Read tiv Aerenakaa A Mbaapostoli 26 Bible Online

Aerenakaa A Mbaapostoli 26 - tiv bible

Aerenakaa A Mbaapostoli 26

¹Tsô Agripa kaa a Paulu er: I na u zwa ve, ôr ase imo you yôô. Tsô Paulu kende uwegh sha, gba ôron kwagh sha u palegh iyol, kaa er:

²Kam er kpem iyol yô, tor Agripa, sha er m lu palegh iyol sha ishigh you nyian sha akaa a Mbayuda ve yerem ijir sha mi cii ne,

³jim je yô, ka sha ci u we u fe aeren man akpelanakaa a a lu hen Mbayuda cii yô; nahan yô, m ngu zamber a we, wa ishima ungwa kwagh wam.

⁴Inja i mlu wam u m lu hen nongo wam sha hiihii ken Yerusalem yô, hii iyev je zan zan, Mbayuda cii kpaa fa.

⁵Ve fam sha hiihii je; aluer vea rumun u eren shiada nahan, m lu sha nongo u hemban tsenger u sha adini wase la, m lu Orfarishi je.

⁶Man hegen yô, mba ôron mo ijir sha ishimaverenkeghen i sha ityendezwa i Aôndo tôndo a uter asev la,

⁷ka ityendezwa shon i ikwe yase i pue kar ihiar ne i lu veren ishima keghen er ia ar sha mi la, er ve lu civir Aôndo sha gbashima tugh man tetan yô. Ka sha kwagh u ishimaverenkeghen ne je, Mbayuda ve yerem ijir sha mi ye, tor.

⁸Inja na nan man kwagh ne a lu ne kwagh u nan jighjigh sha mi ga, er Aôndo Una nder mbakpenev yôô?

⁹Mimi je, mo iyol yam m hen ken ishima mer: ka u me er akaa kpishi a vihin iti i Yesu Ornasareti ne keng.

¹⁰Kape m eren ken Yerusalem kpaa je la; er m ngohol tahav hen upristi mba tamen yô, m wuhe uicighanmbaiorov kpishi ken gaadi kpaa; shighe u i lu wuan ve la kpaa yô, m lu rumun je.

¹¹Er m lu tsahan ve ashighe kpishi ken ushinagoge cii yô, m lu nôngon tsung sha u kighir ve mer, ve̱ tuhwan kpaa; ishima vihim a ve je gande, m lu tôvon ve a ican ityô zan zan ar ken agar a ken akuraior la kpaa.

¹²Nahan er m lu zan sha Damaseku a tahav sha imo i upristi mba tamen yô,

¹³ka kom iyange sha tembe nahan yô, tor, sha gbenda je, m nenge iwanger igen due Sha, gande iwanger i iyange, wanger kasem a mba ve lu zan a mo imôngo la cii.

¹⁴Zum u se cii se haa inya yô, m ungwa imo, lu ôron kwagh a mo ken zwa u Heberu er: Saulu, Saulu, ka nyi u tevem a icana? U we u tume angahar sha gbough ku huren ibua a mi la yô, ka u á nyoon we a nyoon tsô.

¹⁵Tsô m kaa mer: Ka we ana Tere, Ter kaa er: Ka Mo, Yesu, u u tevem a ican ne.

¹⁶Kpa mough tile sha, gadia ka sha ci u nahan je M ande hen we ye, sha u Me ver u ortom man or u eren shiada er u nenge a Mo shi Me va ande hen we kpaa yô.

¹⁷M ngu yiman we sha ikev i nongoior ne man i atôatyev a Mo M lu tindin we hen a kpaa la,

¹⁸sha u ú za bugh ve ashe sha u ve̱ gema ve̱ due ken ime, ve̱ nyôr ken iwanger man shi ve̱ gema ve̱ due ken agee a Satan, ve̱ va her Aôndo yô, sha er ve̱ zua a mde u asorabo a ve man shi ve̱ zua a dyako a mba ve lu uicighanmbaiorov imôngo sha jighjigh u nan u ken a Mo la kpaa yô.

¹⁹Nahan yô, tor Agripa, m kera hemba mpase u Sha, u m nenge a mi la ato ga.

²⁰Kpa m ôr kwagh m hii hen mba ve lu ken Damaseku man ken Yerusalem man shi ken tar u Yudia cii zan zan kua atôatyev kpaa, m kaa mer, ve̱ zamber, ve̱ gema her Aôndo, man shi ve̱ er aeren a a kom mgemshima la.

²¹Ka sha ci u nahan man Mbayuda kôrom ken tempel, lu nôngon u wuan mo ye.

²²Mo yô, ka er m zough a iwasen her Aôndo man m til zan zan nyian ye; m lu pasen mbakiriki kua mbavesen cii, m gbe ôron ma kwagh ugen ga saa akaa a uprofeti kua Mose lu kaa er á va er la,

²³er, Kristu Una ya ican man shi er i lu Un A hii nderen shin mbakpenev yô, Una yôô iwanger hen nongoior ne kua hen atôatyev kpaa.

²⁴Ngur ôron akaa palegh iyol nahan yô, Fesetu kaa sha imo i taver er: Paulu, u ngu hunden! Mtime u u tim ken takerada yum ne, gema na u ihundugh.

²⁵Kpa Paulu kaa er: M ngu hunden ga, Fesetu orhemban, kpa m ngu ôron akaa a mimi man a a lu sha kwaghfan je.

²⁶Gadia tor je kpaa fa akaa ne, nahan yô, m ngu ôron kwagh a na vangertiôr, gadia m fa dedoo je, ken akaa ne ma kwagh môm ngu un myer ga, gadia i er a ken myer kpaa ga.

²⁷Tor Agripa, u na uprofeti jighjigh kpa? M fa, u na jighjigh je.

²⁸Agripa gema kaa a Paulu er: Sha ankwaghôron wou u kpuaa ne tsô, ka u ka geman mo, m̱ hingir Orkristu!

²⁹Paulu kaa er: Sarem her Aôndo shin una lu kpuaa shin una ngee, i̱ de lu we tseegh ga, kpa i̱ lu mba ve lu ungwan mo nyian ne cii ma ve hingir er mo m lu nahan, saa di ikangenev mbin tsô.

³⁰Tsô tor kighir mough vea gomna man Berenishi man mba ve tema a ve yô.

³¹Mba kar kera yô, ve ôr kwagh ayol a ve, ve kaa er: Or ne er ma kwagh u kuman ku shin ikangenev tsô kpaa ga.

³²Agripa kaa a Fesetu er: Aluer or ne una kaa er, i̱ za a ijir na hen Shisar ga yô, ma i fatyô u pasen un tuhwan.