Read tiv Aerenakaa A Mbaapostoli 11 Bible Online

Aerenakaa A Mbaapostoli 11 - tiv bible

Aerenakaa A Mbaapostoli 11

¹Tsô mbaapostoli kua anmgbianev mba ve lu ken Yudia ungwa er atôatyev kpaa ngohol kwaghôron u Aôndo.

²Nahan zum u Peteru va nôôr ken Yerusalem yô, mba ve lu ken mbaicôngov toor ayôôso a na,

³kaa er: U nyôr hen mbaipusuv u ya kwagh a ve je.

⁴Kpa Peteru hii u ôron ve akaa la cii sha adondo adondo, a kaa er:

⁵Iyange m lu ken gar u Yopa, m lu eren msen tsô ishima hingir mo kposo er zuzu karem nahan, m nenge ken mpase u sha mnenge er ikondo i vesen, i i ker i sha azongo anyiin, i lu senen a mi sha aôndo nahan, zan zan ar her a mo.

⁶Tsô m kenger ashe sha mi yô, m kav ishôso i sha won i lun a angahar anyiin, man inyam i toho man akaa a kpelan a kpela iyav inya, man shi inyon i sha kpaa.

⁷Tsô m ungwa imo lu kaan a mo er: Peteru, mough sha, sôngo, ya.

⁸Kpa m kaa mer: Nahan ga, Tere, gadia mayange kwagh u wang ga shin u hôngorough nahan ngu a nyôrom ken zwa ga.

⁹Kpa imo la shi va her a mo kuma kwa har, i kaa er: Kwagh u Aôndo A ser yô, we de kera kaan wer ka u wang ga ze.

¹⁰I er nahan zan zan kuma kwa tar je, man i mase kôndon a mi sha cii ye.

¹¹Tsô fese nahan ior itiar va tile hen hunda u ya henpe se lu la, lu mba i tindi ve a tindi ve mough ken Sesaria ve va her a mo yô.

¹²Tsô Jijingi kaa a mo er m̱ yem a ve imôngo, m̱ de te akperan ga. Anmgbianev mba ataratar mban kpaa za a mo imôngo, se za nyôr hen ya u or la.

¹³Nahan a ôr se er un nenge ortyom u Sha tile hen ya na, a kaa er: Tindi loho hen Yopa, i̱ za yila Shimon u i yer er Peteru la,

¹⁴wen una ôr u mkaanem ma ú war sha mi yô, we kua ya wou cii kpaa.

¹⁵Tsô er m hiin u ôron yô, Icighan Jijingi gba sha a ve er iyange gba sha a vese sha hiihii la nahan vough.

¹⁶Tsô m umbur kwaghôron u Ter er lu kaa er: Yohane yô, lu eren batisema sha mnger, kpa ne yô, á er ne batisema sha Icighan Jijingi.

¹⁷Nahan yô, aluer Aôndo na ve iwua vough er A na se shighe u se na Ter Yesu Kristu jighjigh nahan la yô, mo m ngu di nyi je sha u me hendan kwagh a Aôndo?

¹⁸Mba ongo akaa ne nahan yô, ve huan ving, ve gba civir Aôndo kaan er: Atôatyev kpaa, Aôndo na a mgemshima u zan ken uma.

¹⁹Mba ve sambe sha ci u mtev u sha ican u a hii sha Sefanu la, ve zende zan zan ve za ar hen Fenishia man Shiperu man Antioki, kpa mayange ve ôron ma orgen kwaghôron u Aôndo ga, saa Mbayuda tseegh.

²⁰Kpa mbagenev ken ve lu ior mba Shiperu man Shirene; mbala zum u ve va ken Antioki yô, ve za ôr kwagh a Mbagrika kpaa; ve lu ôron Loho u Dedoo u Ter Yesu.

²¹Uwegh ku Ter lu a ve, ior kpishi kpaa na jighjigh ve gema ishima hen Ter.

²²Ugwa u akaa ne va nyôr ken ato a nongo u Kristu u ken Yerusalem, nahan ve tindi Barnaba er a̱ za ken Antioki.

²³Un kpaa, er a za ar man a nenge mrumun u sha mhôôn u Aôndo yô, a ember, a taver ve ishima cii er ve̱ var ken Ter sha gbashima je;

²⁴gadia Barnaba lu or kpekpe, man shi a iv a Icighan Jijingi man jighjigh u nan kpaa. Nahan i seer Ter ior kpishi kpaa.

²⁵Tsô a mough keregh, a yem ken Tarsu sha u za keren Saulu;

²⁶za zough a na yô, a va a na hen Antioki. Nahan yô, ve lu heregh ve kohol a nongo u Kristu kuma inyom i môm, ve lu tesen ikpelaior i vesen. Ka hen Antioki man i hii yilan mbahenen er Mbakristu ye.

²⁷Tsô sha ayange la uprofeti mbagenev due ken Yerusalem, va hen Antioki.

²⁸U môm ken ve iti na er Agabu, kighir mough sha, gba pasen ken Jijingi er, zegejen una gba, á tser tar cii. Kwagh la kpaa er di nahan vough sha ayange a Kaloudia tema tor la je.

²⁹Mbahenen wa ken ishima er hanmô ve nana nôngo sha kwagh u nan fatyô yô, sha u tindin a iwasen hen anmgbianev mba ve tem ken Yudia la.

³⁰Ve er nahan di je; ve tindi hen mbatamen sha ikev i Barnaba man Saulu.