Read tiv Aerenakaa A Mbaapostoli 24 Bible Online

Aerenakaa A Mbaapostoli 24 - tiv bible

Aerenakaa A Mbaapostoli 24

¹Tsô ayange nga kar ataan yô, Anania, zegepristi la, za sen a mbatamen mbagenev man shi orfanatindi ugen, iti na er Tertulu, ve va yila Paulu ijir hen gomna.

²Mba yer Tertulu yô, a gba ôron ityôikaa na a kaa er: Er i lu we u ne se tem bem bem yum yô, man shi er i lu sha ago ou a wan iyol man ikurior ne i lu zuan a mzehemen yô,

³se mba rumun nahan gbar gbar sha hanma gbenda man ken hanma ijiir kpaa, se mba wuese kpaa, we Feliku u mimi.

⁴Kpa sha er i lum pe timbir we ga yô, m ngu zamber a we, ungwa kwaghôron wase ne kpeghee sha ishimawan you la.

⁵Gadia se kav or ne ka or u ifer je, ka or u vihin Mbayuda sha num u moughon sha won cii, ka orhemen u nongo u Mbanasari je.

⁶Tempel je kpaa lu nôngon tsung u ma un hôngor un; kpa se kôr un [ser, se ôr un ijir sha atindi a ase.

⁷Kpa Lishia, torutya u tamen, va va tsuwe se un sha ikev sha apera;

⁸kaa er, mba ve yer un ijir la ve̱ va sha ishigh you.] Nahan aluer u pine un iyol you kpaa, u fatyô u fan akaa angan a se yer un ijir sha mi ne cii.

⁹Mbayuda kpaa zua zwa sha ijir yilan la ve lu rumun er, akaa ne kape a lu je la.

¹⁰Tsô gomna tese uwegh er Paulu a̱ ôr ase kwagh, nahan Paulu kaa er: Mo yô, m fa u ngu orjir sha ikurior ne anyom imôngo je, nahan m ngu palegh iyol vangertiôr je.

¹¹U fatyô u timen fan dedoo er m za ken Yerusalem, sha u za civir Aôndo ayange nga a kuma pue kar ahar je ga.

¹²Mayange ve kohol mo ken tempel m lu hendan a ma or ga, shin m lu vihin ikpelaior ken ushinagoge ga, ken gar kpaa ga,

¹³man shi mayange vea fatyô u eren shiada sha akaa a ve yerem ijir sha mi hegen ne kpaa ga.

¹⁴Kpa kwagh ne yô, m rumun, ka sha gbenda u ve yer er mkaha u bo la je m civir Aôndo u uter asev ye. Akaa a i nger ken atindiakaa la, kua ken uprofeti kpaa m na a jighjigh cii,

¹⁵m ngu a ishimaverenkeghen sha Aôndo, ka kwagh u mban ayol a ve kpaa ve lu keghen je, ka mnder u mbaperapera kua mba ve lu perapera ga vea nder shin ku la.

¹⁶Sha kwagh ne yô, m ngu nôngon u lun a imo i dedoo ken ishima gbem her Aôndo kua hen ior kpaa.

¹⁷Tsô anyom nga kar kpishi yô, m mough sha u me va nongo wam a uiwua man sha u va nan iniav kpaa.

¹⁸M lu eren ave je, tsô ve kohol mo a mi ken tempel a iyol i wanger, m lu a ikpelaior imôngo ga, ayôôso kpaa lu ga. Kpa Mbayuda mbagenev mba ve due ken Ashia yô, lu her:

¹⁹ka ve ma ve lu sha ishigh you heen keng, ma ve va yer ijir ye, aluer kwagh a zough ve a mo yô.

²⁰A lu nahan ga yô, mban ayol a ve, ve̱ ter ase ma kwaghbo u ve zough a mi her a mo zum u m tile sha ishigh ki mkohol la,

²¹saa di a lu imokwagh i m ôr shighe u m tile her atô ve, m genger imo la, m kaa mer: Ka sha ci u kwagh u mnder u mbakpenev man i yerem ijir sha ishigh yenegh nyian ye.

²²Kpa Feliku, er a fa kwagh u gbenda la kpishi yô, a cir ijir la, a kaa er: Saa Lishia, torutya u tamen la una va, man me kure ijir yen ne ye.

²³A kaa a torutya er a̱ kura un, kpa a̱ na un ian, a̱ de yangen mô ikar na sha u va wasen un ga.

²⁴Kpa ayange nga kar yô, Feliku va vea kwase na Durushila, wan u Mbayuda; a tindi er i̱ va a Paulu, i̱ ungwa kwagh u jighjigh u nan u sha Yesu hen a na.

²⁵Zum u a lu ôron kwagh u perapera, man u kôron iyol tsaha man shi kwagh u ijir i i lu van la yô, Feliku cia sulugha, gema kaa er: Hen shighe ne yô, hira za tsô; iyange i ian ia due dedoo, tsô me yila u;

²⁶lu veren ishima er Paulu a̱ na un inyaregh; ka sha ci u nahan man a shi a kimbir yilan un acin imôngo, a lu ôron kwagh a na ye.

²⁷Kpa anyom nga kar ahar yô, Porshiu Fesetu va tema sha ityough ki Feliku; man er i lu Feliku ka doon ityough a Mbayuda yô, a undu Paulu uikangen.