Read tiv Aerenakaa A Mbaapostoli 10 Bible Online

Aerenakaa A Mbaapostoli 10 - tiv bible

Aerenakaa A Mbaapostoli 10

¹Orgen lu ken Sesaria, iti na er Korneliu, lu torutya u ikum i Italia la.

²Un lu or u jighilaa, u civir Aôndo a ior i hen ya na cii, lu nan nongoior la uiwua kpishi, man sônon Aôndo gbem kpaa.

³A nenge gbar gbar ken mpase u sha mnenge lu er ahwa atar atetan nahan, ortyom u Aôndo va nyôr her a na, kaa a na er: Korneliu!

⁴A kenger un, cier un iyol, a kaa er: Ka nyi, tere? A kaa a na er: Mbamsen ou man uiwua ou ve kôndo sha, hingir kwagh u Aôndo Una umbur je.

⁵Hegen yô, tindi ior hen Yopa, ve̱ za yila Shimon u i yer er Peteru la;

⁶ngu tsan hen Shimon, or u nyian akôv, u ya na a lu shin kpe u zegemnger la.

⁷Zum u ortyom u Sha u a ôr kwagh a na la mough kera yô, a yila mbayev nav uhar mba ken ya na, man shi orutya ugen u civir Aôndo, ken mba ve lu a na gbem la;

⁸pasen ve akaa la cii yô, a tindi ve ken Yopa.

⁹Tsô kper nan mba ngur yemen, mba mgbôghom a ya yô, Peteru unde sha haav mbu iyou la mbu mbu lu sha mi tembe tembe la er iyange sha tembe nahan, za er msen.

¹⁰Tsô ijen kôr un kpishi; nahan sar un pe yan kwagh; kpa er i lu yôron a yôr yô, ishima hingir un ker er zuzu kar un nahan.

¹¹A nenge Sha ivegher, man shi ikagh lu senen sha Aôndo, lu er ka zegeikondo nahan, i kôr azongo na anyiin, i lu senen a mi shin tar.

¹²Kimi yô, ishôso i sha won lu keregh, atô kposo kposo, i lun angahar anyiin, man i kpelan a kpela iyav inya, man shi inyon i sha kpaa.

¹³Tsô imo va kaa un er: Peteru, mough sha, sôngo, ya!

¹⁴Kpa Peteru kaa er: Nahan ga, Tere, gadia mayange je m ngu a ya ma kwagh u hôngorough shin kwagh u wang ga nahan ga.

¹⁵Imo la shi va her a na kuma kwa har, i kaa er: Kwagh u Aôndo A ser un yô, we de kera kaan wer, ka u wang ga ze.

¹⁶I ôr nahan zan zan kuma kwa tar je; maa i kôndo a ikagh kila Sha.

¹⁷Tsô er lu nzughul Peteru ken ishima yum sha inja i mpase u sha mnenge u a nenge la yô, ior mba Korneliu tindi ve la, vande pinen iyou i Shimon, va tile sha hunda ve.

¹⁸Ve yila, ve pine er: Ka ya u Shimon, u i yer er Peteru la a nyer ne shinii?

¹⁹Tsô er Peteru lu henen sha kwagh u mpase u sha mnenge la yô, Jijingi kaa a na er: Nenge, ior itiar ngi keren we.

²⁰Yô, mough sha, hungwa za a ve imôngo, de te akpelan sha ma kwagh je ga, gadia ka Mo je M tindi ve ye.

²¹Tsô Peteru hungwa, va hen ior mbala, va kaa er: Nenge, ka mo u ne keren je ne. Ka nyi ityôikaa ne ve?

²²Ve kaa er: Korneliu torutya, ka or u perapera u cian Aôndo, u Mbayuda cii ve lu eren shiada u dedoo sha a na la, a ungwa kwaghôron sha zwa u icighanortyom u Sha er a̱ yila u, u̱ va hen ya na, Sha u a̱ ungwa kwaghôron her a we.

²³Nahan a kaa a ve er, ve̱ nyôr, tsô a nyôr a ve ken ya la. Kper nan yô, Peteru mough, yem a ve imôngo. Anmgbianev mbagenev mba ken Yopa kpaa ve za a na.

²⁴Kper gen a nyôr ken Sesaria. Korneliu lu keghen ve, a vande kohol anmgbianev nav man ahur a na a mimi.

