Read tiv Mbaromanu 10 Bible Online

Mbaromanu 10 - tiv bible

Mbaromanu 10

¹Anmgbianev av, isharen i ken ishima yam man msen wam u m sen Aôndo sha ci ve la, ka sha u ma i yem ve.

²M ngu eren ve shiada mer, mba a ishima i tseen sha kwagh u Aôndo kpa ka sha gbenda u kwaghfan ga.

³Gadia ve fa perapera u a dugh her Aôndo la ga, mba keren u veren u ve ayol a ve. Perapera u Aôndo la yô, ve rumun un ga.

⁴Kristu ka mkur u tindi sha u hanma or u nan ne jighjigh la yô, á na nan ishô.

⁵Mose nger er: Or u nan eren perapera u sha atindi la yô, nana lu uma sha mi.

⁶Kpa perapera u sha jighjigh u nan la ngu kaan nahan er: De kaan ken ishima you wer: Ka an nana kôndo Sha, inja na yô, ka u za hungwan a Kristu je la, ga;

⁷shin: Ka an nana hungwa shin ihungwa i i ze kweng la, inja na yô, ka u za duen a Kristu shin mbakpenev je la.

⁸Kpa i kaa nana? I kaa er: Kwaghôron ne ngu ikua ikua a we, ngu ken zwa wou kua ken ishima you kpaa. Ka kwaghôron u jighjigh u nan u se lu yôôn un ne:

⁹Aluer u pase sha zwa wou wer, Yesu ka Ter, shi u na jighjigh ken ishima you wer, Aôndo nder Un shin mbakpenev yô, ú war.

¹⁰Gadia ka ken ishima ka i na jighjigh sha u zuan a ishô ye, shi ka sha zwa ka i pase sha u zuan a myom ye.

¹¹Gadia icighanruamabera ngu kaan er: Hanma or u nan ne Un jighjigh yô, nana va ahenga ga.

¹²Mkposo ngu hen Oryuda a Orgrika je ga, gadia ka Ter môm je A lu u ve cii ye, shi A ngee a akaa sha ci u mba ve yer sha iti Na la cii.

¹³Gadia hanma or u nan yer sha iti i Ter yô, nana war.

¹⁴Nahan á er nan man ior vea yila sha iti i Un u ve ne Un jighjigh ga laa? Man shi á er nan man vea na Un jighjigh, Un u ve lu a ungwa kwagh Na ga laa? Man shi á er nan man vea ungwa aluer or u ôron kwaghaôndo nana lu ga yôô?

¹⁵Man shi á er nan man vea ôr kwaghaôndo aluer a tindi ve ga yôô? Kape i nger la er: Angahar a mbayôôn loho u akaadoon la a doo tsô!

¹⁶Kpa ka ve cii man ve ver ato sha Loho u Dedoo la ga. Gadia Yesaia kaa er: Tere, ka an nan ne kwagh u nan ongo hen vese la jighjigh?

¹⁷Nahan jighjigh u nan ka sha m-ongo, m-ongo di gema ka sha kwaghôron u Kristu.

¹⁸Nahan m ngu pinen mer: Ve ungwa ga shinii? Ve ungwa je: Imo ve samber sha tar sha won cii, akaaôron a ve kpaa za ar sha akighir a taregh.

¹⁹Nahan shi m ngu pinen mer: Iserael kav ga shinii? Hiihii yô, Mose kaa er: Me na, né gba mba ve lu nongo u ior ga la iwuhe, Me er ishima ia vihi ne a ikurior i lanen kwagh.

²⁰Yesaia kaa je er: Mba ve keren Mo ga la yô, ve zua a Mo, mba ve pinem ga la M pase ve kwagh Wam gbar gbar je.

²¹Kpa sha kwagh u Iserael yô, a kaa er: M shi dughun ave didi hen nongoior u hemban ato u nyiman kwagh.