Read tiv Aerenakaa A Mbaapostoli 8 Bible Online

Aerenakaa A Mbaapostoli 8 - tiv bible

Aerenakaa A Mbaapostoli 8

¹Saulu kpaa lu rumun ku na. Tsô hen ayange la zegemtev u sha ican mough sha nongo u Kristu u u lu ken Yerusalem la. Ve cii i sambe ve ken ityar i Yudia man i Samaria, mase shin mbaapostoli tseegh.

²Nomso mba cian Aôndo ii Sefanu; ve zungwe ku na kpishi.

³Kpa Saulu yô, lu eren nongo u Kristu ican gba nyôron uya uya, kôron nomso man kasev, kpelan ve hen inya za wuhen ken gaadi.

⁴Ve mba i sambe ve la yô, ve yem han han, ve lu yôôn Loho u Dedoo.

⁵Filibu kar za ken gar u Samaria, za ôr ve kwagh u Kristu.

⁶Ikpelaior ver ato sha akaaôron a Filibu la sha ishima i môm zum u ve ungwa a man shi ve nenge uivande mba a eren la kpaa yô.

⁷Gadia ujijingi mba hôngorouv kpishi due hen ior mba ve lu a mi la, ve lu genger imo taver taver; i war mbasombon man mbakeer kpaa kpishi je.

⁸Tsô i ember ken gar la tsung.

⁹Kpa orgen vande lun ken gar la, iti na er Shimon, lu eren ahir keregh, lu kpiligh mba ken Samaria iyol, lu kaan er un ngu ma zegekwagh je.

¹⁰Ve cii, hii hen mbayev zan zan mbatamen kpaa lu wan un iko, kaan er: Or ne ka agee a Aôndo a i yer a er a hemban je ne.

¹¹Ve lu wan un iko, gadia kpiligh ve iyol a ahir a na la ica i gba je.

¹²Kpa zum u ve na Filibu jighjigh er a lu ôron Loho u Dedoo u tartor u Aôndo man shi u iti i Yesu kpaa yô, i er ve batisema, nomso a kasev cii,

¹³Shimon iyol na kpaa na jighjigh; mba eren un batisema yô, a var a Filibu; kpiligh un iyol er a nenge uivande man ityom i agee i vesen la.

¹⁴Tsô zum u mbaapostoli mba ve lu ken Yerusalem ungwa er Mbasamaria rumun kwaghôron u Aôndo yô, ve tindi Peteru man Yohane her a ve.

¹⁵Er mbala za nyôr yô, ve er msen sha er ve̱ ngohol Icighan Jijingi yô;

¹⁶gadia lu a gba sha mô ve môm ga, saa di batisema tsô i er ve ken iti i Ter Yesu ye.

¹⁷Tsô ve penda ave sha a ve, nahan ve ngohol Icighan Jijingi.

¹⁸Er Shimon nenge er i lu sha ave a pendan a mbaapostoli man i ne Icighan Jijingi yô, a kende inyaregh, a na ve,

¹⁹a kaa er: Mo kpaa, nam nen agee ne, sha er hanma or u me penda ave sha a nan yô, nana̱ ngohol Icighan Jijingi.

²⁰Kpa Peteru kaa a na er: Inyaregh you ki̱ saa ishe a we imôngo, sha ci u u hen ken ishima you wer, ú zua a iwua i Aôndo sha inyar yô.

²¹Ci wou shin kwar wou ngu sha kwagh ne je ga, gadia ishima you ngi vough sha ishigh ki Aôndo ga.

²²Yô, gema ishima sha ifer you ne kera, er msen, sôn Ter, tsô alaghga á de u mhen u ken ishima you ne.

²³Gadia m kav u ngu ken zarmle u yuan man ken ikangenev mbi iferev kpaa.

²⁴Tsô Shimon gema kaa er: Er nen msen sha ci wam sôn nen Ter sha u akaa a ne ter ne, ma kwagh môm keregh a̱ de eren mo ga yô.

²⁵Tsô er ve pase kwagh sha gbashima man ve ôr kwagh u Ter kpaa yô, ve hide hen Yerusalem, ve lu pasen Loho u Dedoo ken angarev mba Mbasamaria kpishi.

²⁶Tsô ortyom u Ter va ôr kwagh a Filibu, kaa er: Mough, yem vegher u shin imbusutariyan, sha gbenda u u dugh ken Yerusalem u zan hen Gasa, ka gbenda u ior ve karen sha u yum ga.

²⁷Tsô a mough a za. Yô, orgen, or u Etiopia, u eren tom ken ya u tor, lu ititor i Kandasa, torkwase u Mbaetiopia, u akaa a na a injaa cii lu sha ikev na yô, a za ken Yerusalem sha u za civir Aôndo,

²⁸lu hiden, tema sha ikyekye na i kpelan, lu ôron takerada u profeti Yesaia.

²⁹Tsô Jijingi kaa a Filibu er: Kporom, za mgbôghom a ikyekye la ikua ikua.

³⁰Nahan Filibu za heregh ayem, za ungwa er lu ôron takerada u profeti Yesaia. Tsô a kaa a na er: U kav kwagh u u lu ôron ne kpa?

³¹A kaa er: Á er nan man me kavaa? Saa or nana pasem. Nahan a zamber a Filibu er a̱ unde a̱ tema a na imôngo.

³²Ivurugh ki icighanruamabera ki a lu ôron yô, ka ki ne er: I ulugh Un er iyôngo i i ze a mi sha u za sôngon yô, man shi er waniyôngo ka a lu ving sha ishigh ki mbatôndon un aive nahan, kape Un kpaa A bugh zwa ga la.

³³Ka sha mlu Na u icivirigh ga la man i tôô Un ijir kera ye; man kov Na yô, ka anti je nana ôr kwagh sha u? Gadia i tôô uma Na sha tar kera.

³⁴Or u eren tom ken ya u tor la gema kaa a Filibu er: Shi ôrom yôô; profeti ne yô, ka kwagh u an a ere? Ka kwagh na iyol na shin ka kwagh u orgene?

³⁵Filibu bugh zwa, hii hen ivurugh ki icighanruamabera kila je, gba ôron un kwagh u Yesu.

³⁶Tsô mba ngur yemen sha gbenda yô, ve za ar hen mnger. Or u eren tom ken ya u tor la kaa er: Mngerem kpaa man, man ka nyi je i yange u eren mo batisema? [

³⁷Filibu kaa er: Aluer u na jighjigh a ishima i môm yô, á fatyô. A gema a kaa er: M na jighjigh er Yesu Kristu ka Wan u Aôndo je.]

³⁸Tsô a kaa, i̱ tile un a ikyekye; ve uhar ve hungwa shin mnger, Filibu vea or u eren tom ken ya u tor la; a er un batisema.

³⁹Mba dugh shin mnger yô, Jijingi u Ter tôô Filibu yem a na kera, or u eren tom ken ya u tor la kera nenge a na ga, gadia a gba yemen zende na a iember.

⁴⁰Kpa i za zua a Filibu ken Asote. Er lu zenden karen yô, a lu ôron Loho u Dedoo ken agar cii zan zan a za ar hen Sesaria.