Read tiv Aerenakaa A Mbaapostoli 27 Bible Online

Aerenakaa A Mbaapostoli 27 - tiv bible

Aerenakaa A Mbaapostoli 27

¹Zum u ikaa mase kuren er se se̱ nyôr tso u zan Italia yô, i na Paulu kua mbakwarev mbagenev sha ikev i torutya ugen, iti na er Yuliu, u ken ikum i mbautyav i Agusetu.

²Se mba nyer ken tso ugen u Adaramitia, u a kohol iyol u moughon zan hen ajiir a hen kpe u zegemnger u Ashia yô, se kôr gbenda; Aristareku, or u Masedonia, u a due ken Tesalonika la kpaa lu a vese imôngo.

³Kper nan gen se ar hen Shidon; Yuliu er a Paulu doo doo, a rumun un er a̱ za hen akar a na, ve̱ er a na dedoo.

⁴Se mba moughon haala yô, se ningir hen kpe u Shiperu, sha ci u ahumbe taver, lu van se sha ishi.

⁵Tsô er se kar zegemnger u hen kpetar u Shilishia man Pamfilia la yô, se va ar hen Mira u ken tar u Lishia.

⁶Keela yô, torutya la kohol tso u Alekesanderia u a lu zan hen Italia; a wa se ker.

⁷Se lu zan tegh tegh ayange ngee, se va ar ikua ikua a Shinidu, kpa lu sha ican je; er ahumbe rumun se u zan hemen dedoo ga yô, se ningir hen kpe u Kerete ikua ikua a Salemone.

⁸Man er se lu teran zan hemen sha ican yô, se va ar hen ijiir i i yilan er Ahongo a Doonashe, gar u Lasea lu her ikua ikua je.

⁹Tsô er shighe za kpishi man zende kpaa hingir u ican, shighe u hôron kwaghyan kpaa vande karen kera yô, nahan Paulu wa ve kwagh,

¹⁰kaa a ve er: Ne nomsombaiorov, m nenge zende ne yô, ngu zan u za duen sha mvihi man msaa kpishi, ka ikav man tso tseegh vea saa ga, á kua uuma asev kpaa.

¹¹Kpa torutya la hemba wan imo i or u kôôm tso la iko man i or u tsoo la kpaa a akaa a Paulu kaa la.

¹²Man er ihongo la doo u teman her fam ga yô, mbagenev kpishi kaa er, i̱ mough heregh, a fatyô yô, a lu nan nan kpaa, ma i ar ken Finikia, ka ihongo i Kerete je la, i i ver ishigh shin ityôtar la; ma i za lu her zan zan fam u̱ bee.

¹³Tsô er ahumbe va pever tegh tegh ken vegher u imbusutariyan yô, ve lu er, kwagh gba zan sha ishima ve ve, nahan ve mough ve gba teran hen Kerete ikua ikua a kpetar.

¹⁴Kpa ka tem dôghôô yô, ahumbe agen a taver, a i yer er, Urakilo la za va due ken ian i a.

¹⁵Man zum u a va ta sha tso, man tso kera fatyô u veren ishigh sha ahumbe ga yô, se gba den tsô, ahumbe mase mgbeghan se.

¹⁶Er se kar hen kpe u wancile u i yilan er Kalouda la yô, se nôngo sha ican je man se zer wantso ugen u kiriki la ye.

¹⁷Mba tee un mba we sha tso u vesen la yô, ve nyôôso tso, ve kange tso; ve hure akondo a tenti a tso la, gadia ve lu cian er alaghga á za ta ve sha waarawa u Shiriti; nahan ahumbe mase mgbeghan ve tsô.

¹⁸Tsô er ican er se sha uraahumbe yum nahan yô, kper nan gen ve hii u haan ikav shin mnger.

¹⁹Sha iyange i sha utar la, ve kura ikav mbi tsoov ve haa kera sha ave ve je.

²⁰Ayange kpishi je iyange due ga, asan kpaa wanger ga, man zegeahumbe u ura kpaa lu eren se ican; yô, mayange se kera fa mwar wase ga.

²¹Man er ve lu a ya kwagh ga shighe vese yum yô, Paulu mough tile sha her atô ve, kaa er: Ne nomsombaiorov, aluer iyange nea ongo kwaghôron wam nea mough ken Kerete ga yô, mvihi man msaa ne maa a tser ne ga.

