Read tiv Aerenakaa A Mbaapostoli 2 Bible Online

Aerenakaa A Mbaapostoli 2 - tiv bible

Aerenakaa A Mbaapostoli 2

¹Tsô iyange i Pentekosti kom yô, ve cii ve kohol ijiir i môm.

²Fese nahan ihuran due sha, lu er ijeverahumbe nahan, iv ken iyou i ve tema ker la cii.

³Tsô ve nenge iniombor er ka i usu nahan, samber tema sha hanmô ve ser ser.

⁴Ve cii i iv ve a Icighan Jijingi, ve gba ôron kwagh ken ijô igen er Jijingi na ve u ôron yô.

⁵Yô, Mbayuda mbagenev tema ken Yerusalem, ve lu mbacian Aôndo, ve due ken akuraior a sha won cii.

⁶Mba ongo ihuran la yô, ikpelaior cii kohol, kondo ve iyol sha ci u hanma or nan lu ungwan er ve lu ôron kwagh ken zwa u nan yô.

⁷Nahan kondo ve iyol, shi kpiligh ve iyol kpaa, ve gba kaan er: Nenge ase, mba ve lu ôron kwagh nahan ne cii ka Mbagalilia gaa?

⁸Er nan man se ongo hanmô ve ôron kwagh ken zwa wase u i mar se a mini?

⁹Ka Mbaparta man Mbamede man Mbaelam kua mba ve tem ken Mesopotamia man Yudia man Kapadoshia man Pontu man Ashia,

¹⁰kua Ferigia man Pamfilia man Igipiti man tar u Libia u hen Shirene la, man shi Mbaromanu mba ve va a va inya ne, ka Mbayuda man mba ve nyer a nyôr nongo u Mbayuda yô,

¹¹Mbakerete man Mbaarabia kpaa, se ungwa ve ôron uzegembaakaav mba Aôndo ken ijô yase je.

¹²Ve cii kondo ve iyol man nzughul ve kpaa, tsô ve kaa ayol a ve er: Kwagh ne wa inja nana?

¹³Kpa mbagenev gema naha tar, kaa er: Ve ma wain u nyohon ngee yum.

¹⁴Tsô Peteru mough, tile sha a mba pue kar môm mbala, a genger imo, a ôr kwagh a ve er: Ne Mbayuda, man ne cii, mba ne tem ken Yerusalem kpaa, kwagh ne a̱ wanger ne, ver nen ato sha kwaghôron wam kpaa.

¹⁵Mban mba hunden msôrom er ne henen nahan ga, gadia ka ahwa ataankaranyiin pepe tsô.

¹⁶Kpa ngun ka kwagh u profeti Yoel lu kaa er:

¹⁷Kape á lu sha ayange a masetyô je la, kape Aôndo A kaa la, Me haa Jijingi wam sha uumace cii, ônov enev mba nomso man mba kasev vea ôron kwaghôron u profeti, ikaior yen ia nenge mbampase mba sha mnenge. 2 Mnyam maa cien mbatamen enev kpaa.

¹⁸Mbatomov Av mba nomso man mba kasev kpaa, sha iyange la, Me haa Jijingi Wam sha a ve, vea ôron kwaghôron u profeti.

¹⁹Me er akaa a kpilighyol sha kwavaôndo kua uivande shin tar; awambe man usu man mnyim ma a kôndon Sha.

²⁰Á gema iyange ia hingir ime, uwer kpaa ua hingir awambe, man iyange i Ter i vesen i cier iyol ia va ye.

²¹Nahan á hingir u hanma or u nan yer sha iti i Ter yô, nana war.

²²Ne ior i Iserael, ungwa nen akaaôron ne: Yesu, Ornasareti Or u Aôndo tese ne Un sha ityom i ageegh man sha akaa a kpilighyol man uivande mba Aôndo er sha ikev Na her atô wen, er ne kpaa ne fe nahan;

²³ka Un u i na Un sha awashima u Aôndo man sha mvandefan Na la je, ne mande Un sha terankon sha ikev i aferaior, ne wua Un kpaa ye,

²⁴kpa Aôndo nder Un, A sagh mnyoonom ma kuugh kera sha ci u u fetyô u kusun Un ga yô.

