Read tiv Mbaromanu 13 Bible Online

Mbaromanu 13 - tiv bible

Mbaromanu 13

¹Hanma or u uma nana̱ ungwan imo i tahav mbu nan lu mbu sha ikev la, gadia ma tahav mbu ga, saa mbu mbu dugh her Aôndo la, mbu mbu lu her ne kpaa, ka Aôndo je A ver ye.

²Nahan yô, or u nan hendan a tahav mbula yô, ka Aôndo u A ver mbu la je nan lu hendan a Na ye. Mba ve hendan a mbu kpaa vea tôô mtsaha sha ayol a ve.

³Aluer or nana eren dedoo yô, mbatarev ka kwagh u cian ga, saa nana eren kwagh u bo. Sar u pe cian or u nan lu a tahav la ga zee? Yô, eren kwagh u dedoo tsô nana wuese we.

⁴Gadia nan ka ortom u Aôndo sha u i̱ doo u. Kpa aluer wea er kwaghbo yô, cia, gadia ngu a sanker, ka gbilin ga. Nan ngu ortom u Aôndo sha u oron iyev tsahan or u nan eren kwaghbo yô.

⁵Nahan yô, ka u ungwan imo i nan, ka sha u palegh iyugh tseegh tsô ga, kpa ka sha ci u imo i ken ishima la kpaa.

⁶Ka sha ci u nahan ne lu tan kpandegh kpaa ye, gadia ve ka mbatomov mba Aôndo, ka sha kwagh ne je ve ver ishima sha mi ye.

⁷Kimbi nen hanma or kwagh u a lu u á kimbi nan la, orngohol kpandegh yô, i̱ ta nan kpandegh, or u saven kpaa i̱ rumun nan u saven, or u i lu u á cia nan kpaa, i̱ cia nan, or u i lu u á civir nan kpaa i̱ civir nan je.

⁸De luun ma or a ma injô ga saa di mdoo u ma ne doo ayol a en la tseegh tsô, gadia or u orgen nan doo nan ishima yô, nan kura atindi ve.

⁹Gadia atindi a a kaa er: De eren idya ga, de woo or ga, de iin ga, de tem ga, man hanma tindi ugen kpaa i fiir a cii ken kwaghôron môm ne er, or u nan we ndor a we yô, nana̱ doo u ishima er we iyol you nahan.

¹⁰Dooshima eren or u nan we ndor a na la, kwaghbo ga, nahan kwagh u atindi a kur sha mi vough yô, ka dooshima.

¹¹Kwagh ugen kpaa, ne fa shighe ne gadia ka ihongo i ma ne nder ken mnya je ne, gadia hegen myom hemba mgbôghom a vese a shighe u se na jighjigh hiihii la.

¹²Tugh za yum, sev sôôn aven. Nahan yô, se gbihi nen aeren a imegh kera se haa nen ikav mbi utyav mbi iwangerev iyol.

¹³Se zenden nen sha inja, i̱ lu sha inja i atetan, i̱ de lu sha iniongo i msôr shin msôrom ma hunden ga, i̱ de lu sha idya shin ijimba i eren ga, i̱ de lu sha iyongo shin iwuhe i eren kpaa ga.

¹⁴Kpa haa nen Ter Yesu Kristu iyol, de veren nen iyol ian sha u i̱ kende asaren a i la ga.