²⁵Tsô Peteru va nyer yô, Korneliu za kegh un gbenda, gure un inya sha ishi, ta un inya.

²⁶Kpa Peteru mough a na sha, kaa er: Mough, tile sha, mo kpaa m ngu di or tsô.

²⁷Tsô ngur ôron kwagh a na yô, a nyôr, a zua a ior kpishi, ve kohol her.

²⁸A kaa a ve er: Ne ayol a en kpaa ne fa er tindi yange Oryuda u nyôron nongo a or u ken ikur igen kposo shin u van a va hen nan tsô kpaa; kpa Aôndo tesem er m̱ de kera yer ma or mer, ka or u hôngorough shin u wang ga kpaa ga.

²⁹Ka sha ci u nahan man zum u ne yilam yô, m va m venda ga. Yô, m ngu pinen mer: Ka nyi ityôikaa ne yereme?

³⁰Tsô Korneliu kaa er: Er m lu eren msen ken ya wam yô, ayange kar nyian anyiin je, tsô sha ahwa atar atetan la,

³¹m nenge orgen tilem sha ishi a akondo a engem iyol, a kaa er: Korneliu, i rumun msen wou, man shi i umbur uiwua ou sha ishigh ki Aôndo.

³²Yô, tindi hen Yopa, yila Shimon u i yer er Peteru la, a nyôr ken ya u Shimon, or u nyian akôv la, shin kpe u zegemnger.

³³Fese nahan maa M tindi loho hen we; u er doo tsô er u ve nahan. Hegen yô, se cii se mba heen sha ishigh ki Aôndo, sha u se̱ ungwa akaa a Ter A ne u u ôron cii yô.

³⁴Tsô Peteru bugh zwa kaa er: Mimi je, m kav, Aôndo ka u sangen a sange ior ga,

³⁵kpa ken hanma ikurior yô, or u nan cie Un, nan eren perapera kpaa yô, Una rumun nan.

³⁶Ngun ka kwaghôron u A tindi hen Mbaiserael er A pase loho u bem ken Yesu Kristu. Un ka Ter u ior cii je.

³⁷Ne ayol a en kpaa ne fa kwagh u a er ken Yudia la cii, hii hen Galilia, ken masejime u batisema u Yohane pase la;

³⁸ka kwagh u Yesu Ornasareti la, u Aôndo haa Un Icighan Jijingi man agee; lu zenden, eren ityom i dedoo, waren mba diabolo eren ve ican la cii, gadia Aôndo lu a Na.

³⁹Se yô, se mba mbashiada sha akaa a A er ken tar u Mbayuda cii, man hen Yerusalem kpaa, ve wua Un, ve mande Un sha kon.

⁴⁰Ka Un je man Aôndo nder Un shin mbakpenev sha iyange i sha utar la ye, shi A na er A̱ ande,

⁴¹kpa kera lu hen nongoior la cii ga, saa hen mbashiada mba Aôndo vande sangen ve la, ka se je ne, se mba se ya kwagh shi se ma kwagh a Na imôngo, zum u A nder shin mbakpenev kera la.

⁴²Shi A wa se kwagh er se̱ ôr nongoior la kwaghaôndo, shi se̱ pase kpaa er: Ngun ka u Aôndo ver Un Orjir u mbaumav man mbakpenev je ne.

⁴³Uprofeti cii mba pasen Un er, ka ken iti Na je man hanma or u nan ne Un jighjigh yô, á de nan asorabo a nan ye.

⁴⁴Tsô Peteru ngur ôron akaa ne nahan yô, Icighan Jijingi haa sha mba ve lu ungwan kwaghôron la cii.

⁴⁵Nahan mbananjighjigh mba ken mbaicôngov mba ve va a Peteru imôngo la cii, kpiligh ve iyol sha ci u i hee atôatyev iwua i Icighan Jijingi kpaa yô.

⁴⁶Gadia ve ungwa ve lu ôron kwagh ken ijô igen, ve lu civir Aôndo. Tsô Peteru gema kaa er:

⁴⁷Mban mba ve ngohol Icighan Jijingi vough er se nahan ne, ma or nana fatyô u yangen mngerem ma á er ve batisema a mi la je kpa?

⁴⁸Nahan a kaa er i̱ er ve batisema ken iti i Yesu Kristu. Tsô ve zamber a Na er a̱ shi a tsa a ve ayange a̱ kar kpeghee.