²²Hegen yô, m ngu wan ne kwagh mer, lu nen gbar gbar, gadia mô wen môm nana saa ga, saa tso tseegh.

²³Gadia hen tugh mbun je ortyom u Aôndo u m lu u Na, m civir Un kpaa la, a va tile a mo.

²⁴A kaa er: De cie ga, Paulu; tilen you sha ishigh ki Shisar kpee je; nenge, Aôndo kpaa na u mba ve lu zan a we imôngo la cii sha ikev.

²⁵Sha ci u nahan yô, ne nomsombaiorov, lu nen gbar gbar, gadia m na Aôndo jighjigh mer, er i kaam nahan yô, kape á lu je la.

²⁶Kpa ka u sé za ta sha ma icile igen keng.

²⁷Kpa er tugh va ile sha iyange i sha pue kar unyiin la yô, er i lu tumbul a vese sha zegemnger u Aderia la, ken atôutu je mbaerentom shin tso lu henen er ve mgbôghom a ma tar

²⁸nahan ve kar ije, ve nenge lu fadem ikundu; (angahar akunduataratar) shi ka tem dôghôô yô, ve shi ve kar, ve nenge lu fadem pue kar utaan (angahar akunduanyiingber).

²⁹Ve cia er alaghga tso á za ta se sha kpetar sha avande yô, ve kende amandeatsoo anyiin shin ityôtsoo ve gba tômon er sev ma mbu av.

³⁰Mbaerentom u tsoo gba keren ian i vea yevese vea undu tso, ve hungwa a wantso u kiriki la shin zegemnger bee er mba za kenden amandeatsoo agen sha ityough ki tsoogh nahan.

³¹Tsô Paulu kaa a torutya kua mbautyav er: Aluer mban vea lu shin tso her ga yô, né fatyô u waren ga.

³²Tsô mbautyav tôndo ikor i wantso u kiriki la, ve pase un, gba shin mnger.

³³Sev mbu ngur aven a av, nahan Paulu taver ve ishima cii er ve̱ ya kwagh; a kaa er: Nyian ka ayange pue kar anyiin je ne, a ne tse kuran kaka, ne gbe lun ijen tsô, ne ye ma kwagh ga ne.

³⁴Sha ci u nahan yô, m ngu taver ne ishima mer, ya nen kwagh; gadia ka nahan man a kpe ne iyol ye, gadia gwarce u sha ityough ki mô wen môm kpaa una gba inya ga.

³⁵Kur heen nahan yô, a tôô bredi, a sugh Aôndo sha ishigh vegh cii, a coon a gba yan.

³⁶Nahan ve cii ve hingir gbar gbar, tsô ve ayol a ve kpaa ve ya kwagh.

³⁷Kohol se mba se lu ken tso cii yô, se kuma ior deri uhar man akunduatargber kar ataratar.

³⁸Mba ye kwagh ka kom ve yô, ve heghem tso ikav, ve haa alakema shin zegemnger.

³⁹Sev mbu av yô, ve fa tar la ga, kpa ve nenge a inyuugh ki zegemnger ki lun a waarawa hen kpe; tsô ve gba henen er, shin vea fatyô u aren a tso sha mi kpaaou?

⁴⁰Nahan ve sagh amandeatsoo, ve undu shin mnger, ve sagh ikor i ikpande i kôôm tso a mi la kpaa, ve kende a ikondo i sha ityough ki tsoogh vegher u ken ahumbe la sha, tsô ve ver ishigh sha kpe u waarawa la.

⁴¹Kpa mba za ar hen tar ape mngerem lu vegher ne man vegher la kpaa yô, tso za kema shin inya, ityough nagh hange shin inya, kera tenger ga; ityô na gba hemben sha ci u mkpianger u agôndoamnger la.

⁴²Mbautyav wa ishima er vea wua mbakwarev sha u mô ve môm nana̱ de ôôn uwe nana̱ waren ga.

⁴³Kpa torutya la yô, lu un ka yiman Paulu, nahan a yange ve awashima ve la, a kaa er, mba ve fe uwe u ôôn yô, ve̱ vande haan mnger, ve̱ za due sha tar;

⁴⁴man mbagenev yô, ve̱ nôngo sha ikpande, mbagenev sha abamber a tsoo la; kape i hii ve ve cii ve war ve due sha tar doo doo je la.