Read tiv Aerenakaa A Mbaapostoli 3 Bible Online

Aerenakaa A Mbaapostoli 3 - tiv bible

Aerenakaa A Mbaapostoli 3

¹Tsô Peteru vea Yohane lu kôndon zan sha tempel imôngo sha shighe u eren msen, ka ahwa atar atetan je la.

²Orgen u a sombo ken uya je lu her, i tôô un a tôô i veren un hen hunda u tempel u i yer er dooashe la, ayange ayange, sha u a̱ sôn mba ve lu nyôron ken tempel la kwagh.

³Tsô nengen a Peteru man Yohane mba ngur veren iyol u nyôron ken tempel yô, a sôn ve er, ve̱ na un kwagh.

⁴Peteru kua Yohane bon ashe sha a na kaa er: Kenger se.

⁵Tsô a gba kenger ve, lu er vea na un ma kwagh.

⁶Kpa Peteru kaa er: Azurfa man zenaria yô, m ngu a mi ga, kpa kwagh u m lu a mi yô, ka un me na u ye; zende ken iti i Yesu Kristu Ornasareti.

⁷Tsô a kôr un sha uwegh ku yanegh a mough a na sha, fese nahan angahar a na man ashe a angahar a na taver,

⁸a mough saghera a tile sha, a gba zenden; a nyôr ken tempel a ve imôngo, lu zenden, tsuwen, wuese Aôndo.

⁹Ikpelaior la cii nenge un er lu zenden, wuese Aôndo yô,

¹⁰nahan ve kav er i lu un u a tem hen Hunda u Dooashe u tempel sha u ngohol iwua la; kpiligh ve iyol sha kwagh u i er un la kpaa.

¹¹Tsô er a var a Peteru man Yohane yô, ikpelaior cii va ayem va kohol ken kungur u i yilan er ka u Solomon la, lu kpiligh ve iyol tsung.

¹²Tsô Peteru nengen nahan yô, a gema a kaa a ikpelaior er: Ne ior i Iserael, ka nyi kwagh ne a kpiligh ne iyol, man shi ka nyi ne hee ashe sha a vese er ka sha agee a ase ayol a ase, shin sha mciviraôndo wase man se er un ve a hingir u zendene?

¹³Ka Aôndo u Aberaham man Isaka man Yakob, ka Aôndo u uter asev, A civir Wanakiriki Na Yesu ye, Un u ne na Un kera, ne nyiman Un sha ishigh ki Pilatu zum u wa ishima u una pase Un á tuhwa yô.

¹⁴Kpa ne nyiman Un u a lu Icighan man u Mimi la, ne gema ne sôn ner, i̱ na ne orwuanor.

¹⁵Ne wua Tor u uma, kpa Aôndo nder Un shin mbakpenev; se yô, se mba mbashiada sha kwagh ne.

¹⁶Ka sha jighjigh u nan ken iti Na kpaa, man iti Na i taver or u ne nengen a na ne, man shi ne fe un kpaa ne ye; shi ka jighjigh u nan u a ne la, man a ne un mkpeyol jimin cii sha ishigh yenegh cii nahan ye.

¹⁷Hegen yô, anmgbianev, m fa, ka sha lan ne er kwagh ne ye, er mbavesen enev kpaa lu er nahan.

¹⁸Akaa a Aôndo lu tsengaôron sha kwaghôron u profeti la cii er, Kristu Na Una ya ican yô, kape A kure a vough je ne.

¹⁹Yô, zamber nen man gema nen ishima, sha u i̱ ese asorabo a en kera, man sha u ashighe a myôhôryol a sha ishigh ki Ter kpaa a̱ va sha a ven yô;

²⁰man sha u A̱ tindi ne Kristu u lu i vande veren Un sha ci wen la ka Yesu.

²¹Un yô, lu u ma i ngohol Un Sha keng, zan zan ar sha ashighe a sôron akaa cii, er Aôndo vande ôron a uicighanmbaprofeti Nav mba tsuaa, ve gema ve ôr ior la.

²²Mose kpaa lu kaa er: Aôndo Ter Una ver ne profeti ken anmgbianev enev, er mo nahan; ka Un ver nen ato sha a Na sha akaa a Una ôr ne cii ye.

²³Nahan yô, hanma or u uma u nana ver ato sha Profeti la ga yô, á tim nan ken nongoior ne kera doo doo je.

²⁴Man shi uprofeti cii, hii hen Samuel kua mba ve mase van ken ijime na kpaa, mba ve ôr kwagh cii, ve yôô kwagh u ayange ne.

²⁵Yô, ka ne je, ne lu ônov mba uprofeti man ônov mba ikuryan i Aôndo ya a Aberaham la ye, er: Ka ken tsombor wou je man akuraior a sha won cii aa zua a iveren ye.

²⁶Ka her a ven je Aôndo vande tindin Wanakiriki Na ye zum u A nder Un shin ku la, sha u A̱ ver ne dedoo, ka er Una gema hanmô wen sha afer a nan kera yô.