²⁵Gadia Davidi lu ter Un, kaa er: M nengen a Ter sha ishigh yagh gbem; gadia ngum ken uwegh ku yanegh sha u m̱ de tenger ga yô;

²⁶sha ci u nahan yô, saan mo ken ishima, zwa wam kpaa ember; iyol yam je kpaa ia lu ken ishimaverenkeghen.

²⁷Gadia Ú undu uma wam shin Hade ga, man shi U de wer Icighanor Wou la A̱ nenge a mhee mayange ga.

²⁸Ú tesem igbenda i uma; Ú va ivim a msaanyol sha ishigh You.

²⁹Anmgbianev, me fatyô u ôron ne kwagh u Davidi, ter u tamen la, gbar gbar je; a kpe, i ii un, uwar na kpaa ngu hen a vese zan zan nyian je.

³⁰A lu profeti je shi a fa er Aôndo bum a na sha ibumzwa er ka or u ken tsombor na je, Una ver nan sha ikônough nagh ki torough ye,

³¹nahan yô, a tsenganengen ken hemen a ôr kwagh u mnder u Kristu er, i undu Un shin Hade ga, iyol Na kpaa i nenge a mhee ga.

³²Ka Yesu shon ne je, Aôndo nder Un ye, se cii se mba shiada sha kwagh ne.

³³Er i kende Un sha a lu ken uwegh ku yanegh ku Aôndo man er A ngohol ityendezwa i Icighan Jijingi hen Ter A haa Un yô, ka kwagh shon u ne lu nengen shi ne lu ungwan kpaa je ne.

³⁴Gadia Davidi lu kôndo Sha ga, kpa un iyol na kaa er: Ter kaa a Terem er: Temam ken uwegh ku yanegh,

³⁵zan zan Me gema mbaihomov Ou, vea hingir We kwagh u pendan angahar sha mi.

³⁶Nahan ya u Iserael cii a̱ fa dedoo er: Yesu u ne mande Un sha terankon la, ka Un je Aôndo a gem Un A hingir Ter man Kristu kpaa ye.

³⁷Tsô, zum u ve ungwa kwagh ne nahan yô, sôô ve ken ishima, nahan ve kaa a Peteru kua mbaapostoli mbagenev er: Ne anmgbianev, tsô sé er nana?

³⁸Nahan Peteru kaa a ve er: Gema nen asema, i̱ er hanmô wen batisema ken iti i Yesu Kristu sha mde u asorabo a en, tsô né ngohol Icighan Jijingi iwua je.

³⁹Gadia ityendezwa ngi sha ci wen kua ônov enev man mba ve lu ken ica la cii kpaa, ka mba Aôndo Ter wase Una yila ve er ve̱ va her a Na la cii.

⁴⁰Shi a seer ôron ve akaa agen, lu pasen ve kwagh gbar gbar, lu taver ve ishima, kaan a ve er: I̱ yima ne sha kov u lun kpe ne.

⁴¹Mba ve rumun kwaghôron na la i er ve batisema; sha iyange la i seer ior er dubu utar nahan.

⁴²Tsô ve kange asema sha ityesen i mbaapostoli man ken mzoughshima, man ken mcoon u bredi, man ken msen u eren kpaa.

⁴³Mciem gba sha hanma or u uma, man shi i er akaa a kpilighyol man uivande kpishi sha ikev i mbaapostoli.

⁴⁴Mba ve na jighjigh la cii lu imôngo, man akaa a ve lu a mi cii kpaa ve nungwa hingir kwagh môm.

⁴⁵Ve tee akaa a ve man inyarev vev, ve kar ayol a ve sha gbayol u hanma or.

⁴⁶Ve zer kohol ken tempel ayange ayange, ve coon bredi sha uya vev ser ser, ve yaan kwagh a iember man a ishima i wang,

⁴⁷ve lu wuese Aôndo, ior cii kpaa lu rumun ve. Ter lu seer mba i lu yiman ve la sha iyenge ve ayange ayange.