Read tiv Aerenakaa A Mbaapostoli 5 Bible Online

Aerenakaa A Mbaapostoli 5 - tiv bible

Aerenakaa A Mbaapostoli 5

¹Kpa orgen u i yilan un iti er Anania la, kua kwase na Safira, a tee sule

²a pande inyaregh kila, a koso, kwase na kpaa fa nahan, a va a ki ki shi la a va ver sha ikev i mbaapostoli.

³Kpa Peteru kaa er: Anania, inja na nan man Satan a iv u ken ishima er u̱ er Icighan Jijingi aie, u̱ pande ishe i sule la u̱ yere?

⁴Er u lu her nahan yô, kera lu u wou gaa? Man er i tee kera nahan kpaa, inyaregh kila kera ka sha ikev you ki lu gaa? Ka nyi man u hen kwagh ne ken ishima you nahana? Yô, ka ior u er ve aie ga, kpa ka Aôndo je.

⁵Anania ongo akaaôron ne nahan yô, a gbidye inya, a kpe; mba ve ungwa la cii zegemcie gba ve iyol.

⁶Mbayevikaior mough, cir un akondo iyol, tsô ve due a mi ken won, ve za ii.

⁷Ahwa nga kar er atar nahan yô, kwase na va nyôr, kpa lu a fa kwagh u a er la ga.

⁸Tsô Peteru pine un er: Kaam ase, ka sha inyar nahan ne tee sule la yee? A rumun er: Een, se tee u sha inyaregh kin nahan.

⁹Kpa Peteru kaa a na er: Ka nyi i ne je ve ne zough zwa sha u né kar Jijingi u Ter nahana? Yô, nenge ase, angahar a mba ve ii nomu, ngara hen hunda la, shi vea tôô u vea due a we kpaa.

¹⁰Fese nahan a gbidye inya her angahar a na, a kpe. Mbayevikaior mba nyer ker yô, ve kav un kpenegh; ve tôô un, ve due a mi ve za ii un a nom na.

¹¹Zegemcie gba nongo u Kristu iyol cii, kua shi mba ve ungwa akaa la cii.

¹²Nahan i er uivande man akaa a kpilighyol kpishi hen ior sha ave a mbaapostoli; ve cii ve lu imôngo ken kungur u Solomon a ishima i môm.

¹³Kpa ior mbagenev yô, mô cihi u nana nyôr nongo a ve ga, kpa ikpelaior lu civir ve a civir.

¹⁴Mbanan Ter jighjigh kpaa ve seer a seer, ikpelaior kpishi i nomso man i ukase kpaa;

¹⁵zan zan yô, i tôô mbauangev, i va a mi sha igbenda, i va ver ve sha ugambe man sha injugh sha u aluer Peteru una va karen yô, shin a lu jijingi na tsô kpaa a gba sha mbagenev.

¹⁶Man ken agar agen a a kase Yerusalem la kpaa ikpelaior kohol, ve lu van a mbauangev man shi mba ujijingi mba hôngorouv ve ze ve iyol kpaa; nahan ve cii kpaa i war ve.

¹⁷Kpa zegepristi mough a iwuhe ken ishima kua mba ve lu a na ityô cii, ka nongo u Mbasadushi je la,

¹⁸ve kôr mbaapostoli mbala, ve wa ve ken gaadi.

¹⁹Kpa ortyom u Ter ugen va bugh ihinda i gaadi la tugh, due a ve, kaa er:

²⁰Yem nen, za tile nen ken tempel, ôr nen ikpelaior akaaôron a uma ne cii.

²¹Mba ongo nahan yô, ve za nyôr ken tempel pepe, ve gba tesen. Kpa zegepristi va kua mba ve lu a na ityô, ve lôhô mkohol kua mbatamen mba Iserael cii, ve tindi hen gaadi er i̱ va a ve.

²²Kpa udugwer mba ve za la, ve za kohol ve ken gaadi ga; ve hide, ve va ôr ve nahan er:

²³Se za kpa se nenge ihinda i gaadi vingir, i senda i doo doo, man mbakuran kpaa tile sha ihinda la; kpa se mba bughun yô, se kohol ma or kimi ga.

²⁴Orvesen u tempel man shi upristi mba tamen mba ongo akaa ne nahan yô, lan ve ishima cii sha kwagh ve la ve fa er kwagh la una za kighir ga.

²⁵Tsô orgen za va, va kaa a ve er: Nenge, ior mba ne we ve ken gaadi mbala, ve tile ken tempel, mba tesen ikpelaior.

²⁶Tsô torutya za a udugwer, za va a ve, kpa lu sha apera ga, gadia ve lu cian ikpelaior er ve̱ de te ve awen ga.

²⁷Mba ve a ve yô, ve ver ve sha ishigh ki mkohol. Tsô zegepristi kaa a ve er:

²⁸Se ta ne icin gbang gbang ser: De kera tesen nen ken iti ne ga ga? Nenge, ne iv Yerusalem a ityesen yen, ka ne pe haan se ibo iyol sha ku u Or ne.

²⁹Kpa Peteru man mbaapostoli mbagenev gema kaa er: Ka u sé hemba ungwan imo i Aôndo keng a imo i ior.

³⁰Aôndo u uter asev A nder Yesu u ne wua Un ne mande Un sha kon la.

³¹Ka Un je Aôndo kende Un sha sha uwegh Nagh ku yanegh sha u A̱ lu Orhemen man Oryiman, sha u A̱ na Iserael mgemshima man A̱ de ve asorabo kpaa ye.

³²Man se mba mbashiada sha akaa ne, kua Icighan Jijingi kpaa u Aôndo na mba ve ongo imo Na la.

³³Mbala mba ongo nahan yô, asema gba ve awambe je, lu ve ka wuan ve.

³⁴Kpa Orfarishi ugen lu, iti na er Gamaliel, lu ortesenatindi lu a icivir hen nongoior la cii, a mough a tile sha ken mkohol la, a kaa er, i̱ due a ior mbala ken won teghelee;

³⁵tsô a kaa a ve er: Ne ior i Iserael, kura nen ayol a en sha kwagh u ne nenge u eren a ior mban ne.

³⁶Gadia sha ayange a a kar la Teuda mough, yila iyol na er un ngu ma kwagh je; ior mbagenev nyôr nongo a na, iyenge ve lu er deri unyiin nahan. I wua un, nahan mba ve ungwa imo na cii, i num ve, ve kera lu ma kwagh ga.

³⁷Ka tse yô, Yuda, or u Galilia, mough di sha ayange a ngeren ior la, ulugh mbagenev ken ijime na; un kpaa va saa ishe; mba ve dondo un ityô cii, sambe.

³⁸Hegen yô, m ngu kaan ne: De nen ior mban kera tsô; gadia aluer mhen ne shin tom ne ua lu u ior yô, ua bunde;

³⁹kpa a lu u Aôndo yô, né fatyô u bunden u ga, alaghga á va hingir er ne mba nôngon num kuan Aôndo je kpaa.

⁴⁰Nahan ve rumun imo na la. Tsô ve yila mbaapostoli mbala, ve gbidye ve, ve shi ve ta ve icin er ve̱ de kera shi ôron kwagh ken iti i Yesu ga; tsô ve pase ve, ve tuhwa.

⁴¹Nahan ve due ken mkohol la kera, ve gba ember sha er i nenge er ve kuma u yan ican i aheenegh sha ci u iti la yô.

⁴²Hanma iyange kpaa ve lu gban uwer ga sha u tesen man u ôron ken tempel man ken uya er Yesu ka Kristu.