan zan ar sha iyange i i tôô Un her a vese i yem a Na Sha la; yô, ka u mô ve nana̱ hingir orshiada sha kwagh u mnder Na la a vese imôngo keng.

²³Tsô ve ver ior ihiar; lu Yosev u i yilan er Barsaba, man i gema i seer un iti er Yusetu la, orgen yô, lu Matia.

²⁴Ve er msen, ve kaa er: We, Ter u U fe asema a ior cii ne, ior mba uhar mban ne, tese or u U tsough nan la,

²⁵sha er nana̱ tema sha ityough ki Yuda sha tom u apostoli, u Yuda a undu sha u yemen hen ijiir na yô.

²⁶Tsô ve er ishor, ishor gba sha Matia; i maa i ver un a mbaapostoli mba pue kar môm mbala imôngo.