Read tiv Mbaromanu 1 Bible Online

Mbaromanu 1 - tiv bible

Mbaromanu 1

¹Paulu, kpan u Kristu Yesu u i yila un er a̱ lu apostoli, i tsegha un sha ci u Loho u Dedoo u Aôndo

²u A vande tôndon zwa sha u, sha kwaghôron u uprofeti ken icighanruamabera la;

³ka Loho u sha Wan Na u A due ken tsombor u Davidi sha mlu u or la,

⁴kpa sha Jijingi u mtsegh i pase er Un ka wan u ageegh u Aôndo sha mnder u shin mbakpenev, ka Yesu Kristu Ter wase je la.

⁵Ka hen a Na se ngohol mrumun u sha mhôôn man tom u apostoli ye, sha u akuraior cii a̱ wa jighjigh u nan la iko sha ci u iti Na yô.

⁶Ne kpaa, ne mba ken a, ne mba i yila ne er ne̱ lu ior i Yesu Kristu.

⁷Ne mba ne lu ken Roma mba ne doo Aôndo ishima la cii mba i yer ne er ne̱ lu uicighanmbaiorov la, mrumun u sha mhôôn a̱ lu sha a ven kua bem mba ve dugh her Aôndo Ter wase man Ter Yesu Kristu kpaa.

⁸Hiihii yô, m ngu wuese Aôndo wam sha Yesu Kristu sha ci wen cii, gadia jighjigh wen u nan za gwa sha won cii.

⁹Aôndo u m civir Un ken jijingi wam sha Loho u Dedoo u Wan Na la, ka shiada wam er m ngu umbur ne gbem je ken mbamsen av hanma shighe,

¹⁰m ngu zamber mer, a lu nan kpaa ma i bughum gbenda u van ken ven sha ishima i Aôndo.

¹¹Gadia hangem pe zuan ishigh a ven sha u ma m ne ne ma iwua i sha mrumun u sha mhôôn sha u taver ne yô.

¹²Inja na yô, se cii ma i taver se asema a ven imôngo sha jighjigh wase u nan ayol a ase, u wen kpaa, u wam kpaa.

¹³Anmgbianev, sarem ka de lanen nen ga er acin imôngo je m wa ken ishima u van ken ven, kpa zan zan hegen i bundem, sha u ma m or iwenge ken ven er m or ken atôatyev agen nahan kpaa.

¹⁴M ngu a injô iyol hen Mbagrika kua atôatyev kpaa, man shi hen mbafankwagh kua mbalanenkwagh cii.

¹⁵Ka nahan man i hangem pe ôron ne mba ne lu ken Roma Loho u Dedoo kpee ye.

¹⁶Kunya kôrom sha ci u Loho u Dedoo la ga gadia ka agee a Aôndo a sha myom u yiman hanma or u nan ne jighjigh cii, hii sha or u Yuda man shi or u Grika kpaa.

¹⁷Gadia ka sha u man i pase perapera u Aôndo kpaa ye, hii sha jighjigh u nan za a za hemen ken jighjigh u nan. Kape i nger kpaa la er: Or u perapera yô, ka sha jighjigh u nan man nana lu uma ye.

¹⁸Ka Sha man i lu pasen iyugh i Aôndo ye. Ngi van sha hanma mvende u i lu vendan Aôndo man sha hanma ifer i ior mba ve lu kighir mimi inya sha kwagh u ifer la;

¹⁹gadia kwagh u i fetyô u fan sha kwagh u Aôndo la i pase ve, ve fa un. Ka Aôndo je pase ve nahan ye.

²⁰Hii sha igbetar je mba nengen a mlu Na u i nengen a mi sha ashe ga la, inja na yô, ka agee a Na a tsôron man mlu Na u sha inja i Aôndo la, mba nengen a mi sha ashe a ishima ken aeren a Na. Nahan mba a ityôkwagh i ishôôgh ga,

²¹shin er ve fe Aôndo nahan kpaa ve civir Un er ka Aôndo nahan ga, ve sugh Un kpaa ga, mbamhen vev hingir gbilin, asema a ve a lanen kwagh la gema wa ime.

²²Ve kaa er, ve mba mbafankwagh kpa ve hingir abumeaior.

²³Ve daa iengem i Aôndo u tsôron kera ve ver eev mbu mbu bee or u nan lu kwagh u kpen la, man shi eev mbu inyon man uzendenya man akaa a kpelan iyav inya kpaa.

²⁴Ka nahan man Aôndo gbihi ve ken asaren a asema a ve sha ci u zan ken hôngor ye, ve nzughul a iyol, ayol a ve.

²⁵Ve daa mimi u Aôndo ve ver aie. Ve civir kwagh u i gbe un a gba, ve er un tom kpaa, kera lu Un u A gbe akaa la ga, man ka Un u i lu wuese Un gbem sha won ye.

²⁶Ka nahan man Aôndo gbihi ve ken asaren a dang ye, kasev vev gema ieren ve a nomso i sha gbaaôndo la hingir ieren i i lu sha gbaaôndo ga yô.

²⁷Kape nomso di kpaa ve undu ieren ve a kasev i sha gbaaôndo, asaren a ve gba usan ve ken ishima a ayol a ve, nomso gema er akaa a kunya a nomso, nahan ve ngohol injar i i kom sha mtsum ve la ken ayol a ve je.

²⁸Er i kera doo ve u rumun Aôndo ga yô, Aôndo gbihi ve ken mhen u a lu u injaagh ga yô, man u eren akaa a lun sha mi ga kpaa.

²⁹Ve iv a hanma inja i ifer man kwaghbo man hua u eren man kwaghvihin, ve mgbough a iwuhe man iwooor, man num man atseregh man inja i vihin. Ka mbaerenangereke,

³⁰man mbatuhwanior man mbakôron Aôndo ihom man mbacihinkwagh man mbagengeseyol man mbahagher sha kwaghôron man mbadughun aeren a bo man mbahemban mbamaren vev ato

³¹man mbalanenkwagh man mbalun a jighjigh ga, man mbalun a dooshima ga man mbazungwen mhôônom kpaa ga.

³²Ve fa tindi u Aôndo dedoo er mba ve eren ambaakaa ne yô, ve kuma ku, nahan kpaa, mba eren a er a tseegh ga, shi mba rumun mba ve eren a la kpaa.